مشكله بالباترول عند التشغيل

[asd20009]

اخواني الاعضاء انا اول ماعرفت ان فيه ملاك للنيسان الباترول جيت عاضن ثوبي لاني عندي مشكله تواجهني له فتره وابي فزعتكم

انا عندي جيب باترول 99 نيسان
من دخل البرد علينا وهو الصبح يطول مايشتغل لكن يدق يدق السلف بعد فتره يشتغل الموتر
ولو اشتغل يكون مكربن يعني فيه كربون اسود شوي مع الشكمان لانه كتم بنزين

الحلول اللي انا سويتها ::

غيرت ليات الصفاي حق البنزين والصفاي نفسه والبواجي ... طبعا زبط له كم يوم ورجع نفس العله

بعدين غيرت الطرنبه البنزين الي تحت الكلبليتر ولافي فايده

باقي لي الان الاصلاح للكلبليتر نفسه
مع العلم ان كثير قالو لي انو صافي ولا فيه اية مشاكل ...اقصد الكلبليتر

شباب لو فيه اية حل ردووولي بليز

===========
طبعا فيه مشكله ثانيه واعتقد باغلب مواتر الباترول تجي لانها جتني زمان كان معي باترول قبل 6 سنوات
............

المشكله انو احيانا اول مااامشي بالموتر وامسك الخط واوصل سرعه 60-80 تجي هزه للموتر شديده وتروح لما اهدي السرعه

======
طبعا لاتقولو لي ترصيص لاني دجيت وانا ارصص مافي فايده ؟؟؟

===========
تتوقعووو جلد او اذرعه ؟؟؟ او ربلات؟؟


اسف للاطاله وانتظر الحل لاعدمناكم

[أبوعمران]

بالنسبه لبداية التشغيل انا ارى انها عاديه لأن الموتر كربريتر


ولكن بالنسبه للرجه .. فالمشكله من مساعد الدركسون

[asd20009]

اخوي ابوعمران تسلم للرد اولا ... ثانيا من ناحيه انها عاديه لاوالله موب عاديه ياقلبي اول ماكان يسوي كذا معي ... ولا يطول ... بس باقي شي قريته هنا عندكم وهي تغيير كتاوت الطرمبه للبانزين لان فيه واحد مواجهته نفس المشكله انا بغير وبشوووف وش النتيجه ..


وبالنسبه للرجه اخوي تسلم والله لكن ماتدري بكم وهل التركيب معقد يعني اي واحد يركب والا يبيلها متخصص فاهم ولايعدم علي اشياء ثانيه ....

[EFI-4500]

اما عن التشغيله فاقولك 80% من الكتاوت

لان كان معي شاص نفس الشي بس انه بخاخ وتعبت وان احاول فيه وادور المحلات لين طحت لي بواحد ابن حلال الله يجزاه خير وقالي انه من الكتاوت وغيرتهن وظبط معي واحسن من اول ما شريته

والرجه اعتقد نفس ما قال اخوي ابو عمران

والله اعلم

واتمنى اني افدتك

[باتروليك]

المشكلة هذي دايم تصير معي بالشتاء أنا معي باترول ربع 2006 وواحد من الربع معه فتك 2007 ونفس المشكلة وهي تدق ولا يشتغل والحل هو :
في كتاوت طرمبة البنزين . وللتأكد إذا دخلت المفتاح ودقيت ما تسمع وزة الطرمبة يعني ما تسمعه تشتغل . إذا حصلك هشي تقوم
1 - وتصك السلف
2 - تفتح غطا الفيوز.
3 - تدخل أيدك على فوق مسافة كفك بس ثم تلمس ثلاثة كتاوت متجمعة على شكل هرم . علما أن المسافة ضيقة جداً بين لوحة الكتاوت اللي راكبة فيها الكتاوت والديكور المغطي الكتاوت .
4 - بعد ما تحدد مكانها تقوم وتدخل مفك أو حديده وتطقق الكتاوت بشكل سريع وخفيف .
5 - ثم سم بالله ودخل المفتاح ودق سلف , وأن مشتغل صك السلف وعد المحاولة من جديد .
6 - ادع لي ولوالدين والمسلمين و أبرياء غزة و أعضاء موقع مكشات .
وشكراً...

[مبارك بن لندن]

الأخ asd20009

بالنسبة للمشكلة الأولى ما أقدر أفتيك لكن نصيحة لوجه الله لا تفك الكلبليتر ولا تغير الإصلاح لأنه حساس جداً وبينعدم عليك وفي الأخير بتغير الكلبليتر كامل.

بالنسبة للرجة فالحل لها كبس أذرعة الدركسون.

وسلامتك

[راعي كيف]

السلام عليكم


بالنسبه للكلبليتر احذرك ثم احذرك ثم احذرك لأنك راح تفتح على راسك باب جديد وسيل من المشاكل لا اقول انك لن تنجح لكن نسبه فك الكلبليتر وتضبيطه ضعيفه جداً لأنه .

اول طريقه
سوها ماراح تكلفك الكثير وهي انه إذا اوقفت السيارة لا طفي السياره على طول خلها شوي تشتغل لمده لاتزيد عن دقيقه وبدون دوسه بنزين .

الطريقه الثانيه
وهي اللي سويتها انت


الطريقه الثالثه
ابقولك حلول وتبي تقولي هذا مخرف معليش مجربها بأكثر من سياره وراح تدعيلي لأني عانيت من فك الكلبليتر اكثر من مره الين جربت الطريقه وصار معي الكلبليتر فل الفل
وهي انك تحط مع البنزين علبه زيت سوبر شل 1 لتر وتعبئ التانكي فل راح دخن السيارة شوي الين يخلص الزيت المختلط بالبنزين وراح يضبط معك الموتر بإذن الله
الثانيه تحط مع البنزين ستوب ابو عشرة ريال الموجود عند المحطات تراه جيد ويصفيلك الموتر

الطريقه الأخيرة وهي الكي

يعني بع الموتر وشترلك بخاخ وريح نفسك وعندي زبون يشتري منك الموتر


بالنسبه للرجه مثل ماقالو الأخوان مساعد الدركسون او الربلات حقاته ركبلك جبريل بـ 90 ريال وريح راسك وتروح الرجه تركيبه سهل جداً تقدر تركبه انت .

هذا اللي عندي وماصار معي بالتجربه وسلامك يالغالي


ابو ناصر
راعي كيف

[ناصر97]

أسلام عليكم ورحمة الله وبركاته
مهب مدح في نفسي لكن الحلول الي افادوك فيها شباب وما قصرو 50% صحيحه
لكن المشكلة عندك (يسمى _ الشك (تماتيك)) ويسمى في الموديلات القديمة شفاد لكن يختلف من موديل الى موديل واي استفسار انا حاضر راسلني على الخاص اوnissansdrh@yahoo.com والله اعلم

[asasas]

يا شباب جزاكم الله خير
انا عندي سوبر سفاري 98مامشى الا 58000كم فقط
4500 فل كامل المشكله اللي تحزني عزمه مره ضعيف
وش اسوي تكفن يا لحبايب دلوني انا ما اعرف كثير في
السيارات بانتظاركم الله الله بالشرح الواضح

[asasas]

98 مشى 85000 وليس 58000 تصحيح فقط

[ولد رغبه]

بنسبه للرجه
انت متى غيارت الكفرات اذا صار عمره اكثر من سنتين لازم تغيره حرص على سلامتك
وسلامت غيرك والمسلمين المهم نرجع الى الموضوع وترا الرجه تصير منه
لاني صارت معي ورحت عند ميزان المجد وعضيب ويرموك وغيرهم
ونظروا الموتر وقالوا غير مساعدات وغيرتها وفحص الموتر فحص خارجي
وبطن الموتر وقالوا غيركفراته وضبط الموتر