.. الرأي سياره جديده تنقص الزيت

[ابن فيحان]

اشتريت لاند روفر 2003

السيارة جديده .. ونظيفة ... وتم فحصها ..

لا تفرق عن 2008 في النظافة

وسافرت عليها .. وطلعت بها البر ... واخذتها رحله للعلاء

مريحه .. ولا في مكينتها أي تهري

ولا دخن .. (ممتازه)

لكن ظهرت لي مشكله
* السياره تنقص الزيت ...( اذا سافرت وتعدت السرعة 140 سفر طويل 1000 ك)
وسئلت اللي عندهم خبره في السيارات

وذكر لي أكثر من واحد ... بأن هذا طبيعي ...

وقال أحدهم .. كان لدي سيارة جديده .. شاريها من الوكالة وتنقص الزيد .. دون أي تهري .. اودخان في السياره وصبرت عندي سنين ...

هل هذا معقول.

الراي ... لا عدمناكم

ولكم الشكر

[فتى الرابيه]

السلام عليكم
الاخ العزيز ابن فيحان حياك الله بالنسبه للسياره اذا كان النقص لمدة شهر وبسيط جدا مافيه مشكله ولكن اذا كان ملحوظ وبكثره وعلى طول تبي تزيده هذا فيه خلل بالمكينه واذا كنت شايف ان السياره تسوى حتى لوتضبط المحرك مافيه مانع للتصليح وانت ادرى بالسياره عموما الله يباركلك فيها ويعطيك من خيرها ويكفيك شرها ويستر عليك مع تحيات اخوك فتى الرابيه

[بلاتين]

اخوي ابن فيحان راجع الوكاله شف ايش يقولون لك وترى تصير في بعض السيارت الجديده اعرف واحد معه باث فاندر نفس المشكله بس لازم تشيك على الزيت بشكل دوري وراجع الوكاله قالوله غير زيت ثقيل 50x30
والله يعينك .

تحياتي

[مقلع الرمث]

اخوي اكثر السياراات الجديده فيه لي اسمه لي تبخير وهذا مع الحراره والمشي الزايد يبخر الزيت معه لذالك لا تقلق وتوكل على الله الا اذا دست على السياره وشفت دخان ازرق تبويش وكذا فالله يكون بعونك يكون الموتر يمكن يبيله شنبر بالكثير لكن اقول النقص عاادي جداا

[إبن فيصل]

أنا مع أخوي مقلع الرمث كلامه صحيح التبخير في السيارة عند السرعة الزايدة فقط والموتر ما فيه شي إن شاء الله

[خشيمان]

تأكد من الوكالة

لأن بعض المواتر تحرق زيت وهي جديدة

وليس بالضروري خلل

ودمتم سالمين

[سيف الظفير]

الله يعينك على المشكلة

[escape_man]

عمري ماشريت موتر جديد ولا حصلته ينقص زيت

المواتر الاوله صحيح ماتنقص ولا بعد سنه

اما المواتر الاخيرة فلابد تبخر زيت خصوصا بالسرعات العالية .. ليش ؟؟ مدري

خط الشرقية .. الباث ينقص فيه ربع علبة وكذلك قبله المكسيما وقبله السفاري

كلها تصرف فلا يضيق صدرك

[ابا الأفلح]

هل المشكله ملاحظه كثيرا على السيارات الجديده اقصدمن موديل 2000 وطالع وخص بالذكر الكامري الكثير يشتكي من هل المشكله ولاكن اعتقد ان الامر طبيعي بس المهم لا تغفل عن معايرة الزيت ورح للوكاله للاطمئنان وشكرااا للجميع000000000000

[السنع كله]

اشتريت لاند روفر 2003

السيارة جديده .. ونظيفة ... وتم فحصها ..

لا تفرق عن 2008 في النظافة

اذا ليست جديده وعليه عادي نقص الزيت حتى لو كانت لم تتحرك منذ صنعها

[بدوي جنوبي]

السلام عليكم
حيا الله الشباب

اهم سؤال وما سئلتوه هي كم كمية الزيت اللي تنقص ؟

ننتظر ابن فيحان يجيب علي السؤال .

[رجل كريم]

اهم سؤال وما سئلتوه هي كم كمية الزيت اللي تنقص ؟

وايضا كم ماشية السيارة ..؟

تحياتي ..

[ابن فيحان]

الف شكر على المرور على الموضوع

وجزاكم الله خير

وما قصرتو ... على ارائكم

وتفاعلكم ... ودمتم ... ودام هذا الموقع

والأخ / اللي يقول .. افحصه في الوكالة

من يقدر ... يقرب ( السيف )

هذا على أسمه ...

جيتهم ... ولقيت تغيير الزيت والفلتر 750 ريال

وصيانتهم ... تقص الظهر

والسيارة تنقص ( علبه كامله ) ... في مسافة 2500 ك م

وبسرعة متوسطة 140

اما انها ادخن .. لو تدعس على السيارة ... بكل حيلك ... ما دخن ( مشاء الله )

ولا فيها تنديه ...

ولدي خبره في السيارات ... واعرف النظيف ..

لكن تفأجاءات بنقص الزيت

والحقيقة هذا جديد علي

ودمتم سالمين ...

والله يرعاكم ..

وجزاكم الله خير

وهذي صورة السيارة .. قولو مشاء الله