مقناص موصوف

[راعي الطويلة]

كافة الأخوة الأعزاء بمنتدى مكشات الغالي ...

المشرفين والأعضاء

سنة من السنين طلعنا مقناص ما زال محفور في الذاكرة لجماله وذكرياته الجميلة اللي ما تنسى ، كان الكلام هذا عام 1419هـ يعني قريب ( من خمس سنين ) كنا ثمانية أشخاص مقسمين على خمس مواتر ( 2 لاند كروزر+ 1 بترول نيسان + 2 شاص ) المهم كانت وجهتنا جنوب وكان هدفنا الغزلان + الوبار مشينا بعد صلاة الظهر وتوكلنا على الله وبعد ما قطعنا مسافة الرحلة (265 كيلو) وصلنا قبل المغرب بساعة نظراً لأن جزء من الطريق كان شديد الوعورة ( محجر) بعد ما وصلنا أخترنا المكان اللي بنمرح فيه ثمً كلً ومهمته اللي محددة من الأمير ( والله ياهو كان قاسي علينا ) بعد ما نصبنا الخيام ونزلنا قضنا شبينا النار وتقهوينا وركبنا عشانا اللي ماخذينه معنا من البلد ، صلينا مغرب وعشاء وراح واحداً منا جاب حليب خلفات ( جوازي ) ..
المهم بعد ما تعشينا اللي يبى ينام واللي مسامر ..............
جاء الصبح صلينا وكل واحد دور دربه وجلس خوياً لنا عند المخيم وعلى الساعة عشر عودنا والعود احمد ..
الحصيلة غزالين + 4 وبار المهم لا تقل الأ أنا بتلنا طرايدنا وركبنا الغداء وعقب الصلاة تغدينا وقيلنا وبعد العصر جلسنا نسولف وكل واحد قال وش صار معه وكيف صاد صيدته وقمنا نعس الديرة ونتمشى وكان يومها الربيع ما يوصف .............
تعشينا اللي بقى بعد غدانا وجلسنا نتسامر وطلبوا الربع قصيدة وكانت الأجواء مناسبة لعشر قصائد مو بس واحدة ....

قلت لهم قصيدة

وثاني يوم كان مقناصنا أفضل بحمد الله وصدنا خمس غزلان ( جاء دور الثلاجات ) المهم ربعنا كلهم شروى ولا عليكم زود قضينا خمسة أيام ما تنسى كل يوم ابرك من اللي قبله.... صدنا خير وأنبسطنا ونسينا المدن لا بارك الله فيها .........

كانت الحصيلة الكلية

9 غزلان
13 وبر
38 حجلة (جوني)


المهم ما ودي أطولها بعد كل هذا التطويل ...
اليكم القصيدة

[poet font="Simplified Arabic,5,darkblue,bold,normal" bkcolor="transparent" bkimage="backgrounds/16.gif" border="groove,10,indigo" type=2 line=200% align=center use=ex length=0 char="" num="0,black" filter=" dropshadow(color=burlywood,offx=4,offy=4) shadow(color=burlywood,direction=135) glow(color=burlywood,strength=5)"]
بـديت بأسم الله علـيم الخفـايـا=اللي خلق كونه من الكاف والنـون
متكـفلاً بـأرزاق جمـع الـبرايـا=متعلـياً والناس لأجـله يصـلـون
يا بخت من يمـسي سليم النوايــا=مستغفراً من كايد الذنب والهــون
ومـن عقـب ذا يا مبعدين الغزايـا=داراً وطـوه00 ودار لأجـله يشـدون
الأبـة اللـي مـا تـهاب الرزايـا=مـلاذ منهو يشتـكي يطلب العـون
أصحاب طاروقـاً جميـل الحـلايـا=مــنزه عالنقـص وافي ومــؤزون
شبـابة الضــوء جـالبين السرايـا=اللي على شُبة هـل الضـوء يلَفـون
من شانكم سطـرت زيـن التحـايـا=ودي بصحبتكـم ولو كنـت مطعون
اللـه يجنـبكــم جميـع البـلايـا=ويصون ممشاكم عــن النقص والهون
لا زانت الـجلسة00 وذيـك الـرؤايا=والـبن مركـي بين جمـراً وكـانون
والسالفـة دارت00 وفيهـا بقـايــا=والشمس مـالت00 ثم قاموا يصلــون
والنـجر يرزم00 والرعـايـا هـوايـا=هــاذاك به قلـبي مـعلق ومفتـون
والصـيد لـه قنـاصة بالثنــــــايــا=عـلى الشلش وعلى الـمراكيز يرمون
والطـير ذايـر والوبـارى حـرايـا=ترجي متى اصحاب البـنادق يشدون
والليل خيـم والكـواكب ضـوايـا=واكثر نجـوم الليل قامـوا يهلــون
هـذاك مطـلوبي وغايـة منـايــا=واشـريه لو دلالـته لـه يبيعــون
وختامها صـلوا عـداد النشايـــا=وعـداد حجاجـاً بمـكة يطـوفون
على شفيع النــاس سـيد البرايــا=عـداد غيث هــل من صافي إمزون
******
راعي الطويلة

[/poet]
طلب أخير لأخوي راعي مرات .. عاد الله الله تكفى زينها.

وسلامتكم جميع


أخوكم

راعي الطويلة

[راعي مرات]

الغالي000 راعي الطويله00

صدقني أنني00وقفت متحيراً00بماذا أرد وبماذا أعلق000خشيت ألا أعطي هذه المشاركة حقها000

أخي راعي الطويله000لا تتصور سعادتي00عندما أقرأ وأرى مشاركة ( خاصة) أي كتبها العضو نفسه00أكون في أوج نشوتي000أتمعنها وأتفحصها وأتلذذ بكل حرف00فهي عبارة عن درة جميلة أهديت إليك00
لأنها جهد فكر000ونبضات مشاعر000ليس لها لدينا إلا كل تقدير00ونقف إحتراماً لجهده00

وما بالك إذا كان يصاحبها قصة جميلة مثل قصتك00وعلوم غانمة000

أخي راعي الطويلة000وربي00أبدعت000وأنت راعي الطويلة والعلوم الزينة00

ووصلت وما قصرت000لن أفيك حقك000

تسلم00يدوم عزك00وننتظر القادم من كرمك0000

[راعي الطويلة]

مشرفنا الغالي

راعي مرات

الله يعطيك العافية ... ما بغيت أعرف مشاركتي ( وش ذا الزين ) الله يحفظك وعسى نوفيك حقك ... تراي ثقلت عليك يالغالي بس العشم فيك أكبر .

ما أقول الأ عسى بميزان حسناتك .


أخوك

راعي الطويلة

[راعي مرات]

الغالي000

كم لنا من راعي الطويله000واحد بس00

حاضرين وممنونين000والله يكثر من أجناسك00

شف أخي000أسعد ما يسعدني00إذا شفت القصيدة من نضم الشخص نفسه00

يعني ماهو ناقلها من منتدى ثاني 00صحيح بعض القصائد لابد طرحها من باب تساؤل أحد الأعضاء عنها000لكن لا نحبذ أن تطغى على المشاركات الخاصة00

لذا00إذا كانت مشاركة خاصة00لو تطلب مني أكتبها بدمي كتبتها00

وتسلم00وننتظر مشاركتك00أيها الجزل00

[الفهد]

اخوى راعى الطويلة
واللة انك ابدعت بنظم قصيدتك الجزلة الوافية
وشكور ولاتحرمنا من غيرها وفالك الصيد انشأللة

[المسفهل]

أخي راعي الطويلة ما تمتعت بشيء تمتعي بهذه القصيدة الشيقة التي تتسم

بالسرد الجميل والتصويرالدقيق .. ثم تتوج هذه القصة التي رسمت بريشة

فنان بقصيدة حوت من المعاني أجملها ومن الألفاظ أجودها .. نعمنا بكل هذا

وتمتعنا بهذه الرحلة وكأننا من أفردها فعشنا أحداثها وتصورنا وقائعها ...

فلك الشكر كل الشكر على هذه الهدية الثمينة والتحففة الجميلة التي أتحفتنا بها ..

مع الاعتذار من التقصير لأن مشرفنا العزيز ما ترك قولا لقائل ...

[راعي الطويلة]

أخوي الفهد

الله يسلمك .. وشكراً على مرورك وكلامك الطيب ..........

ــــــــــــــــــــــــــــــــــــــــــــــــــ ــــــــــــــــــــــــــــــــــــــــــــــــــ ــــــــــــــــ

أخوي المسفهل

مرورك ذهبي وتسلم على كل الكلام الزين اللي مثل نقش الذهب .

عساكم عالقوة


أخوكم

راعي الطويلة