( رفيقي السكران ) مع الأمير بالصمان

[حفرلوجيا]

سلام يالربع كل(ن) باسمه
دخلت البارح مجلس أحدالأصحاب جامع الشلة على عشاء .. جيت متأخر ولقيت واحد من الربع من ثلاث سنين ماشفته .. نسميه .. البشه .. ( واللقب يتحدث عن نفسه مايحتاج أشرح لكم ) .. ضحك لي وفز يسلم البشه ( هالنسخة المطورة من الدلخ ) .. ويقول لي : هلا ياأبو فلان يارفيق السكران ها .. ها.. ها ( ويضحك هالبشه ) .
بيني وبينكم انا مثل اللي انصفق على وجهه .. وأتلفت .. أشوى اللي بالمجلس كلهم يعرفوني .. وقطع السالفه عند دخلة الشايب ( أبو معزبنا ) وهو يقلطنا على العشاء .. وويني ووين العشاء .. وش هالسكران اللي يقصده .. أخبر ربعي كلهم مالهم بهالعلوم الشينة .. تعشوا الربع .. زادكم الله .. أكرمكم الله .. وأنا بيني وبين نفسي أقول حسبي الله عليك .. أويلاه لو يطلع الشايب وأنفرد بها( الدلخ ) وأوكله هواء .. جلسنا بعد العشاء .. وجاء الفرج .. تنهض الشايب يبي يسري .. ويتلقف البشة يقول للشايب : اصبر ياأبو فلان خل (.... يقصدني > حفرلوجيا ) يعلمك بسالفة رفيقه السكران ..
أنا خربت معي وأنطلقت مثل أم خمس ( ماتستحي يالبشة .. متى خبرتني وربعي سكارى .. وتكذب علنا وقدام هالشايب .. وقلة احترام للمجلس .. ) وعند الفشقة الخامسة ( انا حتى الآن أم خمس ) وتوي أبلقطه طيار .. وإلا يوم تغيرت ملامح وجهه .. وقال : اصبر .. اصبر .. أنا أقصد السكران اللي جانا ( بحاصبيات الصمان قبل ثلاث سنين ) ..
هو بس قال الكلمات الاخيرة ومثل اللي ضربني بمرزبة(ن) على راسي .. صح رفيقي السكران اللي بالصمان .. إيه ذكرت ..
عاد أنا وقتها تفشلت من ( البشه ) وأعتذر له .. واشوى قام الشايب وتفرقنا .. وما قلت السالفة لهم من الفشلة عقب هالزعل والنكد ..
عاد ابقول لكم السالفة اللي تضيق صدورنا ياراعين الكشتات.. بس ترى الاتصال ضعيف الأن .. ارجع لكم ( إضافة رد ) .. وألصق لكم باقي الموضوع ..

[حفرلوجيا]

أسف لإنقطاع الإتصال .. لكن خوذوا

السالفة قبل ثلاث سنين أو أكثر خيمنا شلة بالحاصبيات بالصمان ( أكيد تعرفونه ) .. وكنا مختارين فيضة صادة يقولون له ( أم الحصن ) وأول ماجيناها الضحى .. وإلى تقول ماوطاها بشر من عشر سنين .. مافيها أثر لمخلفات البشر .. وتونا بالعقرب الثانية كل شي يفتح النفس.. ولا حولنا أحد .. صار بطرف الفيضة مخيمنا ..

ويوم جاء مسيان وتطب علينا شلقة سيارات ويخيمون بالطرف الأخر .. ماعلينا .. الوضع عادي إلى الأن ..
بعد العشاء وقبل النوم .. ويطب علينا وحنا جالسين بالخيمة رجال معه مقرصة خبز وبدون سلام أو أحم أو دستور : يرفع المقرصة ويقول لنا : ( خوذوا ترى خويياي مضيعين هالمقرصة لاتقولون ماقلت لكم ) .. عمى قربت لـ(هالرجال) والا الريحة تعطعط خمر .. ( أهبوا ياخوياه اللي مضيعين المقرصة!!!)

( لحول ) وش جابه ذا.. عاد ترى أميرنا بهالكشتة حار .. ( اذا تكفرنت معه بهالحالة لو قلت له مسيك بالخير صكك مخمس .. ولو طيرت عيونك من هول الصدمة شاتك برجله وان تهورت وقلت : ليش .. توطاك بالسيارة ) .. على هالخلفيه ( الأكشن ).. قام الأمير ناصي السكران .. تلقفت أنا ومسكت السكران بيده ( اللي به المقرصة الضايعة ) .. وقلت خله هذا رفيقي .. مادري وشلون طلعت مني .. يمكن على شان هيئته ومظهره اللي يوحي إنه ماهو راعي هالحاجات ( المشكى لله ) ....

وجريت السكران برا الخيمة ( ترى الضعيف يمكن اللي جابه ريحة النار يبي الدفى وإلا أكيد ماهو دال(ن) شي ) .. لكنه يوم طلع ويلفحه الهواء مرة(ن) ثانية و( يتدحوس ) .. وصار لك سكران ثلاثي الأبعاد .. وأخذته اقديه هو ( والمقرصه ) لمخيمهم وبالطريق ( يهذري بثقة ) يقول تراني سكران أعجبك وأسمع الكلام !! ( كوبان عرف روحه ) ..

قربته مخيمهم وحذرته ان خوياي ماراح يخلون به ( مبط ابرة ) سالم ان تهور ورجع .. طمنت خوياي .. وشوي وهالسكران داخل(ن) علينا وأيضا لا سلام ويغز المقرصة ويقول : ترى خوياي مامعهم طحين خوذوا المقرصة انتم اقرصوا به .. ( أجعل ام جنيب اللي تقرصك ) .. عاد المرة ذي قام الأمير .. وطاخ .. طراق ( صفرت آذاني اللحين يوم تذكرت ) ..
أشوى تقل بغى يصحي وأجره برا الخيمة وهو يلجلج يقول لي : قال دوك خير قال مامعي مخبات ماتبون المقرصة .. ( سكران كريم ) .. وأشوى طس ..
لكن أقل من نص ساعة يوم اشتعلت السماء .. شروخ وطراطيع شمس على صواريخ ( كل بضاعة أم سعد من الطراطيع اللي بسوق الحمام بالرياض نشوفه بأم الحصن) ..
انالله وإنا اليه راجعون .. عاد اللحين وقت النوم .. وعلى هالحالة ساعة او أزود ( بس كانت فرجه لبعضنا ) .. وهجدت الحرب ..

وشوي ويبدا لك هالشعالي بلبة السماء .. عاد رح حلها اللحين سكارى ورشاشات ( ان مافطست صويب) .. وعلى أعصابنا .. وأشوى بنص الليل ارتحنا يوم جاهم فترة استرخاء كانت عبارة عن فاصل يدهرون به بالسامري ( شر أهون من شر) ..

ونقعد إلى قريب الفجر على هالسامري .. وإذا شالوا : لاتحسب اني داله عنك ناسيك .. ( قلت أنا بس يجيك رفيقي السكران هو ومقرصته )

وإذا شالوا : حيا الله اللي يغيب ويسرع الرده ( قلت بس اللحين يستنزل سكران بالرشاش مرة(ن) ثانية ..

ويشيلون : البارحة يوم العباد رقود والنوم مايطري على بالي ( طيب خلونا عيال اليلة ذي نبي ننام )...

ماطول عليكم .. صارت ليلة غثاء بالبر ماشفت مثلها .. وبعض خويانا كرهوا البر بعدها ..
جاء الصبح وقالو العقال منا شدينا .. واللي يقهرني نشد .. ومخيم هالسكارى حول الظهر تقل مقبرة مافيه حي ينغش ..
عاد ذي تعقل ياناس .. هالسوات تحصل بالبر وأنت رايح تدور الراحة ؟؟!!!!..
وسلامتكم ..

[صقر]

بارك الله فيك اخوي حفرولوجيا

والله اني قاعد انتظر الرد على احرمن الجمر ابقرا قصة رفيقك السكران

مشكور اخوي وما قـرّصت اقصد ما قصرت.

[عبدالعزيز الدباسي]

هههههههههههههههههه

اجل خويك يوم لفحه الهواء تدوحس ههههههههههههه اجل وش يسوي اذا نفخته هواء

وصار ثلاثي الابعاد وبديت ( اتقديه ) ههههههه اتخيل شكلك وهو ( متعنقط ) بثوبك

وبعدين والله انكم قشران الحين الواحد يقولكم دوكم المقرصة وتطردونه ، هذا يا بعد حيي هو اللي لازم تقهويه ، لكن المشكلة ماعندكم القهوة اللي هو يبي ، صدق معه حق يومنه يلجلج يقولكم : قال دوك خير قال مامعي مخبات ماتبون .

-------------
تسلم يالغالي على هالمشاركة اللي كلها ملح ، ،

[فرد حمزة]

هههه

أنا داخلن الموضوع وأنا متلطم

قلت أفى . . . حفرلوجيا له خويا دشير وسكارى

أشوى أثر السالفة صداقه توصيل من مخيمكم لمخيم الخبل

الجنط هالسكير ماسكة معه على المقررصه

[المتهادي]

بارك الله فيك ..........................

ســــــــــــالفه طريفه ...بس يبي لها طلعت بر ......عشــــان تحلى الجلســــه ....ولا وش رايك ؟؟

[ميراج]

الاخ حفرولوجيا الله يعطيك العافيه

والله ماعند اميركم وقت ذا الحين سكران ومعه رشاش ويقاشره اميركم والله اقشر

زين ما راح للمخيم وحط المقرصه عند اخوياه وجاب الكلاش وشرب له زود طاسة خمر وجاكم فى الخيمه

يتفاهم مع اميركم

قصه رائعه خوش طلعه

تقبل تحيات اخوك ابو طارق

[نقا هشال]

يعطيك العافيه

سالفه تفطس من الضحك

الله يعافيهم ولايبلانا

[al-nashmi]

الرسالة الأصلية كتبت بواسطة ميراج

الاخ حفرولوجيا الله يعطيك العافيه

والله ماعند اميركم وقت ذا الحين سكران ومعه رشاش ويقاشره اميركم والله اقشر

زين ما راح للمخيم وحط المقرصه عند اخوياه وجاب الكلاش وشرب له زود طاسة خمر وجاكم فى الخيمه

يتفاهم مع اميركم

قصه رائعه خوش طلعه

تقبل تحيات اخوك ابو طارق

مشكور اخونا حفر لوجيا على هالقصه المضحكه........



اخونا ميراج..... اعجبني واضحكني ردك

[مريقب العيفار]

أخوي حفرلوجيا شكرا على هالقصة الطريفة

بس الصراحة اني ما قدرت اربط بين العنوان والسالفة

أقصد ما قدرت افهم من القصة ان رفيقك امير

ما عليش سامحني على هالبلادة

أخوك مريقب العيفار

[((( الحر)))]

اخوي حفرلوجيا....هالسلفه مهيب غريبه علي قد سمعتها قبل مده.
لذلك هي حاجتين مالهن ثالثه..>
1- اني اعرفك وسبق انك قصيت هالسالفه علي بمجلس او استراحه.
2- اني اعرف احد اخوياك بهالكشته وقص علينا هالسلفه بمجلس او استراحه.
تحياتي
اخوك ((( الحر)))

[حفرلوجيا]

الاخوان صقر .. شقردي .. المتهادي .. ميراج .. نقا هشال .. al-nashmi .. شكرا على تمليحكم للموضوع.

والله يردك سالم ياأخوي فرد حمزة..

أخوي مريقب العيفار .. شكرا بس ( الأمير ) اللي نتقصده أمير الكشته ( أكبرنا) اللي ماهو يعطي شرهة .. بس ( ينفخ )..

أخوي الحر .. شكرا .. ويشرفني والله ويشرف ربعي يوم يلتقون بك .. لكن أظن هالسالفة تمر على بعضنا من كثر( الحونش ) اللي مفسدين على غيرهم بالبر ويحسبون انهم لاطلعوا ( أحرار ) يسوون مابدى لهم من العلوم الردية..

[desprado]

قصة حلوه

الله يستر لا تصير لنا

[حفرلوجيا]

أخوي desperado :
الله يحلي أيامك .. ولايصيرلك مثل هالقصة

[المري]

خوش قصه ياحفرلوجيا


والله عاجبنى هالجملة((((( وتطب علينا شلقة سيارات ))))

شلقة من وين جبتها هالكلمه النادرة..!!!!!!!!!!!!!!!!!!!!


اخوك / المري