كيف تسحب سيارة مغرزة

[مشغول]

السلام عليكم ورحمة الله وبركاته

تنبيه يوجد سؤالين في الأسفل ..

كنت في روضة الخفس انا والأهل فالينها في الطعوش الشمالية للروضة بعد ما صلينا المغرب
إلا بذاك الجمس الدبل يمر قدامنا بسرعة جنونية وهو فوق الطعوس المهم شوي ولينه مغرز أظلم الليل وهو يحاولون يطلعونة
ولا قدروا جاء واحد منهم يطلب الفزعة قلتله ابشر .. خذت الجيب ورحت له .. لقيته متعلق .. شبكت الواير وحاولت اسحبه ماش حارن .. الواير انشد ولا قدرت اتقدم لأنه مغرز في اعلى الطعس .. الشاهد قطعنا الواير وطلعنا سيارتي
وربطنا الواير من جديد وقلتله ترى بتلك .. حاولت ماش ثقيل وتقطع الواير .. ولين عندي واير جديد 3 طن ..
ربطت الواير في الدعامة من تحت وبسم الله .. وتله ... وتله ... وتله لييييييين طلع ..لكن بعد ما طلع وانتهت المشكلة ...
ورجعت البيت لقيت الدعامة مايله والحقيقة ضاق صدري .. الله يخلف علي

لكن السؤال .. هل ربطي الواير في الدعامة صح .. مع العمل أن الدعامة مربوطة في الشاص والربط كان من الأسفل ؟؟؟؟

السؤال الثاني .. هل طريقتي في نتل السيارة صحيح وهل يؤثر على السيارتي إذا كانت السيارة المسحوبة كبيرة ؟؟؟وينكم يا اهل الخبيرة ؟؟ الله لا يهينكم ؟

[abos3d]

كان موترك لاند او غيره من الجيوب بس خصوصا اللاند لاتسحب جمس عشان ما يودع القير حقك نرجع للموضوع اذا تبي تطلع موتر شاقص على طعس حاول انك تشبك الواير بحيث انه ينزل الكفر على الرمل يعني تصير السياره موب اربع كفات في الهوا بس ثنين بعدين اذا ثبتت الكفرات اسحبه سحب عادي والله اعلم

[الحاتمي]

اخوي مشغول الله يعوض عليك وماقصرت على فزعتك لراعي الجمس
لكن ترى ربطك للواير بالدعاميه خطا.
اربطه بالشنكاراو بالهوك اللي ورى اضمن لك.
وسحب السياره المغرزه بطريقة النتل آخر الحلول
اذا ماتاثرت السياره بفعل النتل ممكن ان الواير ينفك او ينقطع ويرتد عليك
اذكر فيه واحد مره انكسرت قزازته بسبب هذي الطريقه
عموما طريقة النتل مناسبه اكثر لسحب سياره غاطسه في طين اما السياره اذاغرزت برمل
او تعلقت وجيت تسحبها تطلع معك بالركاده بس نسم لها ويخف الحمل على كل السيارتين

[الاجودي]

وعليكم السلام ورحمة الله وبركاته


اقول ياشباب الواير مو لو يربط بالشاص ازين وامن

والله انا عادتي اربطه بالشاص

[صقر]

احيانا ما تطلع السيارة المغرزة الا بالتّل

وهذي ما كد شفت احد تضررت سيارته أو محركاتها من الطريقة..

لكنها تبقى آخر الحلول.

[مشغول]

السلام عليكم

ابو سعد
الحاتمي
الأجودي
صقر


حياكم ربي
وجزاكم الله خير وما قصرتوا الله يعطيكم العافية

والظاهر إني ماني ساحب جمس مرة ثانية أحس ان موتري تعور

والحياة دروس .. وتشكرون على المعلومات الجميلة

[النبراس]

اخوي مشغول
الربط بالدعامه تقدر تقول انه خطأ لانك تشبكه بالشاصي احسن او الهوكه إذا كان من الخلف .
اما بالنسبه للنتل فهذا زي ما قالوا الإخوان آآآآآآآآآآخر حل لأنه يأثر على الشاصي إذا كان بالطين والكرونه.
وإذا جيت بتسحب واحد خله يبرح لين يقول آمين بعدين اسحبه اما تفجر موترك وتحق الكلتش وهو غاطس بس على الطاره لا وألف لا.

[soJwJI]

الله يجزاك خير على مساعدة الغير

ولا يضيق صدرك وانا خوك
واطلب العوض من رب العالمين وان شاء الله انك معوض عنها بخير كثير يالغالي

تحياتي لك

[زايــ ابومحمد ــد]

تسحبها تطلع معك بالركاده بس نسم لها ويخف الحمل على كل السيارتين000

انا مع كلام اخوي00الحاتمي
انك اذا جيت تسحب احد غاطس00لازم تنسم والمغرز ينسم واذا فيه حمل ثقيل لازم يخفف00
اما مكان الواير فالاحسن يوضع في المكان المخصص وهو الشنكار00
اما النتل فهو لابد منه للسياره المتعلقه مره اومرتين الى ان يطلع من التعلق ثم يسحب سحب عادي00
وتقبل تحيـــــــــــــــــــــــاتي00

[راعي المجهم]

اخوي مشغول
الربط بالدعامه تقدر تقول انه خطأ لانك تشبكه بالشاصي احسن او الهوكه إذا كان من الخلف .
اما بالنسبه للنتل فهذا زي ما قالوا الإخوان آآآآآآآآآآخر حل لأنه يأثر على الشاصي إذا كان بالطين والكرونه.
وإذا جيت بتسحب واحد خله يبرح لين يقول آمين بعدين اسحبه اما تفجر موترك وتحق الكلتش وهو غاطس بس على الطاره لا وألف لا.

نعم هذا الكلام الصحيح 100%

خله يحفر الله لا يهينه إذا يبي يطلع من تغريزته

[السنع كله]

اسحبها بعد ازالة اي عائق من رمل او شيء تحت بطنها النتل مضر جدا على السيارة ويقلل عزمها وخطر من الواير ينقطع ويطخ احد او الجام

[سالم غانم]

التل او النتل خطر على السيارتين لو ابعدو الرمل ونسمو كفر على الجنط كان تسهلت وخيرها في غيرها والله يعوض عليك

[shaheenshah]

النتل يؤثر على السيارة بطريقة او بأخرى
وافضل شي للسحب مثل ما قالوا الشباب الهوك الخلفي مع التبريح للموتر والتنسيم

وسلامتكم

[راعي الطلعات]

راح فيها موترك شيك على الشاصي لا يكون مايل الحين النتل خطر مع السيارات الثقيله مثل الجمس الدعامية بسلامتها تفكه وتستبدل بها جديدة لكن الشاصي بكم تحصله

اخر مره شفت جمس يوكن مغرز في طين في شعيب حريملا جيبين كانو يسحبونه مع بعض ولا طلع سوو انواع الاختراعات ولا صار شي وجاء الدفاع المدني ولا فاد وفي الاخير طلبو المساندة من السيارات الي فيها بكرة سحب بس تأخرة ويجي باترول به بكرة سحب ويسحبه وفي دقيقتين ما شاءالله عليه

ان كان تحب سحب السيارات انصحك تركب بكرة سحب

مع ان قيمته توصل الثلاث الاف وفي الاخير اكثر الي يستفيد منه الناس الي تطلعهم

موفق خير اخوي والله يكتب لك الاجر على ما قدمته من مساعدته

[طرد الهوى]

اخوي جزاك الله خير والله يجمل حالك وما تدري يمكن بفزعتك هذي ربي يسخر لك من يفك زنقتك

والله يجزاك خير كان ربطت الواير بالهوك الخلفي عشان ما يضرر موترك ، والنتل هو الخيار الافضل لسحب السياره .