ماهي تجاربكم في ازالة رائحة الدخان في السيارة؟

[Cyber]

السلام عليكم

مرات تشتري سيارة وتحصل ريحة الدخان تفقع الراس بالسيارة
او انت مدخن وتعاني من رائحة الدخان بالسيارة

نريد تجاربكم او الطرق التي نجحت في ازالة رائحة الدخان

وشكرا

[صقارعزاااام]

ليه ليكون توك طايح بالدخان وخايف من احد يكشفك

[You Like Me]

وعليكم السلام ورحمه الله

اذا يوجد فلتر للمكيف غيره بجديد
وغسيل مراتب

[Magellan]

شوف اي ريحة بالسيارة عشان تطلع منها لازم انك تنسم للدرايش لو وقفت سواء عند المنزل او العمل
طبعا لإزالة الروائح الكريهة ومنها الدخان افضل شي الوقت هذا مع اشتداد الحر ، تفتح للدرايش وتطقها الشمس وبالتالي بعد كم يوم راح تروح الريحة،،،
انا ما انصح بوضع اللزقات اللي لها روائح فواكه وغيرها لأنها تسبب بقاء هذه الريحة مدة طويلة ولاهي محببة
وانصح بتبخير السيارة بالعود كل فترة وفترة
كذلك اذا خليت السيارة مشمسة وفاتح الدرايش حط فوق الطبلون ،ذر شوي زعفران ايراني ابو شيبة ،لأن له مفعول طيب ومنعش
وبالتوفيق

[س.س.التميمي]

الله يعطيك العافيه موضوع رائع ومهم

[طحنون]

اول خطوه شغل المكيف اذا كان نظام اوتو وافتح النوافذ كلها وامش بالسياره بسرعه معتدله وافتح الهوايه للمكيف يعني خل المكيف
يجيك الهواء من الخارج لان مواسير الفريون والفلتر تحتفظ بالروائح لفتره ليست بالقصيره
وكرر العمليه لمده اقل شي خمسه ايام او مره في الاسبوع
وبعدها جيب مبخر وحط العود الازرق وشغل المكيف وسكر التهويه وخله يحشر الريحه الزينه وسكر النوافذ وانزل من السياره عطه خمس دقايق لين يصير كنك داخل دسكو من الدخنه وانتبه تركب واحد ماتروش على طول بتكفشه من ريحته

[يزيد 999]

مايبيله جب قطعة فحم وحطه بالسيارة لأنه يمتص جميع الروائح الكريهة بأي مكان

[ابونبيل]

فلتر المكيف
وثاني شي خل الموتر بالشمس بحرناونسم القزاز اعرف واحد سافر وخلا موتره كذا 3 ايام رجع الموتر مافيه ريحه

[ana_froos848]

.فتح النوافذ
وشوية بخور
وجبلك قطعة قماشة وحط فيها فحم وكل ما وقفت حطها على الطبلون

[مسير عليهم]

ليه ليكون توك طايح بالدخان وخايف من احد يكشفك

بعض الناس ماودك يردون ابد ( كل يشوف الناس بعين طبعه )




هو مع الوقت بتروح الريحه لكن اذا انت مستعجل مثل ماقالو الشباب فترة وقوف السيارة اترك الدرايش مفتوحه وفتره استخدامك شغل المكيف وخل التهويه من الخارج وافتح الدريشة ليتغير الهواء ولا تنسى العطور العاديه والبخور

[مصلح بن بيئي]

شغل المكيف وخل التهوية خارجية
افتح الدرايش عند الوقوف
استخدم الطفاية او مبخرة صغيرة وحط عووووود فوائده جيدة
غير فلتر المكيف
غير تنجيد المراتب اذا هي منجدة
امسح الطبلون والدركسيون بمادة منضفة او اقل شي بخرقة نظيفة وماء ، مساكات الابواب وازرار الدرايش كلها امسحها جيدا بمنشفة مببلة ( عملية تعقيم كامل ) ههههه

[سيف وقلم]

واحد من الشباب ركبته معه وريحت ذا الفراولة تصرع وأشوف ذيك الكيسة واثر فيه شيء أحمر كنه مربى صار باقي معسل مدري شيشة حاطها في الدرج...

طراها الدخان

[tevo]

فلتر المكيف
وثاني شي خل الموتر بالشمس بحرناونسم القزاز اعرف واحد سافر وخلا موتره كذا 3 ايام رجع الموتر مافيه ريحه

هذا الكلام الصحيح

[كاشت وحداني]

عندك شركة ميقوايزر
مهتمه في منظفات وملمعات السيارات
عندهم بخاخ ب٣٠ ريال
تبخ في اسفنجه شوي وتتركه في الموتر
يمتص الروائح ويزيلها وهو ليس له رائحه
جربته فترة لما كنت استاجر سيارات
موقعهم شارع الضباب بالرياض
مقابل المدينة الطبيه

[ابوالفهد]

من وجهة نظري لأني مثلك شريت فكس ار وياريحة فيه الله لا يبلانا بالدخان والمدخنين الله يهديهم ما أدري ويش لا قين فيه أول أول شيء هو تنظف طفايات الدخان الا وهي الأراج التي يطفون السجاءر فيها الدرج الصغير الأمامي والذي في الأبواب تنظيفا مبرحا وثانيا غسيل الموتر غسيلا مبرحا اذا وقفتها بالشمس نفس النوافذ وبعد كم يوم بخرها بخور معبي مرتين ثلاث وبعد ذلك تشوف الفرق ودمتم بخير