الهايلكس الديزل. في طريقها نحو الفشل!!!

[الوشاح]

السلام عليكم

حياكم الله يا الربع

ندخل بلموضوع :

كنت ماسك خط مسافر من القصيم ألى حايل , وبعد مابقى على حايل إلى مية كيلو تقريبا فجأه وبدون مقدمات طررررررررخ طق طق طق وتولع لمبات الطبلون وتطفى السياره !!

وقفت السياره جنب الطريق ونزلت اناضر وش صار ؟؟ عسا ماشر؟؟
فتحت الكبوت اناضر وشوف وتشوف مافيه شي!! كل شي طبيعي!!

قلت ولله شي غريب؟ يولد شف تحت السياره .
يوم ناضرت اثر كل الشاصي زيت
جبت سطحه وشحنت السياره للقصيم , وديته لم ورشه متخصصه بالديزل قلت شف موتري وش بلاه

قال موترك منكسرسرندل المكينه!!!!!!!!!
قلت وشووووووووو؟؟؟
وشلون ؟ وليش ؟ طيب وش الحل؟

قال جبلي سرندل وركبه لك
قلت بس سرندل
قال لا جب شنبر وسبايك ووجيه وووو

صار توضيب كامل !!!
والله قهر سيارتي 2001 ماتمت200الف كلم وتوضب؟؟

والغريب عنده ثنتين مثل سيارتي وحده2001والثانيه2002
كلهن توضيب كامل
وبعد ماجيت استلم سيارتي لقيت عنده 2004 اخت الجديد
بعد توضب

يعني باقل من اسبوعين شفت اربع سيارات توضب
هذا دليل ان فيه خلل فني بالتصنيع...


وبصراحه ما ادري استخدم ولا ابيع ورتا ح من همه
لاني ما عاد اثق بالسياره هاذي ...
والله يعافيكم ......

[اسيزو 4x4]

الله يعوض عليك اخوي عريفجان ساحوق

هذي المشكلة دايم تصير بالهايلوكس الديزل

ولاحظ اي هايلوكس ديزل لازم ينقص زيتها كل شوي وهذا شي غريب ونصيحة خذ هايلكس بنزين واذا انت تحب الديزل مالك غير الاسيزو

والله يعوض عليك انشاء الله

عبد اللطيف جميل بلا في بلا شروى كل الوكالات....

[الربذي]

الله يعوض عليك اخوي
والحمد لله على السلامة يمكن خير ه ودفع شر عساك ماتشوف الشر يالحبيب
تويوتا سيارات قوية ولكن لعدم الخبره بالديزل وخصوصا النقل الخفيف ------انجح ديزل هي الازيزو
ومتسوبيشي (
اخي عريفجان ساحوق ملاحظة العمال الي عندنا بالورش على قدر عالى من الخبره وجميعهم متخرجين من معاهد متخصصة بانواع الزيوت واذكيا وسريعين البديهة ؟؟؟؟؟من جمبه بعضهم اول مره يشوف السيارة متعود على السياكل !!!
ويعرفون الموتر الديزل من وقفة !!!!!!
اخي الكثير ينسى ان يعلم الورشيين حقين تغيير الزيوت بان سيارته ديزل والديزل له زيت خاص (والله مادريت الا قبل سنة تقريبا )
واخر مرة غيرت الزيت هل حطلك زيت مكينة ديزل ولا مكينة بنزين
استفسارلاكبر مهندس سيارات سلفر سنايبر ماذا يحصل لو حطيت زيت مكينة بنزين بمكينة ديزل
اتوقع يحصل مثل ماحصل مع راعي ساحوق مع عمي واحده هلى ديزل 2002 زي الفل ماشا الله فاكه وكاله ماشية فوق 180 الف كم

[كشتة]

الله يعوض عليك ان شاء الله اخوي

وانا انصحك كانك تبي تبيع لاتعدى الايسوزو الديزل خذ لك دفرنسين حوض

تحياتي لكـ

[اسيزو 4x4]

بشر اخوي عريفجان ساحوق وشصار بموضوعك مع الهايلوكس وترى اخونا الربذي ما بيقصر معك

وبالتوفيق..........................

[ابواسامه]

تكفى ياخوي عريفجان ساحوق
عسى هالكلام مهوب صدق
معي 2004ديزل
ماشفت منه الا كل خير

[الوشاح]

مرحبا اخوي ايسوزو
الزيت ماكان ينقص إلا شي بسيط مايذكر
اما السوزو الجديده فهي موتر صح
شكل وقوه ورزه بعد.
لاكن غاليه علي

الربذي مرحبا بك
الزيت اكيد حق ديزل, انا شاري كرتون 6حبات
وهو نوع ممتاز (بترومين ماستر)
وهذي اول تغييره من ها لنوع , اول كنت اغير فوكس تيتان
يعني الزيت مافيه شك

اخوي كشته
شكرا على مرورك
والنصيحه في محله لاكني طالب يعني دجه
والله يحفضك

ابو اسامه
وكل الله يارجل
ولا تخاف الي حصلي مهب قاعده لازم يجري على كل هايلكس ديزل.......
وهذي اول مره تدخل سيارتي الورشه
لاكن كانت الضربه مؤلمه


كنت كاشت قبل ما تعطل سيارتي بسبوع تقربا لم النفود
وكانت معنا ددسن2003بخاخ
وكانت سيارتي تطلع والددسن ما تطلع
حتى ان الشباب انبهرو !!!
كيف ددسن بخاخ ما تطلع مطالع الهايلكس الديزل؟؟
علشان كذا قلت يمكن اصابه عين
لاكن مهب معقول ان كل الهايلكسات الديزل اصابهن عين!!!!!



والله يحفضكم



.......

[الحسي]

أخوي

أفضل شركة في تصنيع محركات الديزل هي
isuzu

لذلك لاتتعدى الإيسوزو



ثم أسوأ ناس يستعملون السيارات هم السعوديين ، لأننا ما ( نأوي ) للسيارة وخاصة الديزل فيه دلع شوي يبيله محافظة عالية المستوى .


والله يعينك

[اسيزو 4x4]

ياخوان الديزل حق كرف ما يضرة شوفو التريلات والدينات والقلابات وغيرها من المعدات الثقيلة ولا ننسى الونيتات كلها ديزل والهنود الى بالشركات كرف بهالمواتر لاكن في الاخير والاهم ماركة السيارة هل هي متخصصة بالديزل ...التيوتا لها خبرة في البنزين ولاكن الديزل توجد لها شركات متخصصة مثل

1 الاسيزو اولا

2 المرسدس

3الفلفو

4المتشوبيشى لا اعلم مدى خبرتها

والافضل الاسيزو لانها اول شركة انتجت محركات الديزل في اليابان منذ عام 1916 ميلادي

والله الموفق

[الاحداثي]

الحمد لله على السلامه ...والا سلم العود الحال تعود والله يعوظك خير ان شاءالله

[الوشاح]

اخوي الحسي

وراك معصب

ارفق بعمرك....

شكرا لك


الاحداثي

صدقت راحت انفس مهب سياره

شكرا لمرورك


.......

[exit8a]

السلام عليكم
مساكم الله بلخير
انا جرابت الهيلكس البنزيم
وجربت الديزل
ولحين معيي ايسوزو جديده 4*4 طبعاً ديزل
صراحه مافيه مقارنه لافي اراحه ولا في ارساوه ورتحت من مطامر الهيلكس في هلخط والحوض يشيل دبل الهيلكس

[الوشاح]

exit8a
صدقت
السوزو احسن بكثير من اللهايلكس

شكرا لك

...

[مسوي راعي بر]

الحمد لله على السلامة

بس الأسوزو الجديد يقلون صناعة تابلندي معي هايلكس 2002 ديزل ولكن عندي الصوفه الي قدام تهرب

[#ّّ الفارس #]

الحمد لله على السلامه

لاكن بالنسبة لصعود الهايلكس للصعوس تر الددسن ماهي قليلة شر

في عطلة الحج كنا طالعين للنفود جيب شاص وددسن 2003 غمارة وهايلكس 2004 غمارتين بانزين كلهن

المهم تحدوني الشباب ارق احد الصعوس الكبيرة لانهم مستهينين بالددسن وقبلت التحدي

وانطلقت وفعلا رقيت الطعس لاكن اخوياي قبل لايوصلونه ببضعة امتار سياراتهم غرست بجنب بعض

والصور عند خويي راعي الشاص واحاول ادخلن لكم

ومثل مايقولون (( الخيل من ركابها ))