وش رايكم بهالسياره

[السعودي]

السلام عليكم جميعا ,,,

ياشباب انا رايح وطي مع الجمس الونيت قطع عشره دفرنسين ثمانيه سلندر ,ودي باللى مجربه يعطيني شويه معلومات عن دبله وخراباته وملاحظاته بصوره عامه عن هالسياره واللى خابر لي موتر مثله من موديل 93 وفوق نظيف بسعر معقول يبلغني على بريدي :mon9e7@hotmail.com

شاكر ومقدر لكل من يتفضل بالرد .

[جــلــمــود]

السلام عليكم

اخوي السعودي كيف الحال

الجمس لا يقربك اذا لقيت البديل اما اذا مالقيت البديل الشكوى لله طقه

وبديل الجمس الونيت الدفرنسين هو الشاص او ونيت نيسان باترول قارن بينها والي يجوزلك طقه

الجمس من ناحية المنظر والمركب وخر عنه واذا كنت تدور المركب المريح والمنظر الرايق ولا تفكر بصرف البنزين خذ جمس

اما اذا كنت تدور الونيت العملي الي يبرد الكبد بالرمل والبر ولا يهمك راحته او منظره عليك بالشاص التويوتا او الونيت النيسان لان الياباني اقل صرف بنزين واقل اعطال واضمن ويمسك قيمته نوعا ما

ودبل الجمس جيد بس لابد من ملاحظة الزيت فيه والتهريبات هو والقير من فتره لفتره

القير لامن صار عادي يبري العله بس عساك اذا نويت على جمس تتوفق بالنظيف منهن

ومن اهم الملاحظات على الجمس ارتفاع حرارته بالرمل مع استخدام الدبل وزيادة الدعس على البنزين


واي استفسار حنا بالخدمه يا السعودي

[السعودي]

تسلم ياجلمود على النصايح , بالنسبه للياباني فهو اكيد ازين واقل صرف للبنزين لكن انا ادور طال عمرك المركب والراحه وابشرك بعد اني من النوع اللى يحافظ على موتره ولايكرفه ويكشف على زيوته كل فتره يعني انشاء الله مافي مشاكل معه .
شكرا مره ثانيه اخوي.

[جــلــمــود]

اجل توكل على الله يا السعودي

اذا انت من هالنوعيه يعني استخدام السياره عندك بالبلد اكثر من البر او اهم من البر فالجمس مناسب

لانه بيني وبينك بالخط عز الله انه موتر ومركبه مركب شيوخ وبزته كنك على حصان

وعليك بالنظيف مهما غلا سعره اذا كنت متأكد من نظافته ميه بالميه وممشاه واذا دورت انشالله تبي تلقى

وابتعد عن الاستعمال الامريكي واذا حصل وارد الزاهد ( ارامكو ) تراه افضل لانه عليه صيانه دوريه وبعضها مايجيها استخدام كثير لذلك تلقاها ماشيه شي بسيط او معقول وتلقاها نظيفه بالحيل

ولو تاخذه من الدمام احسن فض حالك اسبوع ورح دور على رواقه بالسوق وبالمعارض حتى الي تلقاه بالشارع حاول توقفه وتشوف عن نيته بالبيع

وابدا ماعليك افحص الشاصيه حقه كثير منها يجي شواصيها مطعجه

ولا تنسى الدبل بالفحص والماريه شبكته وفصلته اذا جت سليمه وسلسه وبدون رجع قدم ومعاسر فهاذا مواريه طيبه

وعليك بالخمس وتسعين والست وتسعين تراها افضل مانزل لانها متغيره طبلونها الداخلي وديكورها بالكامل ونظام القير فيها متغير حيث انه يجي خمس نمر + كبليتر اكتروني ( نصف بخاخ )اما قبل الخمس وتسعين يجي ثلاث نمر لذلك يصير غير مريح بالخط نوعا ما وكبليتر عادي , والسبعه وتسعين ومافوق يجي نظام المحرك معقد شوي لانه فيه كمبيوتر وتعقيد لا يقربك خرابه واجد


واذا بغيت تاخذ قطع عشره يجي ست مسامير الجنط

واذا بغيت تاخذ كامل تراه يجي ثمان مسامير بالغالب ولكن فيه نوع يجي 6 مسامير دفرنسين وهو كامل وهذا ان لقيته فهو عز الطلب لانه اخف وابرد من الثمان مسامير الدفرنسين الماريه الفيبر الاسود الي فوق الكفر هذا يجي على الثمان مسامير بس


من ناحية المحرك كلها 350 لا الثمانيه مسمار ولا السته مسمار ولا الطويل ولا القطع عشره


لكن الله يعينك على صرف البنزين اذا كنت راعي مشاوير والله الله بالصيانه وتفقد الموتر من فتره لفتره
واحرص على التربيط بعد كل موسم بر



واي شي حنا بالخدمه

[عاشق الصحراء]

جزاك الله خير جلمود ما قصرت مع الاخ السعودي اعطيته
العلوم وافية.

الاخ جلمود : وش رايك بالموديلات الجديدة 92 و فوق
مهي احسن من ال83 لاني اشوف السعودي رغبته 83
انا كان عندي 85 (حجم 10 )انكسر شاصه ثلاث مرات
و لاحظت كثيرين انكسر عندهم شاصه خاصة حجم 10.

لذلك انصحك يالسعودي تاخذ من الموديلات 92 و فوق
لان القير سرعاته خفيفة, و ينقل عزمه بسرعة اما القديم
اعني 83 فثقيل .و تر تحصل بالشرقية اذا وصيت راعي
معرض صاحب صديق يدورلك .
ما على كلام الاخ جلمود زود و ما ادري يا جلمود وش
رايك بكلامي صح او لا

[العيد]

خذ كلام مجرب الجمس الجديد من 95 وطالع تقريبا انحلت كل مشاكله لا حرارة ولا صرف بنزين وعزم المكينه فوق الممتاز يشيل وزنه وزيادة ولكن الياباني افضل في التحمل نادر ما يطلب وزنه خفيف ينفع للمطامر صناعته اكثر جودة يعني ممكن تخرب قطع بالامريكي بسبب سوء التصنيع لا يمكن تخرب بالياباني ..............وبالنسبة للدبل الدفرنس الامامي يشبك على كهرب ما يحتاج تركب فرارات لكن عمرها مهما كان لا بد يجي يوم يخرب البلف وتقعد تدور واحد يسحبك .خلاصة الكلام والتجربه ان الجمس مع الصيانه والمتابعة مناسب جدا ورغبتك هي اللي تحدد نوعية السيارة اللي تناسبك وكانك تبي الفكة من الصيانه والغثا والتربيط كل سنه ومقصات واذرعة وشغلاتها خذ ياباني وغمظ

[السعودي]

سنايدي والله ياجلمود ماقصرت كفيت ووفيت ماشاء الله عليك خبير بالجموس . الاسبوع الجاي انشاء الله بروح للدمام وادوره .

أخوي عاشق الصحراء انا اللى ابيه من 93 وفوق ما ابي القديمات لاني مابلعتها ابد .

أخوي العيد جعل ايامك كلها عيد , ابشرك اني راعي صيانه ومحافظه على السياره يعني انشاء الله بيمشي معي هالموتر .

[جــلــمــود]

ياهلا والله بالسعودي وعاشق الصحراء والعيد

الاخ عاشق الصحراء

كلامك بمكانه ينطبق على القديم
والجديد من 89 وفوق مايفرق كثير من ناحية الشاصي ولكن الاستخدام هو الي يحدد سلامة الشاصي

والجديد الخمسه وتسعين والسته وتسعين هي افضل ما نزل اما قبل هذا الموديل ففيها ملاحظات
مثل القير ثلاث نمر فقط والكبليتر نظام عادي يسحب بنزين ويشررق ويحتاج وزن يدوي
ولكن خمسه وتسعين ديكور داخلي مختلف + ايرباق وخمس غيار القير العادي والكبليتر اكتروني مايشرق ولا يحتاج وزن يدوي لانه يزن نفسه اكترونيا اما السبعه والثمانيه ومافوق فهو نظام محرك فورتيك معقد ومطور وبه كمبيوتر نوعا ما معقد

والفرق بين الثلاث سرعات والخمس سرعات في القير ان الخمس سرعات اريح بالخط وبالمدينه



الاخ العيد

كلامك صحيح ولكن الدبل الاكتروني او الازرار يأتي على الانواع الاخرى مثل اليوكن والصالون ومن موديل 98 وطالع اما الونيت فغالبا يأتي دبل عادي بذراع تغيير مثل باقي الدفع الرباعي ويأتي الونيت بدبل ازرار اذا كان فل كامل فقط

ومن ناحية الحراره فهي ثابته بالمدينه والخط ولا تتغير ولا ترتفع بالزحام ولكن مع تعشيق الدبل في الرمل وزيادة الدعس على البنزين بشكل متكرر يرفع من معدل الحراره بشكل ملحوظ بجميع الموديلات ,


الاخ السعودي

على البركه مقدما ويعطيك خيره ويكفيك شره يارب

واذا شريت الموتر نقلته بأسمك انشالله عطنا خبر نباركلك وفيه اشياء بقولك عنها بس ماهو اللحين تبي تفيدك انشالله بموضوع الحراره وزيادة عزم الموتر .



جـــلــمـــود

[القناص]

السلام عليكم
يازين ذا الموضوع
الله يعافيكم

[المكنيكي]

المحرك الجمس حوال 180 حصان اما محرك التايوتا حوال 160 حصان هنا فرق
الدبل في الجمس يكون كهربائي ( مغناطيس ) والدبل في التايوتا عادي او ترس
صرفية البنزين تقربا ما هناك فرق0
الجمس عدد البلوف في يعني الصببات 16 بلف اما في التايوتا يكون 24 بلف في 6 سلندر اما 8 سلندر في التايوتا يوكون 32 بلف وهذا مما يزيد القوة
وهناك فروق اخر في السرعة وقوة تحمل تروس السحب 0
والجمس يكون عرض في التحميل الى اعوجاج الشاسية بين الغمارة والحوض ولا هذا

[بليزرمثل الليزر]

يا أخي الي يسأل عن التجربه بالنسبه للجمس
اسمع كلامي ولا انت خسران
السيارات الامريكيه ليست كأي سياره مثل اليباني او اي نوع من الشركات بتسأل ليش
مع تجربتي الاولى كانت مع ددسن ثم جمس موديل 83 وقوة 450 ثم سياره صغيره كرولا ثم كابريس ثم جيب شاص ثم سفاري ثم كامري الحقيقه السياره الي ارتحت لها هي السياره الامريكيه لا تفهموني غلط
اولا سهولة في التصليح قويه طويله في التعمير كذلك سريعه ايضا انت بنفسك تعرف تصلح فيها اذا احتاج الامر ذلك
انا انصح كل شخص بقتنائها لكن مو كلها اولا الجمس سواء دفع رباعي او عادي من 83 الى 94 قمه في الاداء الكابرس 79 و 81و 84 89 90 93 94 قمه في الاداء البليزر جميع انواعه وموديلاته متفوقه الى آخر موديل2002 اما غير ما ذكر فلا تفكر والسلام ختام
اخوك سيا رته الحاليه بليزر94 جلت به ديار والله الشاص من طويله الى جديده والسفاري ما يروحها
ومتمسك بهذه السياره الى يومنا الموعود0