الباثفندر ولا الفورنر ...ولا الراف فور؟؟؟

[::الرهيب::]

السلام عليكم..

هلا شباب...

حاط في بالي كم (جيب) ناوي أشتريه...

واحترت..

واحد يقولي الباثفندر حلو وعزم

وثاني يقول الفورنر ماكينته قوية وأقوى من الباثفندر..
وتويوتا أحسن من نيسان........إلخ..

وكذلك الراف فور...إلخ..

أنا أبغى رأيكم..

@@واحد ناوي يشتري (جيب)
أسعاره تتراوح بين (75-85)
يطلع به البر..بس مب حق تطعيس(يعني مسكات تطعيس).. :d ...ولا مقاومات..

وأتمنى يكون من كل النواحي
مثل
- القوة
-التحمل
-العزم

.......وأنتم أبخص بالمواصفات..
@@ ووش رايكم..أشتري هالجيب (قير عادي- ولا تماتيك)...؟؟؟

@@ وهل أشتري مستعمل ولا وكالة.؟؟

تحيـــــــــــــــاتي

لكم...

أخــــــوكم
الرهيب

[الربذي]

السلام عليكم
اولا الفوررنر انقطع من السعوديه من 95 ومكينته حقت هايلوكس وكان معي مايعرف حاجه اسمها عطال لكن ثقيل ومايتعدي 130 بالسفر
واباث حلوه بس ماهي صبوره والراف صغير مره وغالي وماهو قوي يعني ماينفع بالمساعدات والجر وغيرها وصغير ماياخذ عفش
والقير العادي احسن واصبر
وكاله لن تجد بهذا السعر جيب عليه الاسم
وانصحك خذ لاند مستعمل قليل اعطال والبيعه مايخسر واجد والكل زباين له
اخوك

[شعيب عبيثران]

اخوي باالنسبه للسيارات المعروضه فأفضلهن الباث من ناحية الشكل والراحه والقوه
اما التحمل لو كانت رجلك حاره عليه فهو لن يتحمل طبعا اتكل وخذلك باث
اما باالنسبه للعادي والتوماتيك فإذا انت راعي بر 24 ساعه ( طعوس ) فخذلك عادي لانه اقوى
اما من ناحية المستعمل والوكاله فإذا كانك من راعيه الى البر فخذلك مستعمل .
اخوك : شعيب عبيثران

[تحت الظل]

أخوي الرهيب

اذا كنت تبي الزين فخذها من عندي ... مالك إلا الباثفايندر ( بالنسبة للمعروضات أكيد )
حلو وقوي " وعزم " وخراباته موب واجده .. اللهم إلا مساعدادته يمكن ... تقدر تغيرها بأرخص من الوكالة وافضل بكثير ..

(( وتصبر للمعلوميه )) .. من 2003 وفوق والماكينه أقوى وافضل ..

اما مشكلته ( قطع الغيار ) .. غاليه شوي لبعض القطع .. لان وكيلها محتكرهن ..

..

والسلام عليكم ..

.
.

[سدير2008]

باث 2006 نصيحه خذه

[مروق]

اذ تبي سيارة عصريه للمدينه رزة غير طبيعيه .. وسيارة مطامر طعوس .. وذفه بين قوسين

انصحك بالراف فور ... نازله هالسنه بمكينه ست سلندر .. وعليها شكل مميز بقوة .. ولاتنسى متانه تويوتا

[الذيب الشهب]

انصحك بـ(ابو بندر) الي هو باثفيندر انا معي واحد جديد وكاله قير اتوماتيك مايرده مرداد

[::الرهيب::]

السلام عليكم...

معليش شباب
تأخرت في الرد..
كنت طالع أمس شعيب (الطيري)...
ومادخلت المنتدى.....

وماشاء الله الردود واجدة...الله يزيدها..

الربذي
هلاو الله أخوي
شاكر لك ردك..وتوضيحك..
بالنسبة للفورنر نزل 2005 أو 2006
واحد يقولي إنه عزم ومكينته قوية...!!

شعيب عبيثران
حياك الله..
والله في بالي الباثفندر...

تحت الظل
هاذي مشكلة الحمراني...
والله سياراتهم حلوة..بس إحتكار...

سدير2008
والله الباثفندر 2006 ما أعجبني شكله مرررررررررة...
أحسه ماينفع بر...واصطباته من ورا...شكلها شين..<<--وجهة نظر..

مروق المنجا
والله الراف فور مشكلته صغير...
بس عندك صور للـ2006
لأن 2005 ما خش مزاجي شكله...!

الذيب الشهب
والله شكله أبو بندر........



يــــا شباب إذا فيه أحد ينصحني بـ(جيب غير اللي أنا حاطهم)وحول الأسعار اللي كتبتها
يقولي.....

وشكـــــــــراً

[غضنفر]

الاند زين بس المشكلة الدراهم
165 الف لل جكسار فل
بها المبلغ تقدر تشري باث ب 80 + لومينا ب 60 = 140
الباقي ( 25 الف ) تحطها في محفظة اسهم

[::الرهيب::]

هلا والله أخوي
black path

من جد غالي....

بيني وبينك..يستاهل..إذا كنت مقرقش...

بس حنا خلنا على (الباثفندر والشلة..... )

إلا على طاري الباثفندر
تتوقعون ينزل سعره في المعارض..بعد نزول 2006؟؟

تحياتي
الرهيب

[غضنفر]

مقرقش ولا منب مقرقش
165 الف ثم اروح العبه في الطعوس معصي والله
اما بالنسبة للسعر اتوقع يرتفع في البداية مثل الهلكس

[العشة]

انا مع راعي سدير خذ لك باث فاندر 2006 ولاتشاور

[salehhd]

السلام عليكم

بالنسبة السيارات ممتازات لاكن يعيب على الفرنتشر والراف فور السعر المبالغ فيه والمحرك الضعيف بالنسبة لل4 سلندر

واليك بعض مواصفات السيارتين
فرنتشر 2006
تاتي بمحركين الاول 2.7 لتر وهو نفس محرك الهايلوكس ويولد 157 حصان اما الاخر ف4لتر يودل 240 حصان وهو نفس محرك البرادو
تحمل نفس شاصي الهايلوكس وبها 3 صفوف من المقاعد وحسب علمي ان سعرها يبدا ب85 الف ريال للاربعة سلندر ويصل فوق ال100 الف للسته سلندر والسيارة جديدة في الاسواق ولم يتضح اي شيء عن الاعطال ولاكن تويوتا ماينخاف عليها


بالنسبة للراف فور محرك 4 سلندر 2.4 لتر يولد 166 حصان ( نفس مكينه الكامري ) فنزل في الامارات لاكن بمحرك 4 سنلدر وحسب افادة الي خبرني ان سعر الفل 106 درهم للاربعة سلندر تخيل
اما 6 سلندر فمحرك 3.5 لتر يولد 269 حصان وهو نفس محرك الافالون وبصراحة محرك جبار لاكن سعرة اكيد يبوصل سعر البرادو وعلى فكرة صار 3 مراتب



اما الباث اذا كنت تقصد الموديل الحالي 2003-2005 فهو محرك 3.5 لتر يولد 250 حصان للعادي و240 للتماتيك وهو نفس محرك الزد والالتيما والانفنتي وحاصل على تصنيف افضل محرك لمدة 10 سنوات متتالية وبه صفان من المقاعد وسعرة من 79 الف ريال وانا امتك هذه السيارة وبصراحة قمة في القوة والعزم وتعتبر من افضل الجيوب المتوسطة هي والشروكي ويكفي انها صناعة يابانية كامله




اما الجديد فهو موجود في امريكا ن عام 2005 وياتي بمحرك جبار 4 لتر يولد 280 حصان وهي نفس قوة الباترول الحالي ويمتاز بالتغيير الجزري في الشكل والاتساع فهو يشبة بشكل كبير شقيقته الكبرى الارمادا وبه 3 صفوف من المقاعد ونظام الدفع المستمر وسعرة حسب ما سمعت راح يبدى من 90 الف ريال



في رايي الشخصي ان تستبعد الفورنشر بسبب شكله الغير مقبول نوعاً ما وسعرة المبالغ فيه مقارنة بالمنافسين


هذا مالدي وانصح بالاستخارة فما خاب من استخار والسواقة التجريبة تريح الواحد

وبالتوفيق ومبروك مقدما

اخوك
صالح
<!-- / message -->

[ابوقاسم]

انا اشوف ان الباثفايندر هو الاختيار الامثل ........
ولك القرار

[Abo Nader]

و الله ما عقب لردود الشباب مكان لرد لي خاصه بعد رد salehhd و لا يهنون الشباب

بس معلومه صغيره الظاهر الباث الجديد السياحي الي يبدا من 90 ألف دفرنس و احد مثل ما قريت من الباث النسخه الأمريكيه 2006 يعني إذا كان الكلام صحيح يمكن الدفرنسين يصير 95 ألف و هو يبيله شهر ونص على شان ينزل على كلام الوكاله