دعوة للنقاش((الباترول))مزايه وعيوبه000

[ابو ضاري]

السلام عليكم ورحمة الله
اعضاء مكشات الاعزاء حبيت اطرح هذا الموضوع لما اراه من اخواننا في الحدود الشمالية
من اقبال كبير على جيب الباترول سواء ربع ام صالون وتركهم جيب اللاند الربع
من موديل 1990 الى1996

مع العلم ان
((من ذهب الى الحدود الشمالية يرى ان اغلبية اراضيها وعرة مع قلة النفود فيها))

ولاكن كما هو معروف عن جيب اللاند الربع قوة تحمله في الاراضي الوعرة
((من غير قصور بالباترول))
لاكن الحق يقال
والعكس صحيح ايضا فأن الباترول مشهود له بقوة عزمه وتحمله في ((النفود))
مما يدل على ذلك كثرته في الجوف وحايل

هل الباترول قوة تحمله في الاراضي الوعرة مقاربة لقوة تحمل اللاند الربع ام لا !!

ام ان المشكلة من ناحية السعر!!!

وهذا الفرق يطرح علامة تعجب !!!
وهذا مما دفعني لاطرح هذا الموضوع

واتمنى ممن لديهم الخبرة في الباترول الاجابة عن هذه التساؤلات

فأتمنى من اخواني واعزائي وضع عيوب ومزايا الباترول او اللاند الربع من ناحية
التجربة

بأنتظار ردودكم وتعليقاتكم
والسلام عليكم ورحمة الله وبركاته...........................

[راعي كيف]

السلام عليكم
اتكلملك عن تجربتب معهن كلهن من غير الميزات الميكانيكيه

التايوتا الربع
الراحه معدومه
الضيق في حمل الأمتعه
الرساوه في الخط لآبأس بها
السعر مبالغ فيه جداً
قطع الغيار غالي نسبياً لكن قليل الطلب
البنزين يصرف خاصه إذا عطيته
بالبر يشعرك بالثقه الزائدة
مخاطر الإنقلاب كثيرة يعني يبيله سواق

النيسان الربع
الراحه تمام مريح جداً
رحابه في حمل الأمتعه
الرساوه في الخط ماعليها غبار ويتحدى جميع الجيوب ممن هم في فئتة
السعر مناسب جداً
قطع الغيار غالي نسبياً لكن قليل الطلب
البنزين يصرف خاصه إذا عطيته
بالبر يشعرك بالثقه والطمئنينه
مخاطر الإنقلاب قليله يعني سق وانت تلفت وماعليك توكل على الله


وجهة نظر واتمنى اني اوصلت المعلومه






راعي كيف
ابو ناصر

تم تحرير الرد من قبل المشرف

[عاشق السيل]

أخوي أبوناصر ،،

كلامك عين الصواب وتفصيلك في محله وبيض الله وجهك ،،



أخوي أبوضاري رأيي من راي أخونا راعي كيف ( أبوناصر ) وتقبل مروري يالغالي .....
تم تحرير الرد من قبل المشرف

[بدوي جنوبي]

عليكم السلام ابو ضاري

اعتقد ان الباترول مثل ما ذكرت في النفود ما عليه كلام

اما اللاند تخصص طرق وعره

بالتوفيق

[Black VTC]

لو قلت مثلاً ...

التويوتا كأنك راكبن جحش .. والنيسان كأنك راكبن بغل ...

او قلت التويوتا كأنك تشجع النصر ... والنيسان كأنك تشجع الهلال اظن هذا احسن وانت ابخص


تم تحرير الرد من قبل المشرف

[راعي البرقا]

ماشاء الله الشباب ماقصروا وانا مع اخوي راعي كيف وكان بودي ان المثل ماقيل واقول ياشباب أزعجوتنا بكلمة الباترول يصرف بنزين فوالله العظيم من الديره إلين الوجه وأنا معي باترول ربع 2003 ومعنا هدد 2007 ونعبي نفس الصرفيه ويمكن انا اعبي اكثر اذا مشيت اسرع منه ولا يهون أخونا ابو خالد راعي الدفرنسين . فقط للتنويه البنزين للجميع 91 .

[راعي البخاخ]

هلا اخوي داكار , الاخوان ماقصروا كفوا ووفوا على مايقولون
بس انا من وجهة نظري ,ان الربع التويوتا حمار مكده ,مايتفكك
اما النيسان ,صح انه اريح بس يتفكك ,,,,,,,,,,,, النــيسان ماشكلته صوت الديكور
يـزعجك خاصه بالبروالقديمات ,الجددد مادري عنهن
اما الربع التيوتا ,اخبرلك ناس معهم ربع تويوتا والله يحلفون راعين قنص
يقنصون للحره ,يكسرونه تكسير مع هالحصاء والهضاب والجبال.وماشاء الله اذا ركبوا الزفلت
ماتسمع صوت طقطقه ولا شىء...... وهاذا والسلام خير الختام
وشكرا

[عجمي]

عليكم السلام ابو ضاري

اعتقد ان الباترول مثل ما ذكرت في النفود ما عليه كلام

اما اللاند تخصص طرق وعره

بالتوفيق

اوافق اخوي بدوي جنوبي الرأي

وبالنسبة لراعي البرقا تقارن بين ربع نيسان وصالون تايوتا بالصرفية !!!!

[بلاتين]

السلام عليكم...
مثل ماذكر اخوي راعي كيف وانا مجرب التيوتا 2002شاريه 77الف استخدمته 5 سنين ومشيته120 الف وبعته السنه هاذي وخذت باترول ربع 2006بـ70الف جديد من المعارض وكان سعره معقول جداً .

من ناحية قطع الغيار التيوتا افضل بكثير من ناحية السعر وتوفر القطع وايضاً الصيانه واسعارها المبالغ فيه في شركة نيسان.

وصرفية البنزين كلهن يصرفن صرف زيد.

والعزم طبعاً التيوتا افضل والنيسان جيد ولاكن في الطلعات يطيح عزمه .

اصوات الهواء ورساوة الموتر في الخط والراحه النيسان افضل .معليها كلام

الي مهبل بي صوت الباب الخلفي في الباترول طالع عندي والموتر جديد ماشي 18 الف

اما التيوتا الى مية الف متماسك ولا يطلع صوت الباب ولا شي مع العلم كنت محافظ عليه جداً ولم اركب الاستبنه لانها لها دور في صدر الصوت مبكراً.

عموماً التيوتا متماسك جداً الي هو الربع , ولاكن كثير من لايتحمله .

ومن واقع تجربه مرتاح الحمد لله مع النيسان لاني معاد ابي العزم الزايد ولا مراقى ابي الكشتات والراحه والوناسه .
تحياتي لكم...

[بدوي جنوبي]

تم حذف بعض الردود
وتعديل بعضها

بالتوفيق للجميع

[راعي بيشة]

التويوتا 10 سنوات غير زيت بنزيم أقمشة فلتر

النيسان لا : يبي له التربيط والورش ... إلخ

بس في الطعوس النيسان أحسن

وف الجبل التويوتا أحسن

طبعاً في السعر التويوتا يمسك سعره بخلاف النيسان أعتقد أنت لا تقصد هذا

هذا بعض ما عندي على عجل دون تحرري

[mrayman]

اراء تختلف والاذواق تختلف

من وجهة نظري ....

النيسان في النفوذ ماعليه كلام ...

التيوتا في الجبال ماعلية كلام ...

وكلهم عيون لـ راعي القنص

[مقلع الرمث]

اخواني انا اقول واتوقع ان سعر الاند سواء كان ربع ام صالون مبالغ فيه جدا ولكن لو يبي يقلونلك سعر التايوتا نفس سعر الباترول انا عن نفسي وانا معي باترول اباخذ لاند وانا اضحك ياخوي الصالون وسع وموتر وشكله ونصبته ماعندك ازين منه لكن السعر والله مبالغ فيه يعني لو معك 80 الف وش يبي يجيبلك لاند يبي يجيبلك لا ند موديل 2002 ماشي فوق 200000 الف و ملعون ابو جده وبنفس المبلغ تحصل باترل ممكن موديل 2003 الى 2004 نظيف وماشي قليل وبنفس المبلغ هذا الفرق وكلنا نعرف التايوتا مزبوووط هذي وجهه نظري اما عن الراحه فالباترول اريح لكن مايهون الاند وااسف على الاطاله

[أسد تميم]

الاند كروزر الربع يحفظ مخباك والنيسان يحفظ جسمك من الملوخ ووجع الظهر

[بدر25]

والله النيسان تحطه علي يمناك أنا قاعدأستعمله خمس سنين موديل 2003 لحد اليوم وأنا راعي حلال ودوم بالبر بالصيف والشتا والحمدالله موتر يبيض الوجه