تسخين السيارة غير مطلوب مثبت بالمصادر والصور من الكتلوجات

[هيف راعي كيف]

كنق بيض الله وجهك على الترجمة

بالنسبة لي يقولون لي حم السيارة ماحميتها ولاعمري جاء ببالي اني احمل ومافي امل>>ماعندة وقت

نظامي طقها والحقها ومااذكر تعطلت المكينة او تغيرت علي عشان التحمية!

[محسن اليامي]

يااااملا العافيه أخوي كنك التعديل والله اني مستفيد من مواضيعك المميزه جزااااااك الله الفردوس الأعلى
وعندي سؤال خارج موضوع التسخين الله لا يهينك

كيف طريقة تشغيل الباترول 2003
هل اشغل على طول
أو انتظر علامة AT CHECK لما تطفي
أو انتظر حتى ينتهي صوت طرمبة البانزين
هل هناك طريقة صحيحه
مشكور ويعطيك العافيه ننتظر الإجابه منك مبهره بالدليل

[مقناص الشمال]

موضوع قيم ومتميز

طيب بالله اذا فتحت الرديتر ولقيت المي جامد وش تسوي ..... هل تعتقد 20 ثانيه تميع هالثلج

وتعرفون أجواء الشمال وخاصه بالمربعانيه ... اللي مايحط مي احمر .... يقعدبها ( يجمد بالمربعانيه المي العادي والأخضر )

والصور من تصويري






طيب وش تنصحنا نحرك السيارة بعد 20ثانيه ....

تقبلوا حترامي وتقديري

[Rb33]

مشكووووور يعطيك العااااااافيه

[جبل حراء]

نعم هذا الكلام

بالنسبة لي لما اشغل السيارة انتظر فقط لما تطفي لمبات الطبلون التحذيرية وانتظر عليها عشر ثواني وامشي بهدوء

يعطيك العافية جبت أدلة دامغة للي مايقتنع

[عشق البر]

اخوي كنق التعديل كلامك صحيح 100% ووكالة بي ام دبليو انفسهم يقولون لا تسخن السياره

بس فيه شي مهم وهو السيارات الكربليتر تحتاج تسخين الى مايصير الموتر صافي
واذا مشيت بدون ماتحمي الله يعينك على التقطيع والخرابات اتمنى انكم تنتبهون ياصحاب الكربليتر

[شيهوب]

يعطيك العافيه معلومات قيمه ومفيده جزاك الله خيراً

[عشق البر]

موضوع قيم ومتميز

طيب بالله اذا فتحت الرديتر ولقيت المي جامد وش تسوي ..... هل تعتقد 20 ثانيه تميع هالثلج

وتعرفون أجواء الشمال وخاصه بالمربعانيه ... اللي مايحط مي احمر .... يقعدبها ( يجمد بالمربعانيه المي العادي والأخضر )

والصور من تصويري






طيب وش تنصحنا نحرك السيارة بعد 20ثانيه ....

تقبلوا حترامي وتقديري

عزيزي مقناص الشمال الهدف من تحمية السياره هو تحمية زيت المكينه مهب ماء الرديتر وغير ان الماء اللي داخل المكينه يحتمي بسرعه عكس اللي بالرديتر نفسه اللي مايسخن الا اذا فتح البلف

واهم شي لا تحط زيت 20-50 وامورك طيبه مع الصقيع

[وثاب]

موضوع قيّم متعوب عليه

الله يجزاك خير ويبارك فيك

اخوي عنده كابرس 2007 ما اذكر انه حماها او انتظر لمبات الطبلون تطفى ولا اذكر ان المكينه جاها شي الى هاليوم امرها تمام ... ما شاء الله تبارك الله

واقوله لا تخرب سيارك حمهّا ... يضحك ويقول انا مضريها ... تعودت !!!!!!

[قدر مكتوب]

مشكور اخوي كنق التعديل بصراحه موضوع مميز واهنيك على اختيارك لهالموضوع في مثل هالوقت ودعمت موضوعك بكلام الصانع

حبيت اعقب على كلامك , واحد من الشباب معاه مؤهل عالي في الهندسه الميكانيكيه ودارس بعلم السيارات وتصميمها وشغلها وسالته مره قالي بالحرف الواحد لاتحمي وماجاك عندي

[مكشاتي بقيق]

اخوي كنج مصدق وانا اخوك
لكن الواقع غير ذلك ومن خلال تجربتي
المتواضعه ان عدم احماء السياره من احد
الاسباب الرئيسية في طقطقة البلوف
وهذي صارت لي ولواح من الزملاء
سيارتي ياباني وهو سيارته امريكي
مع ان احد المهندسين في الجميح قال لزميلي
ان التسخين هذا غير ضروري
والله تعالى اعلم

[هاوي ونييت]

كل عام وانتم بخير اخواني المكشاتيه
اخوي كنج التعديل يعطيك العافيه على المعلومات القيمة
كلامك سليم لكن الطبع يغلب التتطبع يعني الشغله وراثه لو تشغل السيارة لازم تنتظر دقايق اذا كانك عجل مره بعد
بصراحة لوتشغل سيارة احد الشياب وتمشي على طول الله يعنيك...
ولكم تحياتي//

[الأحمدي أحمد]

الله يعطيك العافيه على هالمعلومات اللي القيمه
بس عن نفسي ما راح تجيني قناعه الا لما انتظر خمس دقايق وبعدين احرك ( الواحد يكون بالسليم )
الشعب تعود على شغلتين واخذناها من شيابنا
انه ينتظر لين ما يسخن الموتر
واذا جا من خط طويل سفر ينتظر خمس دقايق ويطفي الموتر وهالشي تعودت عليه من قديم
لانه اذكر واحد من العيال طلع عنده صوت طقطقه بالمكينه البلوف ودخنه وطلع السبب انه يشغل ويمشي على طول ويقول عمري ما سخنتها برد ولا حر وهالشي خلاني اتأكد واتمسك بأعتقادي بتحميه الموتر قبل ما احرك للامد البعيد
تقبل مروري

بالزبط

رد وفر علي الكثير

[مبتغي]

بارك الله فيك

معلومات قيمه ومن المصدر يعني لاحد يجي يقول انا اسوي كذا

الله يعطيك العافيه

عن نفسي انتظر الى 3 دقايق تقريبا وبحد اقصى

[majeds]

"احماء المحرك ينبغي ان يكون عن طريق القيادة وليس عن طريق الوقوف,

ولاحمائها قد السيارة بلطف حتى يصل معدل حرارة ماء الرديتر ضمن المعدل الطبيعي"

دليل سيارات نيسان وانفنتي

السلام عليكم ورحمة الله وبركاته

وكل عام وانتم بخير

الكلام هذا غير صحيح شركات السيارات ودك تكون ضيفهم كل يوم
لو تسخين او تحميه السيارات مالها فائده ليش حاطين شفاط بنزين او مسخن بالسيارات القدديمه قبل الكمبيوتر الي يتحكم في رفع الاربي ام عند بروده المحرك

عندي انفنتي G35 اول ماتشغلها الاربي ام فوق 1 وربع وحصل كم مره كنت مستعجل اول ماتحط D تنقز السيارة وربطه الفرامل تنتع بالسيارة خصوصا اذا انت داخل البيت ولازم تعدل مع الخروج وتحتاج R
( القير اوتوماتيك)
بالنسبه للسيارات القير العادي باترول كربريتر كان ينتع اول مايزيد الاربي ام عن 2 ونص باي نمره
( اذا ماتحمت السيارة) يعني اول 5 كيلو من المشي اساسا وش تفرق تنتظر دقيقه ولا 5 دقايق
سيارة اخرى باترول ربع 2009 بخاخ اول ماتشغل الصبح وتمشي تلاقي الكلتش ثقيل والسيارة فيها رجفه على خفيف اذا ارتفعت الحراره كل هذي الاشياء تختفي
اعتقد هنالك لبس بين موضوع اعطاء المحرك والقير الفرصه في التسخين البسيط الضروري بعد اطفاء اللبمات وجرس التنبيه عند التشغيل
وبين تسخين المحرك الى ان يصل الى درجه حراره السيارة الطبيعيه الذي بنظري فعلا ممكن ان يضر السيارة والدليل اذا تركت السيارة تصل لهذه الدرجه تشتغل مراوح التبريد

استغل وقت التسخين في الاذكار الصباحيه والمسائيه والاستغفار هي الي تحميكم من كل شر ورصيد للاخره

تحياتي للجميع