نحتاج إلى خبرتك وتجربتك فلا تبخل

[شاص]

السلام عليكم ورحمة الله وبركاته .. حياكم الله ياجماعة ..
عندي سلمكم الله سفاري وأبي أشتغل به شوي وودي الله لايهينكم تدلوني على ورش جيدة كل في تخصصه

أولا: ودي أرفع الموتر شوي لأني أحس إن خشمه طايح والظاهر أنه من كثر تسحيب خلق الله - كلش على أجره- أبي ورشة جيدة بالترفيع.

ثانياً: أبي أغير أبر الكربليتر عشان تقل الصرفية وأبي واحد يضبط تصفية المكينة ووزن الكربليتر.

ثالثاُ : ودي أركب هدرز وحنفية وأبي أركب دبة عشان الصوت من اللي بيسويهن لي مضبوط؟.

رابعاً: الموتر به رجة خفيفة غيرت جلد وكبست الأذرعة ورصصت أرضي ومازال به شي بسيط من اللي عنده دواها؟.

فالمطلوب ورش متخصصة ومجربة بالرياض في كل شغلة من الشغلات السابقة شكرا لكم جميعاً .. ودمتم سالمين

[صقر]

اخي شاص

السلام عليكم ورحمة الله وبركاته

بالنسبة لترفيع الموتر يوجد ما يسمى بالــ (كعكات) وهذه عبارة عن غطاء من الالومنيوم مصنوع محليا يلبس فوق اليايات ويرفع الموتر من الامام ومن الخلف وسعرها مع التركيب تكلف حوالى 200 ريال وهي موجودة في بريدة اما الرياض فلا علم لي.

بالنسبة للرجة الباترول مشاكله مع الرجة ما تنتهي لكن انا اشوف الشباب يركبون مساعد خاص للأذرعة يقلل من الرجة بشكل كبير

اما الباقي فدونك الشباب كل في تخصصه.

وتقبل تحياتي.

[أبوسليمان]

أخوي

حبيت أنصحك بعدم تركيب الهدرز
لأنه بيعدملك الموتر عدام

وأهم البلاوي الي يسببه الهدرز:
1: تتوسع بساتم المكينه مرره.
2: يصرف صرف مهب طبيعي يعني كل دعسه بلتر

تحياتي
أبوسليمان

[شاص]

الأخوة الأكارم صقر وأبو سليمان .. مشكورين على المشاركة وإبداء الرأي والنصيحة ما قصرتوا بيض الله وجيهكم .. وبانتظار المزيد من أعضاء مكشات

[شاص]

وينكم يأهل المكاشيت؟؟؟؟ مهيب الهقوة فيكم؟؟؟؟نبي آرائكم تكفون

[al-nashmi]

[QUOTE]الرسالة الأصلية كتبت بواسطة شاص
[B]السلام عليكم ورحمة الله وبركاته .. حياكم الله ياجماعة ..
عندي سلمكم الله سفاري وأبي أشتغل به شوي وودي الله لايهينكم تدلوني على ورش جيدة كل في تخصصه


ثانياً: أبي أغير أبر الكربليتر عشان تقل الصرفية وأبي واحد يضبط تصفية المكينة ووزن الكربليتر.

اخونا شاص:
بالنسبه لأسوالك الثاني انا ارشح لك ورشه بصناعيه الرياض القديمه
اسمها ورشه النيلين متخصصه في تصفيه السيارات اليابانيه وخاصه الجيوب

المشرف على الورشه سوداني اسمه عوض ويفضل ان يكون هو من يقوم تصفيه السياره اي يشتغلك بيده
لانه هو افضلهم.


رقم تلفون الورشه 014461851

ارجوا ان اكون افدتك حول سؤالك.

وتقبل تحياتي

[شاص]

تسلم والله يالـ al-nashmi بيض الله وجهك وما قصرت والصراحة أني من زمان وأنا أدور ولا طحت بواحد مضبوط...جزاك الله خير

[al-nashmi]

حياك الله يخوي شاص.....

وما سويت الا الواجب... ولا شكر على واجب.

وللمعلوميه ترى هذه الورشه مزحومه جدا ومن الافضل ان تحجز عندهم مسبقا بالاتصال عليهم وتروح لهم
بدري الساعه 7 صباحا


وتقبل تحياتي