ساعدوني في شــــــــــــراء ســــــــــيارة للشـــــــــــــايب الله يجزاكم الجنة

[أنصر نبيك]

الســـلام عليكم ورحمة الله وبركاته وبعد ,,,

عندنا الوالد من يوم سرقوا سيارته وهي نوع جيب لاندكروزر وهو تعبان وأتعبنا معه

كان بينه وبين الجيب الفه عجيبه محافظ عليه لأبعد حدود وكأنه فرد من العائلة !!

فكان الجيب شد بلد لم يغير فيه غير القطع الاستهلاكية فقط وفي احدى المرات

أخذناه خلسة الى صيانة تويوتا لنطمئن على الجيب خوفاً على الوالد وسلامته أستغربوا

من حالته ونظافته بودي ومكينة وعضلات وقالوا سبحان الله كأنه جديد !!

تخيلوا أستمر معه ثمانية عشر عاماً بالتمام والكمال مع انه نوع جي موديل 93

شراه بتسعين الفاً وكالة وقتها كان ال VXR ب 120 الف فقط لاغير!!

الى أن ســـرق منه وجن جنونه فهو عاشق للبراري والنزهات الخلوية يموت فيها !!

المهم شرينا له موتر جديد كراون فكتوريا والله لأنها مريحة وراسية يا اخوان ما أرتاح فيها أبد وكل يوم يقول ما أبيه فكوني منه ؟!!

طيب وش الحل ياشباب الشايب حزين وزعلان ولكنه يعاني من ركبته اليسرى يعني

مايصلح له سيارة فيها كلتش ثقيل بالحيل فماذا نشتري له طبعاً بعد بيع الفكتوريا مع بعض

الدراهم بيكون ميزانيته حول 150 الف ومستحيل يقبل الوالد جيب مستعمل بهذا المبلغ

فمارأيكم نشري له :

هايلوكس غمارتين دبل قير أوتو وممكن قير عادي إذا كان دعسته مابها ثقل أو ماتحتاج

قوة أو برادو وسبق وسألناه عنه قال ماني بمرتاح له ولا يستاهل سعره المبالغ فيه وأفضل

الونيت الدبل عليه ؟!

أول هل نشتري له سييرا أو سلفرادو أو فورد 150 أو هايلوكس دبل لكن هل هو مريح

الفل كامل هو يبي موتر نشيط رشيق يرقى به في الجبال ويوسع صدره في البراري


شوركم ياجماعة الربع الله لايهينكم

[ناصح]

وعليكم السلام ورحمة الله وبركاته

الأفضل احتراما وتقديرا

تقول للوالد وليس للشايب

ونسأل الله أن يرد لكم سياراتكم

وأن تجدوا له ما يناسبه وأن يوفقكم للبر به

شكرا لك

[nb9' al 8loob]

والله ابوي اشترى كورولا تماتيك ومستانس ماخلالا فيها ديرة

كان عنده الفورد ماعرف له كل اسبوع حكة ولا مخش ههههههه

والحين صعب تلقى سيارة كلها شبابية

حسبي على الي سارق موتره

[sgl2002]

السييرا ممتاز ومريح على حسب اللي استخدموه

لكن ١٥٠ الف خذ له جي استاند لاندكروزر تماتيك

او فتك الشكل القديم تماتيك

[Salamah.y]

دامه متعود على الجيب , أشوف أفضل خيار لكم
هو الباترول الفتك , ابو رفارف سود , خذ له تماتيك و مكيف مركزي
موتر نشيط , و راح يخدمه بر و ديره , و في حدود ميزانيتكم تاخذه جديد أصفار

كل التوفيق , و الله يطول بعمره
للاسف في ديرتنا السياره اللي تنسرق
قل عليها السلام ~

الله يعوضه بخير منها و عساها شرٍ زايل

[قناص 28 عفيف]

ياخوي هذا ابوك وخلوه على راحته انتم كذا تضيقون عليه شوفو الرجال وش يهوا واشروه له
150 يجيب لك فتك 2012 وكاله ابو رفارف سود تصلح له لانه راعي براري وقنص

[ماجد الهلالي]

اخوي خذه له جي قير اتومتك جديد

واحد من الزملاء ماخذه G موديل 2011 أصفار ب 154,000 ريال

مواصفاته
قير اتومتك قزاز كهرب مكيف ونص

لا يفوتك وبيناسب للوالد الله يحفظه
والله يعوضه بالموتر السابق ويمكنها خيره من رب العالمين

[hsdt]

السلام عليكم
اخي انا اقترح قبل تشترون اي سيارة مثال جيب اوهيلوكس او باترول
تستاجر من مكاتب التاجير السيارة اللي اخترتو حتا تشوفون راي الولد فيها
قبل الخسارة

[كاشت وحداني]

اولا الله يلقي اللي سرق موتر الوالد الله يحفظه ما يكره
ويجيب لكم خبره عاجلا
ثانيا شوفو له برادو قير تماتيك ?سلندر
اتوقع هو اللي بيطيب خاطره
ولو ان العشق بيبقى لل?? لكن امر الله

[سفاري 9]

خذ جي تماتيك بيصلح له
اولا جيب وتماتيك وقوي
وثانيا سعره حول ميزانيتك

[الشنه]

الوالد الله يطول في عمره راعي مطاريش وبر
خذوله لاند تماتيك - ترى من جرب موتر وهو كبير يعشقه_
بحدود 120 الف وجهزو السياره بتانكي مويه وطرمبة هو واباقي اغراض الكشات
برو في ابوكم راحته وشوفته مقهوي ربعه قسم تسوى الدنيا
خلوه ينسط مع الجيب الجديد ترى ما يملا عينه الا اللاند

[راكب البترول]

الله يكون بعونك لاكن انا انصحك بزي الي في الصوره

[ابونبيل]

خذله فتك ولا جي واحرص على اللند قبل الباترول لان كان معه لند..

والله يطول بعمره

[قناص الأشهب]

الله يهنيكم ببر والدكم
والله أن ودي والدي يطلب مني موتر ولا أي شئ من غير شر
والله يخدمت الوالدين أها شرف
وأنا أخوك خذلة باترول زي اللي حط صورته راكب الباترول
فتك 2012 أربع أبواب صدقني أنه ينطرب تماتيك طبعا

[ذيب زلفاوي]

ترا الشيبان عليهم مسكات مدري وشي

ابوي جرب الاند الجديد وجرب الفورد وجرب هايلوكس وماملا عينه شي الا الانوفا

صراحه شكها غلط وهي واقفه جمب البيت