إخوتي... أرشدوني في التقطيع بموتري أتعبني..!

[صقرالعرب2007]

السلام عليكم ورحمة الله وبركاته...

أولاً أحسن الله عزائكم بسبب قيام إجازة الربيع بشد الرحال والسفر بعيداً عنّا

ثانياً وهو الزبدهـ... :

أخواني سيارتي من نوع جيب ايسوزو بنزين إذا مسكت خط على سرعة 100 ـ 120 بعد فتره بسيطه تقدر بـ ثلث ساعه يبدا الموتر يقطع وكل شوي تزود التقطيعه إلى أن السياره ما تتجاوز الـ 40 وإذا وقفت وطفيت السياره وانتظرت دقيقتين ومشيت ترجع السياره ممتازه ما فيها تقطيع...!

أما إذا مشيت فوق الـ 130 عادي ما تجيني التقطيعه...

أرجو مساعدتي في حل هذه المشكله جزاكم الله عني كل خير أو إرشادي في ورشه بالرياض متخصصه في الأيسوزو ( غير الوكاله طبعاً )...
حرم الله وجيهكم عن النار وسدد خطاكم وعلى مساعدتي أثابكم....


# سبحان الله وبحمده عدد خلقه ورضى نفسه وزنة عرشه ومداد كلماته...#

[EFI-4500]

الظاهر يا خوي ان المشكله عندك بكتاوت طرمبة البنزين لانه الكهرب ما ياصل على طول للطرمبه

والله اعلم

مع العلم ان خبرتي قليييييله لكن اتوقع

[أبو لينا]

اتوقع المشكلة من أسلاك البواجي يكون في واحد منها تهريب كهرباء ولو حبيت تتأكد (من دون ما تخسرشيء كثير)
حط شطرطون بنهاية كل سلك من أسلاك البواجي من جه البوجي وجرب امسك خط سريع وإن شاء الله تنحل المشكلة

[عبده شرشر]

عندك يالحبيب صفاي البنزين يبي تغيير

[الثويرات]

طيب السيارة وش من لحية يعني بخاخ او كلبيتر

[اسير الغضا]

شف ياطويل العمر
بحكم تجربتي مع الدداسن
لازم تشيك على
1-البواجي
2-فلتر البنزين
3-فلتر الهوا نظفه
4- ان كانت كلبليتر نظفه
5-واخر شي تشوفه طرمبة البنزين
وانتم ابخص
وياطويل العمر خطم على اكثر من ورشه واسلهم عن المشكله واذا اجمعو على شي توكل على الله

[لن أمل من العطاء]

اذا مشيت لمسافات طويله وسرعات منخفضه مايصير شيء
يعني تمشي بسرعة 70-80 كم لمدة ساعة هل يصير نفس المسكله
او فقط مع السرعات العالية
اذا مع السرعات العالية فقط
فهذي طرمبة البنزين تسخن

[صقرالعرب2007]

الله يعطيكم العافيه أخواني على إرشادكم لي وجزاكم الله عني كل خير..
أحب أوضح أني غيرت الصفايه و الموتر بخاخات...
بالنسبه أخوي لن أمل من العطاء ما جربت على سرعة 80 لكن على سرعه عاليه مثل 140 ما يصير شئ..!