نبي منكم ياهل السيارات مواقف عن الاعطال اللي صادفتكم في البر..!!

[الرسن]

نبي منكم ياهل السيارات مواقف عن الاعطال اللي صادفتكم في البر..!!

ياعضاء مكشات نبي منكم مواقف حول اعطال السيارات اللي واجهتكم وانتم في البر بس هاها مانبي العطل وبس نبي العطل وماترتب عليه من تأخير ومشاكل يعني نبي موقف متكامل من جميع النواحي انتم توحون والا لا.
طبعا البعض منا اذا واجهه موقف زي كذا يحتار ومايدري وش يسوي ويمكن العطل بسيط والبعض الاخر متمرس اما بسبب عمله والا دراسته ويتصرف على هالاساس والبعض الاخر يتخذ الاجراء المناسب لعطله في حينه وبعضنا يتفرج واذا صار فيه تغطية جوال اتصل على سطحه طبعا في البر وياما شفت سطحات تشيل سيارات البر خصوصا اللي جايين من الرملة حول محطة الحصان وطريق الخرخير.

بالنسبة لي انا تعرضت لموقف في الدهناء بنشر الكفر على الصفر وكانت سيارتي متسوبيشي 99 وكنت في نقرة بعيد عن الخط تقريبا 7كيلو يوم جيت ابااغير الاستبنة لقيتها مبنشرة ومفتاحها ضائع لأن السيارة كانت سيارة اخوي مستعيرها منه طبعا كنا ثلاثة اشخاص على سيارة وحدة وش الحل يالربع قالو مالك حل الا انك تمشي للزفلت ويفرجها الله المهم مشيت للزفلت بعد جهد جهيد لأن الموتر صار ثقيل في الطلعة من النقرة وطلعنا وعند وصولنا للزفلت لقيت الكفر التيوبليس طالع من الجنط وفيه شق كان صغير وكبر مع مشينا للزفلت وقفنا نؤشر للسيارات وكنا حول الظهر وقف لنا راعي دينا سوداني وتكفل واحد من الشباب يروح بالكفر لحفر العتش وكانت المسافة 50 كيلو المهم راحت الكشتة عشان ذا الكفر. بعد ذا الموقف اخذت درس اني اتفقد الموتر قبل ما اروح عليه حتى لو انه لي كيف عاد لو اني ماخذه من غيري.

يالله يا اعضاء مكشات عطونا مالديكم حتى نستفيد وحياكم الله ومعالسلامة

[الرسن]

لازلنا ننتظر حتى تعم الفائدة

[مساير الليل]

السلام عليكم

قبل كل شي

الله يسلمك مرهـ كنا رايحين لأبها ونازلين مع عقبة شينه الأول والدبل الثقيل

المهم نزلنا وعينا من الله خير يوم جاء قبل المغرب مشينا بنرقاء للأبها فوق

طبعا العقيه ترابيه وغير مسفلته طولها تقريبا 12 كيلو كاني ماني غلطان

وكان وقت مطر ونبي نرقاء قبل مايقواء المطر الأن السياره من الصعب

انها ترقاء وفيه مطر الأن الكفر بيباوش المهم رقينا طبعا طول الرقيه الدبل

الثقيل والأول والثاني تقريبا وجاء أشد مكان في العقبه وشادين العزم ألا

والله ألا الكفر الأمامي يمشي على الجنط ومن الصعب نوقف في الرقيه

وكملنا ومشينا على الجنط ولافيه مكان كلها منحدر يعين يمانقدر نغير الكفر

وقفنا وتفخنا الكفر بميكنه الهواء ومشينا شوي وقفنا مرهـ ثانيه وتفخنا الكفر

وعلى هالحال حتى وصلنا والحمد لله وكان السبب كفرات هانكوك لينه بزياده

ولا الكفرات مركبها قبل مامشي لأبها باربعه أيام

وطبعا الرحلات لاتخلو من المفاجائات وهذا ماعندي


والله يحفظنا

[الرسن]

مساير الليل
شكرا على المشاركة وتسجيل الموقف
معالسلامة

[قناص*07]

12 بنشر في ليله واحده 3 منها والسياره واقفه

[الكونترولCONTROL]

تعطل السلف Self Starter و أن في البر
و أيام دراسة - يعني البر (( خااااااااااااااالي ))
و جلست أبحث عن مكان السلف
(( على شان أدقه بمفتاح العجل - مثل الدددسن - لعله يشتغل ..!! ))
و كان معي VXR توي شاريه - ما دريت ان السلف بوسط راس المكينة
========================

[ابو حسان الجنوبي]

موضوع مفيد وقيم صراحه
العطل الي صار معي الله يسلمك رحت اطعس مره انا وواحد من الشباب وقت مدارس وكان الطعس مابوه احد غيرنا
ومع كثرة الإستهبال طفا الموتر وتفاجئت انها مواصير المبرد حق القير طلعت من مكانها الي بالقير

طبعا الموتر شروكي 2000أوتو وجلست احاول فيها لين ماركبت
وعلى الوكاله اليوم الثاني وشريتها ب385ريال وتركيب بيدي عند البيت

[راعي الجكس]

السلام عليكم @
مره كنا بالعرمه ولا به احد وبنشر الكفر ولا معنا عفريته
المهم حطينا حصاة كبيره تحت الدفرنس وحفرنا تحت الكفر وركبنا استبنتنا ومشينا

[عاشق Vtc 4800]

السلام عليكم ورحمة الله وبركاته

الموقف تقريبا قبل أربع سنين

كنت رايح مع واحد من الشباب معه هيونداي سانتا في

رحنا لروضة خريم المهم وحنا نتمشى حول الروضة

لقينا ناس مخيمين في الجادة الي نمشي فيها

المهم قلنا ماحنا فاضين نرجع خل ندخل يمين الجادة

طبعا كانت المنطقة كلها قشع والموتر نازل يوم تعدينا هالمنطقة

إلا ونسمع صوت كأنك مركب دبة للسيارة

وقفنا ونشوف تحت السيارة لقينا كرسي العمود الي طالع من الدفرنس << مايعرف اسمه

المهم لقينا الكرسي طايح من جهه وحده قمنا رفعنا الموتر على حصاة

وبعدين دخل واحد من الي معنا تحت الموتر وضبط الشغله بأسيام

والحمد لله سلكت الأمور ...


تقبلوا مروري

[مرقاب]

بالنسبه لي طلعت للمحمل وبنشر الكفر قبل حريملاء وبعده توجهت للمجمعه وبرضه بنشر الكفر واصلحته ونمت ذيك الليله في المجمعه وبعد صلاة الفجر توجهت للجندلية بعد الدهناء مااطول عليكم سنتر الموتر عند الارطاويه وقال هذا محلي منب متحرك -وكان الموتر محمل - وحاولت اصلحه هناك مااستطعت ورحلته للرياض ودخلته اربع ورش بالرياض ماعرفوله واحد يقول مخبطة المكينه الخ-تشالنجر والتقوى والجابري- والموتر جمس سنوما مامشى 50 الف كلم المهم واسئل واحد حضرمي اسمه محمد عند ورشة خارج الصناعية بالربوة وقالي هذا مشكلته السير منقطع-سيره يغير كل 40 الف كلم-وهو ماشاف بوصفي للمشكلة عرف وفعلا صارت المشكلة من السير منقطع واصلحته عنده.وبالمناسبه عندما رحلت الموتر للرياض طلعنا على باترول بنفس الليله للدهنا ونمنا بالطريق وبالصبح تعطل الموتر عند دوار حفر العتش وقال هذا محلي منب متحرك يعني رحلة اعطال باعطال والحمدالله على كل حال .واعتذر للاطاله.

[ابوطاقية]

قبل تقريبا 7 سنوات كنت انا وواحد الزملاء بالدهنا ومعنا جمس ونيت انقطع علينا الخرطوش ولامعنا خرطوش
ويرزقنا الله بواحد من الاخوان البدو جزاه الله خير ومعه لصتك ويقوم ويقصه ونربط الخرطوش ونعبي مويه والحمدلله ويتسهل امرنا بمشيئة الله
وعلى فكره الخرطوش جلس مربوط على ها الحاله تقريبا شهر كامل

[هوى الشرق]

اولا : الســــــــــلام عليكم ورحمة الله وبركاته ...
هذي صارت لأحد الزملاء يقول كنت رايح لسوريا من زمان طبعا هو سعودي وماخذ سورية (معلومه اضافية) المهم كان معه مرسيدس موديله بالثمانينات وهو ماسك الخط ارتفعت عليه الحراره (حرارة السيارة !) وهو يوقف بالمحطة ويفحص السيارة كلشي تمام !! ومازالت الحرارة مرتفعه ويجيك ويشيك على الزيت ويلقى طال عمركم الماء مختلط مع الزيت يعني السرندل مشطوب يعني المكينه يبغالها توضييب المهم تذكر انه معه( جملك ) هذا الظاهر يسد التهريبات الصغيره اللي في الرديتر وغيرها مؤقتا ، المهم ويفرغ كم واحد بالرديتر تعرفون الماء ياخذ دوره ويمر على المكينه والسرندل وكل اشوي يصب زيت بالكينه ويخليها تشتغل 15دقيقه ويطفي ويغير الزيت وساها كم مره إلين انظفة المكينه وانسدت الفتحه وكملوا الطريق على انهم اول ماياصلون للسوريا يوضبوا المكينه طبعا وصلوا بالسلامه وجلسوا يوم جت الرجعه والعوده قالوا ماهي لازم انوضب المكينه وارجعوا ووصلو للرياض والمكينه تمام وباعوها وهي على هالحال . آسفين على الاطالة والتعبير لكم عليه

اخوكم هوى الشرق

[الرسن]

للجميع اقول شكرا على تفاعلكم مع الموضوع ونتمنى المزيد فالفائدة عادة ماتكمن في التجارب.

معالسلامة

[الرسن]

12 بنشر في ليله واحده 3 منها والسياره واقفه

ابو فيصل حياك الله
الله يكفينا شر البناشر 12بنشر ياساااتر هاذي عين قطو فيها ليزر تحت الاشعة البنفسجية.
معالسلامة

تعطل السلف Self Starter و أن في البر

و أيام دراسة - يعني البر (( خااااااااااااااالي ))
و جلست أبحث عن مكان السلف
(( على شان أدقه بمفتاح العجل - مثل الدددسن - لعله يشتغل ..!! ))
و كان معي VXR توي شاريه - ما دريت ان السلف بوسط راس المكينة

========================

الكنترول حياك الله واضحه الخبرة مشاءالله الظاهر انك شايب ماظهر فيك شيب الله لايضرك طيب وش سويت بالمشكله يعني حليتها بالسطحه والا وشلون حليتها وانت في طعوس.

معالسلامة

للجميع اقول شكرا على تفاعلكم مع الموضوع ونتمنى المزيد فالفائدة عادة ماتكمن في التجارب.

معالسلامة

[brhoom373]

انا حصل لي عطل غريب مره وان اقنص ضبان في منطقة حجرية دقة قطعة من الحجر ذراع الشاص وانكسر صار كفر يمين والثاني يسار من حسن حضي كان في السيارة سيم معلاق ملابس نزلت تحت السيارة وربطت ال>راع في الشاص وعبرني الى ان طلعت من البر ووصلني للرياض مشيت عليه مسافة 120 كم بسرعة 80 كم في الساعة
والحمد لله على السلامة