عطونا نصائحكم في التطعيس

[ابوحازم]

الاخوة الافاضل اعضاء مكشات

السلام عليكم ورحمه الله وبركاته

اذا سمحتوا تعطوني النصائح المفيدة عند استخدام السيارة على الرمال (التطعيس)
يعني كم ضغط هواء الكفرات المناسب في الرمال؟ وهل يجب تخفيض ضغط الهواء ولو كانت السيارة دفع رباعي؟

ما الفرق بين الدبل الخفيف والدبل الثقيل؟ ومتى يستخدم كلا منهما؟

معليش صارت كانها اسئلة اختبارات!!!!

وشكرا لجميع اعضاء مكشات..............

[جال القلايل]

مرحبا أخي الفاضل


في البداية يُفضل أن تكون الإطارات رملية ( أي بالون ) من أي نوع أو ماركة

أما ضغط الهواء فـ يعتمد على حسب الطعس أو الأرض التي تريد أن تخوض غمارها

لأن الطعوس والرمال عموماً تختلف في مدى وعورتها من مكان لآخر ، وعليك أن تعرف المكان الذي تريد التطعيس فيه وتعرف مدى وعورته ومن ثم تخفف هواء الإطارت على أساسه ،،،،

بالنسبة لي أجعل ضغط الهواء في النفود الوعرة والتي توجد فيها رمال متحركة من 18 إلى 20

وفي حالة التطعيس وكان هذا الطعس وعراً أضطر إلى تخفيف الضغط إلى 15 أو أقل..!!

وفي كل هذه الحالات يكون الدبل الخفيف يعمل ، أما الدبل الثقيل فيتم تشغيلة في حالة ( التغريز ) فقط ويجب عدم استخدامه إلا في هذه الحالة وعدم زيادة السرعة في حالة تشغيله.

أرجو أن تكون قد استفدت من معلوماتي المتواضعة

تحياتي

[ابوحازم]

شكراً اخي الصلف على هذه المعلومات القيمة

وانتظر مشاركات اعضاء مكشات لاثراء هذا الموضوع بخبرة الاعضاء

[المطلق]

أفضل وزن للسيارة

(15)

وأسأل مجرب ولاتسأل طبيب

[special]

السلام عليكم

بالنسبة للدفع الرباعي ازين شي حط الهواء 15

اما بالنسبة للددسن والهايلوكس

10
ممتاز

وشكرا

[ابوحازم]

شكرا اخوي الرباعي

شكرا اخوي special

والله يعطيكم العافية على المشاركة

[شاص]

ريح نفسك وريح الموتر وحط 15 بالكفر إلا إذا كنت تبي تراقي حط 10

[abo s3od]

حطه مابين 10 و15 وتوكل

[ابوحازم]

شكر اخوي شاص

شكرا لاخوي ابو سعود

لكن يا الربع الضغط اللي ذكرتوه للكفرات العادية ولا حتى البالون يحتاج الى هذا التخفيض

ودمتم سالمين

[الربذي]

اخوي عادل
بالنسبة للدبل الثقيل فائدته هي
انه في حالة ان السياره غرزت ومعاك حموله بالموتر ووقفت تماما لن تتحرك بالدبل الخفيف وقد يحرق عليك الصحن وصار معي مره لانك تحتاج ان تدوس على السياره مره عشان ماتطفي لكن لو استخدمت الدبل الثقيل سوف تخرج بكل سهوله الا اذا بطن السياره قد ارتكز بالرمل وقليله الحدوث في النفود فستجد صعوبه والحاجة الثانيه ان الدبل الثقيل يستخدم في ان يكون المكان وعر جدا يعني حفر وتضطر ان تهدي وتسرع في حاله اكتشفت ان المكان خفاس وتغريز مره وفي حاله رفع رجلك عن البنزين تهدي بسرعه ويعني تتحكم بالسياره بسهوله ولم اجرب الفي اكس ار 8سلندر وفي حالة انك غرست هل يطلعه الدبل الخفيف اذا كان محمل
اما الهواء
قبل كم يوم سيارتي باثفايندر حطيت الهواء 8 ونوع الكفارات دنلوب عريض وماشاء الله ماكني مع نفود بالرغم انه جاف وغير ممطور اول احط 20 وبصراحه صعب المشي مره ولازم تدوس اما البالون فياخي لااعرف عنه شي لكن مذموم مره مع الاسفلت لايمدح ومرتفع ولو ينفقع مع الاسفلت علوم لانه سيخل بالسياره وزلق ولاينفع مع البريك والفات
ودمتم بخير

[الوشاح]

اهم نقطه بالتطعيس زي ما قالولك الشباب تحط بالكفرات هوا ضغط15

علشان تريح موترك...وترتاح انت

وبالتوفيق.......

[ابوحازم]

شكر اخوي الربذي على هذه المعلومات القيمة

وكذلك الشكر موصول للاخ عريفجان ساحوق على مشاركته

[الرحايل]

السلام عليكم
1ـ متى ما فكرت بالرمله نصيحه تنزل ضغط الهواء عشان ما يخرب الدفرنس وتكسر السيارة
2ـ افضل شي ان يكون ضغط الهواء بالكفر ما بين 15- 20 ولا تنزل عن كذا عشان ما يفسخ الكفر .
3ـ اعتمد دايم على الخفييف
4ـ لا تفكر تستخدم الفرامل بقوه يوم توقف لان يوم تبي اطلعها بتغوص الكفرات بالرمله من شدة الفرامل
5ـ متى ما غرزت بالرمل خذ نظره على الموتر عشان تعرف الوهقه إلى أنت فيها
6 ـ لا تتسرع ولا تتهور ووحاول تعرف شو وراك أنك تاخذ نظره من الجنب قبل لا تفكر تروح .
7ـ احفر للموتر إذا غرزت قبل لا تفكر تمشيه عشان ما تنزله دااااااااااون يعني على بطنه
وشكرا

[الطعس الذهبي]

شف كل مانسمت الكفرات زيادة كلما قلت النوافير

[بن يحيى]

السلام عليكم احب اضيف لا تلف يعني لا تكسر الطاره على الاخير في الطعس حاول تكون تكسر الطاره خفيف لان اولا عندك الكفرات منسمه يمكن يطلع الكفر من ا لجنط والشي الثاني لف الطاره يوقعك في التغريز وللأستمتاع طعس في ارض بكر ما عليها اثار كفرات واحذر من المطانيج خل سرعتك خفيفه لاتعدم المساعدات واحذر من الرباضه اي الرمل الخفيف وتحياتي لك


سؤال للجميع الرمل الخفيف اي الرمل الساحب كيف التمييز لاني بصراحه ماقد شفت هذا الشي سمعت سوالف ووفيات بسبب الرمل الساحب لكن ما شفت على ارض الواقع اذا في شخص يفيد ونستفيد ؟