هل يوجد محلات لتأجير الجيوب

[محب الشمال]

اخواني اعضاء مكشات حفظهم الله جميعاً

عندي استفسار وهو هل يوجد في مدينة الرياض محلات تاجير الجيوب مثل الباترول الربع او الجيب الربع الاندكروزر
لانه صراحه ما عندي جيب الحين وودي استاجر جيب مرات لما نروح مثلاً للصمان ولا لمكان بعيد لمدة كم يوم
وتعرفون البر يحتاج جيب بعد توفيق الله تعالى

يا ليت اذا احد عنده اي معلومة يعطينا خبر عنها من حيث السعر وهل يطلبون كفيل او مبلغ مالي احتياط

ولكم مني كل التقدير والاحترام والله يحفظكم

[بو خليفه]

موجود ذيب لتأجير السيارات عنده جيب سفاري و اليوكون و أظن لاندكروزر أما الربع لا أتوقع أن تجده

[الشقردي]

أنصحك انك ما تجرب لأنها غير مجديه اقتصاديا على الاقل اذا لقيت ب250 الى 300 واحسب زود الكيلوات وسيارة تخاف يجيها شئ وتبلش بها
هذا رأيي

[anas]

انا كنت استأجر سيارات جيوب من بدجت فقط للتطعيس عن طريق اخي الموظف في ارامكو لأنهم يعطونهم خصم زين فمثلا استأجرت باترول 180 ريال فقط ولاند كروزر 220 وباث فايندر 150 وكان الباث قير توماتيك ... واذا كنت خايف لا يكشفونك المحلات انك طعست بالسيارة راس مالها 10 ريال تغسيل ابو هنود يرجعلك السيارة جديدة ....
أما أجار من غير الخصم من بدجت طبعا : اللاندكروزر 240 والباترول 350 والسوزوكي xl7 ثلاث صفوف مقاعد فل كامل مراتب جلد ومثبت سرعة وفتحة الخ فقط 250 ريال وطبعا كل سيارة زود عليها 50 ريال اقل شيء حق البنزين .

وتبغى نصيحتي فأنا جربت التأجير والشراء وأفضل التأجير من شراء سيارة .

[nahham]

تبي الجد ما انصح في التاجير

وانت ورايك

[عاشق المزون]

تبي النصيخة الزينة مرة مايجتمع بر وكنز دراهم هذي قاعدة مكشاتية
طلعة البر تكلف اكثر من طلعة سفر الى اورباء اذا بغيت تستانس من جد
وذا انت مو مصدق حسب من السيارة الى الواير .....................الخ

[محب الشمال]

مشكور اخواني الاعضاء والله يجزاكم خير
بي انا ما عندي سياره جيب والبر محتاج جيب وزي ما انتم عارفين الشخص يحب يسوق مرات بالبر عشان القيادة بالبر ما شاء الله تبارك الله حلوه
وبالمناسبة عندي شي ابي اخذ رايكم فيه
عندي جمس موديل 2001 فل فتحه مراتب جلد ماشيه ميه وعشره الاف كيلو ويجيب حسب علمي من ستين الى سبعين الف ريال
ولقيت جيب باترول مخمل موديل 99 يبيه راعيه ب 48000 ريال وش رايكم ؟؟؟
مع انه ما ودي ابيع الجمس لانه انتم عارفين يخدم البيت وللسفريات بأذن الله تعالى
الله يحفظكم ويرعاكم ويسهل لنا ولكم

[حرباش]

أخوي محب الشمال

انا بايع جمس قبل شهرين ( نهايه الإجازه) نفس مواصفات السوبر اللي عندك في معارض الشفا بـ 82 ألف
وكان ظيف جدا وماشي قرابه 150 ألف والمواصفات كتالي
1- حجم 25 .
2-فتحه في السقف.
3-مراتب جلد.
4- مكينه 8100 .
حبيت اعطيك فكره عن الأسعار عشان لا يقصبونك الشريطيه ، يعني دون 75 لا تفكر تبيع ، والإجازه جايه وبتجيك بيعه حلوه ان شالله

وبالنسبه للباتروول انصحك بالموديل 2002 وفوق والمكينه vtc 4800 وسعره في السبعينات وطالع حسب المواصفات

والله يوفقك ويرزقك ان شالله

تحياتي لك

[بو خليفه]

بيع الجمس و أشتر بداله بنفس الموديل دفرنشين و احتمال يكون فارق كبير في السعر بزيادة 3000 ريال و الأفضل اشتر قبل ثم بع حتى لو كان الفارق كثير

[الكونترولCONTROL]

تؤجر الجيوب في الرياض . و لكن ليسوا حريصين على التأجير ايام الخميس و الجمعة
=========================================
و يتهربون كثيرا كذلك ايام المطر ما يؤجرونها ..... و السبب : بصراحة شفت لي جيب مستأجر مرة سوبر سفاري
من (( ..... )) على ما اعتقد ..... تمنيت اني ما شفت الولد عمره 15 سنة !!! و هو يلعب بالسيارة تقول دباب ....
=======================
صراحة البطال يخرب على الطيب كثيييييييييييييييييييييييييييييييييييييييييييييييي ييييييييييييييييييييييييييييييييييييييييييير و الله المستعان
--------------
و لا يفوتني ابارك لصاحب الموضوع و الجميع بالشهر الفضيل
================================
اللهم اصلح احوال اخواننا السنة في العراق !!!
================================================== ======

[محب الشمال]

ابو هبال الله يبارك فيك وفي جميع الاعضاء والله يعوده علينا وعليكم بالخير والبركات وكلامك سليم البطال يخرب على الطيب
بو خليفة شكراًَ لمرورك واذا الفرق 3000 ريال ماهو ذاك االفرق
حرباش شكراً على النصحية وصراحه الجمس زي ماقلت لكم زين للعائلة والبيت زين
وانا افكر ابيعه واشتري لي باترول ربع سلقه موديل 2006 واعطيهم قيمة بيع الجمس واقسط الباقي عليهم

اكرر شكري وتقديري لمروركم