لاصحاب الجموس والخبره

[هاوي قصيده]

السلام عليكم ورحمه الله وبركاته

اخواني الكرام..

حبيت استشيركم بشغله ..تخص الجموس ..الحوض

عند اخوكم جمس قطعه 10 ..دبل .. وصراحه احس انه طامن شوي وقريب للارض ..

وابي انهضه(ارفعو ) شوي ..

من الامام والخلف ..جميع ..

فبايش تنصحوني ..؟

ضروري

[حطاب ليل]

حياك الله ياهاوي
الله خيرك بين امور...... الاول تغيير المساعدات الاربع لانه بعض المساعدات فيها تطويل وتقصير وتعمل بالغاز
الثاني تغيير ربل اليايات ولاتركب نحاس لان النحاس يطلع صوت مع المطب
الثالث يوجد وزنيه تنهض الموتر
ارجو اني افدتك ..ودمت سالما

[هاوي قصيده]

حطاب ليل .. يعطيك الف عافيه

بس ياليت لو توضح لي الاسهل ..والافضل ..لي وللسياره ..

وش تنصح به؟

[أبومناحي]

شووف يا قلبي عندك خيارات منها أنك تشتري يايات جديده

او تغير وازنيه اليايات اللي عندك وتخليها رفيعه

أو يمكن كفراتك صغيره والله اعلم

[أبـو فـايـز]

ما انصحك ترفعه يالغالي ابد خصوصا اذا الرفع بيكون ثابت ولا يتغير (اما اذا عن طريق المساعدات بحيث ترفعه بالبر وتنزله للمستوى الطبيعي في الخط هذا اهون)
لأن الرفع خطير جدا مع الجمس راح يخل بتوازن السيارة واي لفة احتمال يقلب الله يستر

[تيتشر]

اخوي انا معي بليزر واكيد انت عارف ان البليزر قريب من الجمس قطع 10
انصح بطق السست ورفعها السانتيمترات التي تريدها

[بوسحمان]

http://www.mekshat.com/pix/upload/im...mage_00104.jpg

البيع افضل عندما ترى الجموس الخاصه ؟؟؟ الى على طريق الدمام

[هاوي قصيده]

ابو مناحي


ياهلا فيك اخي الكريم

وانا اتشرف بمرورك ويعطيك الف الف عافيه يا الذيبان

[هاوي قصيده]

اخوي ابو شنب فسفوري

اشكرك عالنصيحه ..

بس يا الغالي انا ركبت كفرات شاهين عراض بس واطيه شوي ..

وابي ارفعه ..

بغض النظر لو اركب بالون ..البالون خطير وخاصه لا صار 900

[هاوي قصيده]

اخوي تيشتر

ياهلا فيك يابعد حيي

انت قصدك اثني السست ..

يعني اعوجهن علشان يرتفع؟

والا ايش؟

انتظر ردك

[هاوي قصيده]

اخوي بو سحمان

ما فهمت قصدك يابعدي ..

وش المقصود بالصوره

واشكرك عالمرور

[xnawwafx]

السلام عليكم

ياهلا ومرحبا اخوي هاوي قصيده

انا عندي قطع 15 وهو نفس اللي معك من ناحية الارتفاع كلهن يجن 3 سست ورى اللي عليك طال عمرك :
من قدام تلقى تحت مستوى الباب اسفل السياره حديده على عرض السياره فيها بلوط اثنين واحد يمين والثاني يسار هذول اذا شديتهم ترتفع السياره من قدام واذا ارخيت تنزل شدهم للأخير
من ورى تروح طال عمرك للخضريه الدمام ورشة اسمها المجمع السعودي اذا جيت الاشاره الاخيره اللي على شارع تيوتا قدام الجبيل و يمين الخضريه خذ يمين لين تجي آخر مديور قبل الاشاره ادخل معه يسار تصير الورش يسارك وارض فاضيه يمينك اول لفه تجيك على اليسار ورشه على الركن تفتح شرق يمانيه شغلهم مضبوط خلهم يزودون لك حبه وحده ورى يصر ارتفاعه حلو ولاهوب يقسى مثل ال25 لانه خمس سست انا خذا علي 400 وفالك طيب ان شاء الله

ابو سيف

[هاوي قصيده]

ابو سيف يعطيك الف الف عافيه يابعدي ..

وجزاك الله خير ..

طيب 400 ريال شغل يد وكل شي ..؟!

وهل ياثر على وزنيه السياره ؟؟

وهو يرفع السياره من قدام وورى ؟يعني نفس الطرق اللي ذكرتها

وهل القيمه شغل يد وكلش ؟ 400ريال.؟

والله يجزاك خير

[xnawwafx]

يا هلا ومرحبا اخوي هاوي قصيده
طال عمرك 400 ريال هذي قيمة سسته يمين وسسته يسار مع التركيب طبعا السست مستعمله يجيبها من التشليح بالرغم من توفرها في محلات قطع الغيار لكن اللي عرفته ان المتوفر بالمحلات جديد ما يجي الا صناعه سعوديه او اماراتيه وهذي ارخص يعني مع التركيب 300 ريال لكن اللي يجيبونها من التشليح تجي حديدها قوي حقت شد بلدها يصنفرها وينظفها وتطلع اخت الجديده
طبعا مثل قلت لك الجمس قطع عشره و قطع 15 لو جيت من ورى تلقى السست 3 حبات بس
ال 25 تلقى فيه 5 حبات يعني فرق 2
بعض الاخوان يزود 2 عشان يصير مثل 25 لكن...
انت كذا بتلاحظ ان الموتر صار اقسى صحيح انه مستحيل ينزل وش ما حملت عليه لذلك هو يعتمد على مدى تحميلك
يعني انا لما شاورت واستشرت قالوا لي كم مره تطلع البر في السنه طبعا كاشت ومحمل قلت عشر مرات ما اتعدى والباقي مطاليع قريبه قالوا لي وش تحمل عليه قعدان ولا علف قلت انا حدودي جراكل كلها 250 لتر ماء يعني 250 كلغ مع خيمة البيرق ولا خيمة القاضي عمود القديمه مع غرضان وعزب وهرفي قالوا الله يرحم والديك هذا مهوب تحميل ركب وحده تكفيك وفعلا ركبت وحده بعد ما رفته من قدام بالطريقه اللي قلته لك عن طريق البلزط حدر الموتر:
قبل تزويد سسته كان ينزل من ورى بحدود فرق 12 سم عن قدام اذا حملت عليه
بعد التزويد صار بدون تحميل مرتفع من ورى 4 سم عن قدام واذا حملت عليه يتساوى وارتاحت الحمدلله
والموتر ما تغير ابدا من ناحيه السلاسه (حلوه السلاسه) والتوازن والعزم مافرق بالرغم من انه ارتفع وارتفاعه صار حلو يعني مثل ماقلت لك تشوفه تقول متساوي وهو ورى ارفع ب4 سم لكن لو زودت حبتين 100% بيقسلى وبيصير طاير من ورى بحدود 10 سم ويتعب ظهرك
عندك اباعر؟غنم؟عندك عمال تشيلهم؟مقاولات واسمنت..زود حبيتن ويمكن ثلاث بعد..
لكن اذا انت هواوي مثل اخوك يعني المقصد انك اذا حملت غرضان البر والخيمه والما تبيه اذا مره مره يتساوى اهم شي ما ينزل من ورى ركب حبه تعزز لك الموتر وترتاح
(والله من كثر الهرج عندي اتعبتك وانت تقرا) (:

المهم على الطاري ترى انا لما زودت السست غيرت مساعدات الخلفيه شلت حقت الوكاله وركبت مورنو السود كلفتني على ما اذكر بحدود 500 او 600 الثنتين وبصراحه ممتازه انا قلت تجربه اول عقب باغير اللي قدام

وانا تحت امرك ولا يردك الا المربع اللي حدر اللي مكتوب فيه (اعتمد الرد السريع)

ابو سيف

[هاوي قصيده]

ابو سيف ياهلا ومسهلا فييييييييييييييييييييك ..

والله انك احرجتاني وانا اخوك بالتوضيح ..

وعااادي .. مهناش كثره كلام ..وربي اني مستمتع بالتجارب والنصائح

ومثل ما قلت انا هواوي ..يعني منيب راعي بعارين ..ولا علف ولا مقاول

<<مهندس ههههههههههههه

بس بعض الاحيان نطلع ونحمل وانا اكثر ما يضيق صدري لا حملت الموتر ..ونزل من ورى ..تحس انك راكب كرسيدا

وبخصوص المساعدات الخلفيه انا مغيرها قبل شهر مركب جبريلين البيضا ..

هل هي زينه ..

يعني بس اركب السست ..

وما نبعد عن شورك طال عمرك