ماهي اللعابات ... وما فائدتها ... ؟

[أبو ناصر]

السلام عليكم ورحمة الله وبركاته

ياخوان أسمع عن شيء اسمه لعاب يركبونه راعين الونيتات :
ماهوهاللعاب
وما فائدته
وفي أي جزء من السيارة يركب
وهل له سلبيات

وإذا ممكن وضع صورة له عشان نعرف شكله !

وجزاكم الله خير

[السالمي]

حسب معرفتي

العابه يركبونها اهل الهايلوكسات

والعابه هي زي فصالة الباب

تركب جهه منها في مكان المسامير حقت اللوحه

والجهه الثانيه يركبون اللوحه فيها

ومع الدعس والهويات تقعد اللوحه تلعب

وتعتبر موضه لهم

هذا حسب معرفتي واتمنى ماكون اخطيت

[ملاعب الريح]

السلام عليكم ورحمة الله وبركاته

الظاهر والله العالم انك مخطي اخوي السالمي هذي اللي تكلمت عنها تسمى (مفصلات) او فصالات اللي يسأل عنه أخوي ابوناصر هواللي يركب في الجنط والله اعلم هذا حسب معرفتي واتمنى ماكون اخطيت و السلام عليكم ورحمة الله وبركاته
أخوكم في الله (بوسيف)
لوووووووووووووووووووووووول

[ممتر البران]

السلام عليكم ورحمة الله وبركاته
مالك لوا يا ابو يوسف
اللعابات يا طويل العمر ترفع الموتر من ورا
وهي عباره عن حديدتين تركب بين الشاصي والبودي
وين بالظبط ما ادري الظاهر من عند السست وضيفتها شقل الموتر
عشان ما يطيح مع التحميل او ما يغرز يعني ما ينشب شي بسيط بس
اكيد له اظرار شي غير شد البلد يظر لئن الشغله مدروسه بالكمبيوتر ومرسومه و مهندسين دارسينها
يعني اذا ما فيه لزمه ما يحتاج .المساعدات انشاء الله يفون بالغرض
هذا حسب خبرتي البسيطه
ان اصبت فمن الله وان اخطات فمن نفسي
والله اعلم

[أيمن]

وعليكم السلام ورحمة الله وبركاته ..

أخوي السالمي بالفعل أصاب، وهي أن اللعابات من مسمياتها ما وضح، وتسمى اللوحة اللعابة .
واللعابة تطلق أيضا على أربع حدائد لهن أطوال مختلفة تركب في آخر السست المرتبطة بالشاص وتركب بدلا عن شد البلد القصيرة.
ووظيفتها الإيجابية : رفع الموتر على حسب طول هاللعابة .
وسلبيتها : هو تنزيل السست من الخلف، فأي عائق من الأسفل أثناء الرجوع للوراء أو نزول جرف شديد جدا قد يلامسها .

تحيتي

[أيمن]

عذرا أخوي ممتر البران ..
ردي وردك كان في وقت واحد ..

تحيتي

[خشم الحصان]

الاخ الغالي
ابو ناصر
السلام عليكم
اخي في الله كلام مشرفنا الفاضل (ايمن) في محله ولكن وادي ازودك من الشعر بيت يعني من تجربه شخصيه
انه اذا طولة اللعابات اكثر من الازم توادي الي انقلاب السياره خاصه اذا (غرفة) الموتر فجئه وهو محمل حمل ثقيل لئن طول اللعبات يوثر عليها مما يوئدي الي (عفطها ) وانقلاب السياره يعني خلك حذر في طول اللعبات
ويجب تغيير المساعدات او تدبيلها وذالك لشد الموتر .
وان كان تبي شور لاياك تزيدها واجد ويجب تلحيم اللعبات مع النص حتي لا( تنفجح ) او( تلايم) مع المطب القوي ودور الحديد الصلب ولا تستعمل حديد البيبان
اخوك
خشم الحصان
شرح المفردات
غرفه.............. لف السياره فجئه
عغطها.............. الثني في اتجاه واحد
تنفجح................. تقوس الي الخارج
تلايم................... تقوس الي الداخل

[ممتر البران]

السلام عليكم ورحمة الله وبركاته
لا عادي يا مشرفنا

[أبو ناصر]

السالمي
بو سيف
ممتر البران
أيمن
خشم الحصان

أشكركم على ردودكم على الموضوع واجتهادكم فيه .

اللي أقصده هو اللعابات اللي تركب بين البودي والشاص مثل ماقال أخوي ممتر البران ومشرفنا أيمن وعلق عليه أخوي خشم الحصان .

طيب سمعت إنها مع المطبات شينة يعني تقص الظهر هل هذا الكلام صحيح ؟
هل يوجد بديل لرفع السيارة عوضا عن اللعابات ؟

ماحد عنده صورة لها عشان أعرفها

[أيمن]

الله يحييك يا أبو ناصر ..
وبالنسبة لمسألة أنها تقطع الظهر، فعلى حد علمي وتجربتي أن مالها أي علاقة بهالأمر نهائيا فقط طولنا الحديدة اللي تربط بين السستة والشاص ..
أما بالنسبة لوسائل لرفع الموتر من الخلف لأصحاب الونيتات، فلقد كان بيني وبين أخي العزيز "عاشق الدخل" حديث حول هذا الأمر وأوضحت له التالي:
بالنسبة لرفع الموتر من ورا فيه عدة أمور :

- وضع سست زيادة : وهذا زين لأهل التحميل بس، لأن الموتر بيصير أشد قساوة.
- وضع جلب : بتقسي عليك المطب شوي لكنها مهيب شينة وأمرها سهل.
- تقويس السست : زين ولا تفرق الموتر إلا في الرفع، وتقدر ترفعه إلى 15 سم بعد، لكنها بعد فترة يعني سنة سنتين تلين السست وترجع مثل أول (زينة للي يبي يبيع).
- قلب السست : (ماجربتها)
- اللعابات : وقلت لك وش فيها من عيب .

اختر واحدة مما يناسبك أو أكثر من وحدة لرفع موترك.

وهذي صورة اللعابات لكنها للشيروكي، قارن بين الشد البلد (القصير)، والمرهم (الأطول) :

الونيتات قريبة الشبه من الصورة لكنها أقل انحناءً ..
أرجو أني أفدتك

تحيتي

[ممتر البران]

السلام عليكم ورحمة الله وبركاته
الظاهر ان ايمن قام بالواجب وسبقنا
لكن استنا منك اي سؤال وحاضر
واسف على التاخير

[أبو ناصر]

أخوي أيمن
أخوي ممتر البران

قولوا آمين رحم الله والديكم عن النار والله يجعلكم في كل خطوة سلامة والسامعين والمشاهدين .

شرحك وافي ، لكن عندي سؤال آخر إذا ما أزعجتك :-

اللعاب أقل شيء وأكثر شيء كم ارتفاعة ؟
إذا كلت مطب وأنا مسرع أو جفرة هل ينكسر أو ينعفط ( يعني هل يتحمل المطامر والتحميل ) ؟

بالنسبة لخوي خشم الحصان يقول لحمها مع النص عشان ماتنكسر مع التحميل :
اللي فهمته من كلامة ( يعني من مكان قاعدة اللعاب ألحمه تلحيم كامل وأكثر عليه التلحيم ) هل طريقة فهمي صحيحة ؟ أو توضح لي الطريقة الصحيحة ؟
وين ألقاهن في الرياض ؟
وكم سعرها ؟
وبكم تركيبها ؟


جزاك الله خير ورحم الله والديك عن النار

[خشم الحصان]

الاخ الغالي
ابو ناصر
سلنه الله من كل مكروه اخي الحبيب المقصود انك تلحم اللعبات مع النص يعني بعد ما تقصها وبطول المناسب وتثبتها في السست والشاص وتشد المسامير صح
تجيب قطعة حديده وتقصها حسب المسافه بين اللعبات ثم تقيس طول اللعبتين وتعرف النص ثم تلحم القطعه
بينهم يعني تصير القطعه في تصف اللعبات علي شكل حرف(H ) عرفة الله يغفر لنا ولك امين
يعني هذي قطعة لعابه( I )وهذي القطعه الاخر( I ) ثم تجيب قطعه صغيره مثل هذي( -) وتلحم بينهم وتصير مثل هذي (H )
ارجو ان اكون وضحت لك يابعدهم
اخوك
خشم الحصان
ملاحضه مهمه جدآ
عند تخريم خفوس المسامير يجب ان تكون مطابقه تمامآ مع الاخري لو زادة او تخولفت وحده عن الاخر يمكن تاكل الربله او تكسر المسمار لئن توزيع الحمل علي المسامير غير جيد

[أبو ناصر]

جزاك الله خير ياخوي خشم الحصان على التوضيح .

لكن بقية الاسئلة من يبي يتبرع ويجيب عليها :

اللعاب أقل شيء وأكثر شيء كم ارتفاعة ؟
إذا كلت مطب وأنا مسرع أو جفرة هل ينكسر أو ينعفط ( يعني هل يتحمل المطامر والتحميل ) ؟

وين ألقاهن في الرياض ؟
وكم سعرها ؟
وبكم تركيبها ؟

[بدر بريدة]

اللعابات سلمك الله مثل ما قالوا الشباب
عبارة عن حديدتين منحنيات "شوي" تركب في السست وتكون ثابته ماتتحرك عشان ما يميل الموتر اذا رقيت وبغيت تديور عشان ما"تثولث"
وهي تساعد بشكل كبير في منع الثولثه في البر ويقولون"اسال مجرب ولا تسأل طبيب"