ياجماعة بالله عليكم ،، لنا وقفه

[شقاوي]

أسعد الله مساكم وصباحكم
ياجماعة ... أنا لي لايقل عن 24 سنه وانا اطلع البر واصيد واستانس واطلع مع ربعي واجي معهم ونروح هنا وهناك واسمع سوالف ، لكن مثل سوالفكم ذي والله مامرت علي .. واحد يبشّر بالنزل في هالوقت والثاني يقول الدخّل نَزِل والثالث يطبخ سمك وبرياني والرابع يدوّر (أم صتيمه) يبي يقنص بها والخامس يبي يشتري شي اسمه مخباط !!! وش السالفه ؟؟

[الطرقي]

كلٍ علي همه سري
وأنا علي همي سريت

[السمح]

والله كلامك عسل يا شقاوي ولا عليه غبار يا الله عطنا من المواضيع الحلوة اللي تنادي بها.

[شقاوي]

ماعندي مواضيع ، عندي برياني والحلا تطلي والهوى شمالي .. تبي ؟

[نشـمي]

زين عطنا من البريااااني

[وليـد]

انا شميت ريحت السمك


ودي بواحد

بس


سفري

[الساري]

شقاوي .......وش ناوي عليه يا مدمن البر.........؟؟؟؟؟؟؟

[الخبير]

السلام عليكم يا جماعة
شكلك يا الشقاوي مالك في البر وعلومه وشكل طلعاتك مجامله.
انا كنت مثلك كنت انا وشباب نسمع بشئ اسمه البر ونستحي نسئل الناس وش البر ، وش ناخذ معنا خفت يقولون رجال وماتعرفون البر.
المهم قررت انا والشباب نطلع للبر المهم تدري وين طلعنا اهل الرياض يبون يعرفون هذا المحل زين, محلنا يالحبيب كان قدام مقهى الخيام الي بين دوار الثمامة الاول والثاني، متكين قدام البقاله كلما نقصنا شئ رحنا وخذناه من البقاله ، لين لقينا اثر ما عندنا سالفة ما جبنا سكينه ولا كباريت وما كان عندنا إلا كسرتين حطب .
والحمد لله الان مدمن بر تلقاني بعض المرات اطلع للبر بالحالي اتمشى حتى في الصيف ( يا والله المزاج بهذا الحر).
المهم كل طقه بتعليمه والشباب ما يقصرون تبادل خبرات ومعلومات، واي شئ تحتاجة اسئل ولا تخاف يا اخوك ترى الانسان ما يولد متعلم .
ملاحظة : الصيد اذا اكثرت منه ادمنت عليه

[السمح]

الظاهر يالخبير إني قد مريت عليكم في المكان اللي وصفت وأنا طالع لجو الثور بالصمان وحتى قلت للي معي تعتقد هذولا كاشتين فرد علي ليش ما يخيمون بالبطحاء .. مجرد دعابة في زمن الحزن ..