أحببت أن أشارك إخواني في مكشات بهذه السلسلة المخصصة للتعرف على حبال السحب والإنقاذ، خصوصاً أن كثيرين منا هالأيام يجهزون العدة للكشتات الطويلة والقصيرة ومثل ما لا يخفى عليكم، ما تخلا الكشتات من بعض التغريز أو أحياناً التعليق واللي نحتاج فيها حبال السحب أو الإنقاذ.
ومن خبرة متواضعه على مدى سنوات، وجدت أن كثير من إخوانا يجهلون الفروقات بين أنواع الحبال، وأساس المشكلة إن عدد كبير من التجار أنفسهم أو العاملين في المحلات ما يعرفون أصلاً الفرق بينها وبالتالي ما يقدرون يفيديون الزبون أو بالأحرى يوضحون له الفرق بين الإثنين.
فمن هذا المنطلق، جاءت فكرة طرح هذه السلسلة المتخصصة في حبال السحب والإنقاذ عسى الله ينفع بها الجميع.
بداية لابد نعرف أن هناك نوعين من عمليات السحب اللي نحتاج فيها للحبال:
1. عمليات السحب بهدف الإنقاذ (Recovery)
2. عمليات السحب بهدف الجر (Tow) أو ما يسمى باللغة العربية الفصحى القطر
وبالتالي وبطبيعة الحال هناك نوعين من الحبال:
1. حبال الإنقاذ ويسمونها بالإنجليزي Recovery Rope أو Recovery Strap وهي خاصة لأهل البر يستخدمونها لسحب الموتر عند التغريز في الرمل ولا في الطين أو التعليق وخلافه.
2. حبال السحب أو الجر ويسمونها بالإنجليزي Tow Rope أو Tow Strapوهذي يستخدمونها لسحب سيارة متعطلة على الطريق المزفلت أعزكم الله وهو ما يسمونه السحب الحر وبالإنجليزي Freewheel.
نجي الحين للنقاط المهمة في الفروق بين النوعين:
الشئ الأساسي اللي نقدر نفرق فيه بين الإثنين هو:
حبال السحب (اللي هي رقم 2) يجي معها خطاف مثل السنارة تثبته على مكان السحب بالموتر. وتكون ضعيفة ولا تتحمل السحب القوي (النتع) بمعنى إن ما فيها خاصية التمدد وأكثر ما يجي (عندنا) من هالنوعية يكون على شكل واير حديد مغلف ببلاستيك، وأحياناً تكون حبل عادي أو على شكل حزام وهي سريعة الإنقطاع وخطيرة جداً والمادة الأساسية في تصنيعها في الغالب تكون البوليستر. وهذي بعض الصورة لها:
وهذي يا إخواني نصيحة من أخ لكم لا أحد يستخدمها في البر لأنها عدو للسيارة وعدو للناس وممكن تسبب الموت بكل بساطة...
شوفوا المقاطع هذي لا هنتم (للعلم: بعض المقاطع فيها موسيقى)
المقطع هذا اللقطة المهمة فيه من الدقيقة 2:00 إلى 2:30
بينما حبال الإنقاذ (اللي هي رقم 1) فهذي مستحيل يجي فيها شنكار وتكون لها نهايات دائرية يسمونها عيون (Eyes) وتكون بقدرات مختلفة ومقاسات مختلفة وتكون عريضة وقوية جداً وممكن تجي من عدة خامات منها الحزام والحبل وحتى أحياناً -ولكن بشكل نادر- الواير الحديد. طبعاً هذي الحبال بالإمكان تثبيتها مباشرة على القلص أو الشناكر اللي موجودة بالموتر أو نستخدم لها شناكر منفصلة نثبتها في مكان السحب بالسيارة. وفي الغالب النوعية الممتازة منها تكون مصنعة من النايلون وفي أفضل الأنواع فيها خاصية التمدد بمقدار معين. وهالنوعية من الحبال -بطبيعة الحال- يمكن استخدامها للسحب الحر Freewheel
وهذي مجموعة صور لها
ومثل ما ذكرت سابقاً هذا النوع من الحبال إما إنه يركب مباشره على الشنكار أو القلص في السيارة أو نستخدم له شنكار مثل اللي بالصورة هذي:
وطبعاً قوة الشنكار لابد تكون متوافقة مع قوة حبل الإنقاذ علشان ما يقفل علينا ولا عاد يفتح، واللي جرب من قبل واستخدم بعض الشناكر الصغيرة التجارية في عملية انقاذ فيها نتع وشد قوي فأكيد لاحظ أن الصامولة انبعجت والتوت وما عاد يقدر يفكها، وبالتالي ما كان أمامه حل إلا إنه يقطع الحبل أو يقص الشنكار عند الحداد.
هذا بشكل أساسي النوعين الأساسية من حبال السحب وبكل تأكيد توجد أنواع أخرى مستخدمة ومقترحه وقوية ومنها على سبيل المثال لا الحصر السلسلة وهوز المطافي، ولكن يعيب السلسلة من واقع تجربتي ثقلها وخطورتها الكبيرة أما هوز المطافي فأنا للأمانة لم يسبق لي أن جربته، لكن أتوقع أنه يحتاج إلى بعض التعديل ليكون مناسب لعمليات السحب في السيارات.
ملاحظة: لم أتحدث - متعمداً - عن الونشات لأن لها خصائص أخرى تختلف عن حبال السحب.
بإذن الله تعالى في الجزء الثاني من هذه السلسلة سأشارككم بكيفية إختيار حبل الإنقاذ المناسب بناءاً على المقاسات وقوة التحمل وأحجام وأوزان السيارات وحالات السحب.
بينما في الجزء الثالث بمشيئة الله تعالى فسأقوم بمشاركتكم ببعض الأساسيات والتقنيات والنصائح في السحب الآمن وبكل تأكيد سيكون الباب مفتوح للجميع للمشاركة بتجاربهم.
وإن شاء الله تعالى، إذا تيسرت الأمور فبإذن الله راح أنزل لكم تقرير عن نوع جديد من حبال الإنقاذ طلبته من أمريكا مؤخراً وإن شاء الله يوصل خلال أيام وبجربه وأعلمكم رأيي فيه.
ختاماً أتمنى إني قدرت أفيد إخواني في مكشات من خلال هذا الجزء ببعض المعلومات الخاصة بحبال السحب وبكل تأكيد باب الإضافة مفتوح على مصراعيه للجميع. وأعتذر مقدماً إذا كان موضوعي مكرر أو وضعته في القسم الخاطئ.
والسلام عليكم ورحمة الله وبركاته
الموضوع حصري لمنتديات مكشات وليس منقول. وعند النقل يرجى ذكر المصدر مكشات.
موضوع جدا ممتاز
بارك الله فيك
معلومة بسيطة للاخوان لما تركب الشنكار و حبل السحب و تقفل الشنكار لمل المسمار يوصل لاخر المشوار ارجع لفه فتح نص لفة علشان وقت السحب او التل لا يقفل عليك و يصعب فكه
هذي المواضيع اللي اتحراها في مكشات و غيره
بانتظار الجزء الثاني
سبحان الله والحمد لله والله اكبر ولا اله الا الله ولا حول ولا قوة الا بالله وسبحان الله وبحمده وسبحان الله العظيم اللهم صل وسلم على نبينا محمد
ماشاء الله موضوع كامل والكامل سبحانه
اشكرك على هذا الموووضوع المفييد جدا ومهم << يستاهل خمس نجووم والله
وكثر الله من امثالك يابعدي
انا ياخوي استخدم هذا من سنين طويلة والحمد لله مااشتكيت منه ابد
وألف وردة لك على الموضوع الرائع وبإنتظار الأجزاء القادمة
وحبيت أنصح الجميع بأن أفضل شركة أجدها بالسوق هي حبل السحب من شركة ARB الأسترالية وهذا شكله
ميزته أنه ما يمتد أو زي ما يقولون يتمطط لأن الي يتمطط يهبل بك في السحب ويضيع قوة النتل بالسيارة وطويل جدا وأقل وزن يسحبه 8 طن وفيه نوع ثاني أعرض يسحب 15 طن
قيمة الي شريته أبو8 طن نفس الي بالصورة 240 ريال من محل الرماية وفروعه واجد بالرياض وأعتقد منتشر بمدن الرئيسية
وجربته وجربوه زملائي بطلعات واجد وأثنو عليه حتى بطوله جودته
وشريت معه حبتين مثل هذي
نوعية أسترالية كلفتني الحبة 35 ريال
ونفس الشيء أنبه على الطريقة الي قالها الأخ mohannadAs
بخصوص أن جيت تركب الشنكار لا تقفله للأخر ولا مع السحب يقفل ولا يتحرك بسهولة وصارت معي للآسف أضطريت أستخدم مفك العجل علشان أحاول أرخيه
سبحان الله وبحمده عدد خلقه ورضا نفسه وزنه عرشه ومداد كلماته