ياجماعة الخير أبي أسألكم عن الفورتونر 4 سلندر

[ابوريناد1979]

السلام عليكم
صبحكم الله بالخير جميعا
ياجماعة حصلت لي فورتونر 4 سلندر تماتيك بدون دبل , وش رايكم فيه للي جرب 4 سلندر ؟
مع العلم اني ماني راعي سرعه ولانيب راعي تطعيس طلعاتي للبر فقط مكشاتيه , يمكن ارقى لي طعيس على خفيف
ومن عنده العلم يفيدنا الله يجزاه خير
وتقبلو تحياتي

[قناص الوعول]

انحش عنه تراه بايخ عزمه مثل عزم الهايلوكس الدفرنسين خذ سته سرندل وتجي مينته v وعزم خيالي على فكره نفس مكينه fj

[.أبوعبدالرحمن]

غريب كلامك فورنتشر بدون دبل !!!!!!

[ابوريناد1979]

انحش عنه تراه بايخ عزمه مثل عزم الهايلوكس الدفرنسين خذ سته سرندل وتجي مينته v وعزم خيالي على فكره نفس مكينه fj

ان كان عزمه مثل الهايلكس ويوصل 190 كويس اخاف انه اردى
طيب عندي سؤال الـ 4سلندر يعيش مثل الـ 6 او بمعنى آخر يمشيك 300 الف بدون توضيب
وآسف على كثرة الأسئله

[ابوريناد1979]

غريب كلامك فورنتشر بدون دبل !!!!!!

اي نعم 2008 لكن ما ادري هل هو نازل من زمان او لا
ينفع للشيبان اللي يطق له جيب ويقعد معه 15 سنه ولاعمره شغل الدبل

[بواسامه]

السلام عليكم

صبحكم الله بالخير جميعا
ياجماعة حصلت لي فورتونر 4 سلندر تماتيك بدون دبل , وش رايكم فيه للي جرب 4 سلندر ؟
مع العلم اني ماني راعي سرعه ولانيب راعي تطعيس طلعاتي للبر فقط مكشاتيه , يمكن ارقى لي طعيس على خفيف
ومن عنده العلم يفيدنا الله يجزاه خير

وتقبلو تحياتي

تعجبني ياشيخ
انت ادرى بحاجتك
ومادام هذا علمك فلا تتعداه
خوش موتر ومناسب
اللهم انك بتورط به ان جيت تبيع لانه بيصير غير مرغوب فيه لانه موب دبل واربعة سرندل
فنصيحتي خذ دبل لو مالك حاجه ولكن للمستقبل في البيع ولحاجتك الخفيفه على كلامك
موفق واستخر والله يدلك

[تنوم]

نصيحتي لك الاخويه لا تاخذ 4 سرندل لانك اذا جيت بتسافر يمكن تستاجر سياره ثانيه فهو لا ينفع لا طبخ ولا شوي اسمع كلام اخوك وبدون دبل بعد الله يهديك هج عنه بس واشتر تبيع فلوسك ماتضيع

[الدحبول]

ان كان عزمه مثل الهايلكس ويوصل 190 كويس اخاف انه اردى

طيب عندي سؤال الـ 4سلندر يعيش مثل الـ 6 او بمعنى آخر يمشيك 300 الف بدون توضيب

وآسف على كثرة الأسئله

يا أخي التوضيب مهوب على المشى وانما عن طريق الاستخدام
كان عندي هيلوكس 94 ماشي فوق 300 الاف مكينة وكالة مافتحت
مثل فرود ولومينات و جيوب ربع المرور والشرطة لا تستغرب تتوضب كل 4 سنوات إلى 5 سنوات
سبب
1) استخدام سيء
2) مافي صيانة

انصحك ب 6 عزمة ممتاز
والدبل لانه وقت البيع اطلق

تحياتي

[العا صي]

نصيحه لا تشتريه لو بريال وش الفايده لا دبل و4 سلندر وليش تشتري جيب اجل اخوي مهما كنت منت راعي بر او رمال او غيره ماعنك وعن الدبل باذن الله ينفعك في مواقف انت ماتدري عنها او تتوقعها بعدين لابغيت توسع الخاطر على طعس تستاهل دبل

[LOGAMALOGA]

السلام عليكم

صبحكم الله بالخير جميعا
ياجماعة حصلت لي فورتونر 4 سلندر تماتيك بدون دبل , وش رايكم فيه للي جرب 4 سلندر ؟
مع العلم اني ماني راعي سرعه ولانيب راعي تطعيس طلعاتي للبر فقط مكشاتيه , يمكن ارقى لي طعيس على خفيف
ومن عنده العلم يفيدنا الله يجزاه خير

وتقبلو تحياتي

السلام عليكم ابو ريناد

كلامك سليم

هذا الفورتشنر ما نزل إلا في 2008 على حدّ علمي

واذا تبي الشور خذ ال 6 سلندر أفضل

أو غير للباثفايندر الجديد أقل فئة

6 سلندر أقوى من البرادو عزمه 290 وأوسع من الفورتشنر ومراتبه الخلفية تسدح وتحط عفشك عليها بدون ما تطويهن أو تشيلهن مثل الفورتشنر والبرادو
والله يعطيك من خيره ويكفيك شره مقدماً

[الربذي]

تراه ثقيل شوي ومطبه قاسي مره ابد كانك تسوق هيلكس دفرنسين وقيمته جديد بكرنونه 69الف بدون دبل 2*4 وانت وفلوسك اذا تبي جديد وانت انسان هادي ولانت حار وتوكل على وخذة

[خادم الإسلام]

لا والله لا تاخذه وهج عنه هذا هو 4 سلندر مع احد الأخوان ودبل والله سيء فوق ماتتصور لا في خط ولا في بر .

حتى هو يحذر الأخوان يقول لا حد ياخذه تراني ورطت .وإن بغيت جواله راسلني على الخاص

[التسعاوي]

ويشرب بنزين ولا هو راسي بالخط

[بدوي جنوبي]

تراه ثقيل شوي ومطبه قاسي مره ابد كانك تسوق هيلكس دفرنسين وقيمته جديد بكرنونه 69الف بدون دبل 2*4 وانت وفلوسك اذا تبي جديد وانت انسان هادي ولانت حار وتوكل على وخذة

انا معك بكلام الاخ الربذي
يا اخوان الاخ يقول مو راعي بر طلعات فقط
صدقني 4 سلندر يناسبك واقتصادي في الزيت والبنزين
استخر ربك وتوكل علي الله

تحياتي

[مغلي]

مدام قيمته 70 الف زدها 10 وخذلك يوكن فضي 2005 دبل = سفر وبر وطعوس ومنظر وسعه 9 ركاب == هذا رأيي == لو كنت مكانك آخذ يوكن == اما 4 سلندر (غلطة العمر) فلا والف لا