أريد النصيحة

[ذيب حضن]

السلام عليكم ورحمة الله وبركاته
الاخوة الكرام ابغى غمارتين دبل جديد وش آخذ بكل صراحه انقلب راسي

[السياسي]

وعليكم السلام ورحمة الله وبركاته ....
والله اني مثلك ... محتااااااار ... ومتردد ... وخايف اندم ولا اتحسف ..

انا كنت ناوي باثفندر 2005 .. وفيه موضوع عنه لي هنا ... شفتوه ... بس غالي مررة .. بصراحه
-------
وقلت ما لك الا غمارتين .. [[ هايلكس -- آيسوزو (ديماكس) -- ددسن ]]

الهلي والددسن معروفات .... بس نبي تفصيل كامل عن الديماكس الدبل 2005 ..
اليوم كلمت على العيسى وسألته عن أسعار الديماكس غمارتين ..-دبل- تيربو - بخاخ -
قال :
العادي 73000
التماتيك 78000
تقريبا

بس انا ودي بمعلومات أكثر وأكثر عنه ..
-- يزعج ولا لا ... انا خابر الديزل مزعج ..
-- يكربن ولا لا .. .. .. .. .. يكربن ..
-- عزمه وسرعته وقومته ؟
يا ليت اللي عندهم خبره فيه واللي معهم ديماكس 2005 يعلموننا ..
----------
وجزاكم الله خير

[حـاتـم]

السلام عليكم

اخواني الاعزاء

انا جربت الددسن 2005 بنزين الدفرنسين_دبل
وجربت الهايلكس 2005 ديزل_دبل

ركبت الددسن اكثر راحه من الهايلكس وكلها ترى مهنا زود راحه

بس الددسن طامن ولايخوف
الهايلكس رفيع ويخوف فالملفات والنفود

اما عن عزم وقوه الدفرنسين الهايلكس البنزين مادري عنه

بس حنا معنا ددسن دفرنسين وماشاء الله

قوه وعزم ويمشي بالنفود ممشى حلو جدا جدا بشكل ماتتوقعه مع انه 4 سلندر

وانا مجربه

واي استفسار عنه انا حاضر

اخوكم / حاتم

بس اعذروني الهايلكس ماجربت الا الديزل منه

[محتري السيل]

الله يجزاك خير أخوي حاتم

وأنا كذلك قروشي والمة ومحتار بين الددسن والهايلكس 2005غمارتين 4x4

وقناعتي بالددسن أكثر لرساوته وأرتفاعه الطبيعي عن الأرض

عندي سيارة ثانية سيدان مخليها داخل البلد والغمارتين أبيه لطلعات البر بس ...

صحيح أن غمارته الخلفية ضيقة ولاكن يمكن تفاديها بتقديم السيت الأمامي شوي

وأذا مافيه أحراج .... أبي سعر الددسن جديد 2005 غمارتين 4x4 بكم وفي أي معرض

سبق وأن ذكر أحد الأخوة ان هناك معرض في الرياض أسمه معرض نجد ويقول سعره ب 59000

لاكن حبيت أتأكد وانا من أهل الشرقية وعندي أستعداد للذهاب للرياض لشرائها

[حـاتـم]

ياهلا وغلا اخوي محتري السيل(( الله يجيب السيل ))

سعر الددسن ال2005 صحيح 59000 الي يجي قزاز تماتيك وطاره هواء ومكيف طبعا وبخاخ طبعا

اما الددسن ال2006 سعره الدفرنسين يبدا من 63 تقريبا ويختلف من معرض لمعرض

وصدقت غمارته الخلفيه ضيقه وكلامك صحيح عن تقديم المراتب الاماميه

واي استفسار انا حاظر

اخوكم / حاتم

[محتري السيل]

مشكور وماقصرت أخوي حاتم لاعدمتك

ما شاء الله تبارك الله ... موترك اللي في الصورة نضيف ومرتب

ودي أسألك عن الجنوط اللي على موترك كم سعرها وهل نوعيتها جيدة وقوية ومافيها رجة

لأني ناوي بمشيئة الله بعد ما أشتري الددسن أركب له جنوط وكفرات عراض ميشلان


الله يوفق الجميع

[جمار]

كلام الأخ الكريم حاتم عن الددسن حقيقة ولا يهونون بقية الأخوان وانا معي ددسن 2005 دبل غمارتين ادخل به اماكن تفكر الجيوب اكثر من مرة قبل دخولها وبالذات بالدهنا وموتري بدون أي اضافات .
تحياتي للجميع

[محتري السيل]

الله يجزاك الف خير أخوي جمار على التوضيح خصوصا من شخص مجرب

والله يكتب اللي فيه الخير

[البرحه]

خذ لك هايلكس ولاتتحسف ان شاء الله

حتى لو ما جاز لك ماسك سعره وعليه طلب خاصة 2004 2005

اما الددسن والله ان ينشب بحلقك