اختبارات
السلام عليكم
انا شفت موضوع حطه واحد من الاخوان الا وهي ابو راشد بيض الله وجه وهو تجربه شركة رمنقتون لنوع جديد من الرصاص فحبيت اقول كلمه:
مثل ما تعرفون انه في خيمة أسلحة و أدوات الصيد الكثير من الشباب يسأل عن الرصاص الصح و أيضاً عن الشوزن أو الخرازة الصح؟؟
فأجي يللي مسوي نفسي فاهم أو يجي واحد من الشباب الفاهمين ( ما شاء الله عليهم ) قولون ان افضل فشق هو ابو غزال أو سبيد وان افضل شوزن هي البلجيكية أو البنللي أو الروسيه ليش اخترتوا الانواع هذي ؟؟؟؟
خل نتكلم على الرصاص اولاً:
-اغلب الشباب أو خل نقول بعض الشباب إذا جربوا فشق معين و كان إرتداده مناسب يعني ما يخضك يجوز له و ما يقتنع بغيره.
-بعض الشباب يطير في العجه ( لامواخذه ) يقولون له شف الفشق الفلاني افضل نوع ، خلاص معد يغيره .
-و أيضاً شباب صادوا بنوع معين كم صيده يقولون خلاص مافيه افضل من الفشق هذا !!!!
* طيب وش كان يبي يضركم لو استخدمتوا أو لو اختبرتوا عدة أنواع من الفشق في نفس الضروف صدقوني يبي يصير الإقتناع عن قناعة و تبي تتعلم وش ميزة كل نوع
ثم عن الشوازن أو الخرازات:
- لكل واحد ذوق معين و طبعاً سعر السلاح يمكن يكون من اهم الاسباب لإختيار.
- خل نقول انك رجال ما يهمك السعر ، بس يهمك جودة السلاح . فيجيك رجال و يقول لك البراوننق افضل سلاح ( انا ما اقصد احد لكني حبيت اجيبه كمثال ) ، فيجي خوينا ويشتريها وهو مغمض ، لانه وثق من كلام الخبير ( مهوب انا ) إلي نصحه بهذا السلاح ، ثم يجيك يتفاخر بالسلاح عند ربعه و ينقز له واحد يقول له و الله انك غشيم و ما عندك سالف وش إلي خلاك تروح للبراوننق و البنللي افضل منها بمراحل !!! ولا يقول له و الله انك ما تدري وش تسوي بدراهمك ليش ما اخذت الروسية ارخص و صبورة.
* انا بس ودي اعرف كيف حكم كل شخص على السلاح إلي قال انه افضل شئ ؟؟؟؟
هل انت جربت الاسلحة هذي مع بعض تحت نفس الضروف؟؟؟؟ نادر من يقول لك نعم.
كل النصائح أو خلنا نقول اغلبها من تجارب شخصية لسلاح واحد .
ودي ان الشباب يختبرون الفشق و الاسلحة و يقارنون بينها ، و على فكرة ترى الصيد و الهدف في السماء ( مطيار ) غير لما يكون على الارض .
و اي واحد يجرب تكفون يعلمنا بالنتائج وش صار وش السلاح و ش الفشق وش الضروف الجوية
و السلام عليكم
====================
الخبرة هو الإسم الذي يطلقة الشخص على تجاربه الفاشلة
"Obstacles are those frightful things you see when you take your eyes off your goal."
Henry Ford