ساعدوني بلاني الله بباثفايندر

[sall]

السلام عليكم

عندي مشكله بالباثفندر حقي 2003 الي هي:

ودي اغير الزيوت القير والدبل والدفرنس

أصوات في الدفع الامامي مدري هي العكس ولا الفليور ولا الدودة والله مدري

فيه غرغرة بالمكينة تضيق الصدر تراني استعمل 95 بانزين.

والمكيف احياناً يطلع ريحة كهرب

غيرت السيور وصار يطلع صوت صفير مزززززززززعج شديتهن ولا فاد

بعدين احياناً يطلع صوت ترترة مع الدعسة واذا زودت الدعسة يزيد الصوت ومو دايم

والله احترت مادري وش اسوي لا ورشة تفهم للباثفندر والوكالة زحمة وغالين 800 ريال تكلفة الفحص لا وبعد اسبوعين.

تكفون ساعدوني والله اني محتار ومدري وش اسوي حتى بديت اكره السيارة اصلاً من زمان وانا ما اداني السيارة
وش رايكم ساعدوني

[أبويوسف]

عندك خير وعندنا خير ....... وكان الله في عون الجميع .

[اكس ابرس]

الله يعينك بس وشي ريحت الكهرب ما عمري شميته ؟؟؟؟

[هاوي الباث]

السلام عليكم

عندي مشكله بالباثفندر حقي 2003 الي هي:

ودي اغير الزيوت القير والدبل والدفرنس

أصوات في الدفع الامامي مدري هي العكس ولا الفليور ولا الدودة والله مدري

فيه غرغرة بالمكينة تضيق الصدر تراني استعمل 95 بانزين.

والمكيف احياناً يطلع ريحة كهرب

غيرت السيور وصار يطلع صوت صفير مزززززززززعج شديتهن ولا فاد

بعدين احياناً يطلع صوت ترترة مع الدعسة واذا زودت الدعسة يزيد الصوت ومو دايم

والله احترت مادري وش اسوي لا ورشة تفهم للباثفندر والوكالة زحمة وغالين 800 ريال تكلفة الفحص لا وبعد اسبوعين.

تكفون ساعدوني والله اني محتار ومدري وش اسوي حتى بديت اكره السيارة اصلاً من زمان وانا ما اداني السيارة
وش رايكم ساعدوني

مرحبا

ليه الله بلاك......قل الله انعم عليّ

زيت القير غيره وحط زيت حق تايوتا......ويتغير عند اي ورشه
وزيت الدبل والدفرنس حط زيت رقمه 140 أو 120 (ماني متأكد مره)ويتغير عند اي ورشه
الصوت اللي في الدفع الامامي يمكن جلد عمود التوازن....ولا تنسى تشحيم عمود الدبل
صوت السير.....شحّم بكرة المروحه اللي طالعه من المكينه.....يتشحم عند اي مشحمه
غرغرة المكينه...اذا كنت تستعمل بنزين 91 ثم رجعت استعملت 95 يبيلك تمشي 5000 بعدين يروح الصوت
واذا من الاول وانت تستعمل 95 ....يبيلك تصفية مكينه ومعها غير صفاية البنزين
ريحة الكهرب ما أدري وش تقصد لكن يمكن فيه وصخ ناشب داخل في الكبوت واذا شغلت المكيف سحب لك الريحه
والترتره ما أدري وش تقصد....لكن اذا قصدك تفته شيك على البواجي والكويلات والبخاخات

وأي استفسار ثاني أنا حاااااااااااااااااااااااااضر

[عاشق الكنود_]

حرام عليك الله بلاك بالعكس يكفيك انه يابانيه
وسياره مايحتاج
وما قصر اخوي هاوي

[.أبوعبدالرحمن]

الله يعينك


وييسر امرك

اصبر وتحمل لابد ان الموتر يخرب وما فيه موتر ما يخرب

[sall]

جزاكم الله خير وما قصرتوا
بس ودي أسأل تخبرون لي ورشة يفهمون للباثفايندر ما ودي ادخله عند حضرمي يلعب به
تراني بالرياض
اخوي هاوي الترترة الي اقصد تطلع من عند الطبلون بس من داخل اذا كرشت على الموتر على مزاجه مره يطلع مره لا

وش رايكم اركب يايات استرالية امامية ترفع الموتر

[sall]

نسيت ابي اسويله فحص كامل من إلى وين بس غير الوكالة
واحد يفهم مو مثل بعض المراكز تحس انه نصاب

[ق ص ك]

الريحه يمكن تكون من مفتاح الاضواء ولا مفتاح المساحات يكون بها التماس والله يكون بعونك

[قناص الوعول]

اذا طابت النفس من السياره بعها وريح بالك واشتر سياره جديده

[هاوي الباث]

بالنسبه لليايات الاستراليه ممتازه مرررررررررررررررهـ

وبصراحه مافهمت قصدك بترتره الى الان

واذا ورشه زينه بصراحه مافيه ورشه معينه براسها كل ورشه ولها شغلها

لكن انا بالرياض......راسلني على الخاص وابشر بسعدك

إن شاء الله اخليك تقول لو يسام موتري بـ10000000 مابعته.....ههههههههههههههههههههه

تحياتي

[Abo Nader]

أخوي بالنسبة لترترة هذي الهواية العلوية الي يطلع منها الهوا..حط منديل بينها وبين الطبلون و ريح عمرك..يوم كان موتري على الضمان زينتها علية لكن الحين أبد حط منديل أو كرتون و بس...

[باترول 585]

السلام عليكم,,
اخوي ترا من الطبيعي ان السياره تخرب وانت لك اربع سنين شاري السياره...

وانتم ياراعين الباثفندرات هاذي مشكلتكم ماشوه سمعة سياراتكم الا انتم ولا والله العظيم ان اي سيارة تخرب وتجيه مشاكل نفس ما تجي الباث ورح للوكالات والورشات وشوف الهوايل
بس تلقا الواحد يزين سيارتة بكل خفا وكذا الناس يقولون السياره ذي ماتخرب ولا يجيه شي..

واسف على اطالة الكلام

تقبلوا مروري؟...

[sall]

اخوي هاوي الباث جزاك الله الف خير وماتقصر
مشاركاتي شويه ما اقدر ارسل لك رسالة خاصة
بس ودي اسألك عن الورش ابي ورشة اسم او موقع
اقعد ادور بالصناعية كل ما وقفت عند ورشة احس انهم ما هم فاهمين جزاك الله خير
دلني الله لا يهينك على واحد ولا على ورشه اهم شي عندي القسم الامامي الدبل والعكس والفليور والكلتشهذي كله ابي افحصها واصلحها واذا عندك خبرة عن الاسعار لا تبخل علينا خايف ينلعب علي

وما تقصر الله لا يحرمك الاجر والله انه مضيق صدري

[الكايف2]

اخوي saiiحياك الله تراي مثلك مليت غيرت كل شي ولاراحت القربعه لعل اخوناهاوي باث يرد علينا ويسوي فيناخيرارسلت له علي الخاص ولابعد ردعلي