حرارة السيارة

[البارود محمد]

السلام عليكم ورحمة الله وبركاته
اخواني مشرفي واعضاء المنتدى انا عندي سيارة لاند كروزر 2002م ولاكن حرارته تاصل النصف وبعدها يقفل المكيف
غيرت البلف دون تغير وصيخت الاديتر دون تغير وفحصت طرمبة الما والمروحة ولم اجد اعطال اللي يعرف تكفون
علموني ولكم جزيل الشكر

[escape_man]

الرديتر حقه شد بلد ولا انت مغير الراس لتجاري

تراها احيانا تصير من راس الرديتر والباقي سليم

بعدين الموتر يفور ولا لا.

شوي تفاصيل بارك الله فيك

[البارود محمد]

اخوي الله يطول عمرك انا شريت السيارة مستعملة والفني اللي يصخ الرديتر قال اصلي شد بلد اما التفوير نعم السيارة تفور عطنا الحل الله يجزى والديك الجنة

[هاوي الله]

المروحه والخراطيش( الليات) شيكت عليها ؟

[بيّن]

السلام عليكم ..

اذا كان يفوّر الله يعينك ,, اكشف على راس المكينه .

بالتوفيق ...

[الكاسر23]

أخوي البارود محمد
السلام عليكم

الاخوان قبلي ما قصروا ذكروا لك كافة الأجزاء اللي تسبب الحرارة في السيارة.
حفظك الله، جتني نفسك حالة سيارتك، سيخت الاديتر وغيرت مويته وما فيه فايدة، قمت غيرته بأديتر بعدد رصات أكثر وبحجم أكبر ولا فيه فايدة الحرارة غير طبيعية.
قمت غيرت طرمبة الموية، وفحصت اوتوماتيك المروحة، وكذلك قوة اجنحة المروحة، وكان كل شي تمام، لكن الحرارة لا زالت موجودة.
كذلك فحصت السيور والليات وغيرتها ايضا وغيرت البلف وخليته يفتح عند درجة حرارة اقل حتى لا تسخن الماكينة، وما فيه فايدة.
فحصت حساس الحرارة ولقيته ما يحتاج وغيرته وغيرت كذلك ساعة المؤشر اللي في الطبلون قلت يمكن فيها بلى، لان اللي باقى لي أصعب وبيكلف أكثر.
قلت هذي عين ما صلت على النبي (ص).
عموما قال لي الميكانيكي ترا ما عاد الا فك الماكينة ونشوف وش اللي فيها، لان كل شي محتمل خارجها سويناه.
بصراحة الفني سوداني وكان كبير الفنيين في عبداللطيف جميل، طلع منها وفتح له ورشة بحكم خبرته.
فكينا الماكينة .. لقينا جدار الماكينة (في حجرة السلندرات) وكذلك السلندرات نفسها، لونها أحمر كانك راسم عليها ، وطابع فيها سواد من فوق اللون الأحمر ، ولقينا أيضا رؤوس السلندارت من فوق كلها مطعجه.
قال لي الميكانيكي سلمكم الله إن السيارة جاها حرارة عاليه سابقا واستمر تشغيل الماكينة إلى حد أن الحرارة طبعت فيها ولا عاد تقدر تتحمل أدنى درجة من الحرارة، وبالتالي أثرت تلك الحرارة على جدار الماكينة والسلندارت ورؤوسها، وعليه فأنه بمجرد وصول حرارة قليلة للماكينة (مثل تشغيل المكيف، أو الوقوف طويلا في زحمة إشارة أو مكان مكتوم ما فيه هواء) فأن حرارة السيارة تقب، لان جدار الماكينة والسلندارت تمتص هذه الحرارة بسرعة ولا تقاومها لانها وضعت فيها بصمه سابقا ولا عاد فيها مقاومة لها.
عاد اللي سويناه خرطنا الماكينة وكلفتنا شي وشويات (الله يعينك، وان شاء الله ما تطلع منها)، لكن بعدها ارتحت من الحرارة بالكامل.
لكن وشو عقبه، كلفتني والله العالم تغيير كل شي فيه احتمال تجي منه الحرارة، إضافة إلى خرط الماكينة وقطع الغيار.
عاد أخوي البارود محمد ، قبل ما تصل إلى فك الماكينة ، مر على الخطوات اللي مريت أنا عليها، لان فك الماكينة كلٍ يتحاشاه.
والله يعينك على بلواك.
أخوك
الكاسر
أبو محمد

[escape_man]

بالنسبة وانا اخوك اذا الموية تنقص فامرهابسيط ولازم تشيك الرديتر والليات كلها وكوعة الموية وتراها واجد.

اذا ماتنقص فهذي هي المصيبة.

اذا الموتر ثقيل ومكتوم بحالته العادية وقبل لاترتفع الحرارة ممكن يصير هذا السبب وتحتاج لبرمجة الكمبيوتر

اسباب ثانية :
تماتيك المروحة - راس الرديتر - بلف الموية (لازم اصلي) - موية ACD Delco الحمراء الاصلية .

اذا هذي مضبوطة فمعناها مثل ماقال اخوي الكاسر الموتر تعرض لحرارة وعدمت الراس ويبيله خرط

فاذا توك شاري الموتر فهو انباع لك بعلته

واذا الموتر معك من زمان فانت ادرى اذا جته حرارة عالية جدا جدا او لا.

[tomas73]

الحل بسيط ....................................غير غطا الرادتير ولا يكلفك شي من الوكيل اصلي وترى صارت نفس المشكلة معنا ..................وسلامتك

[escape_man]

الحل بسيط ....................................غير غطا الرادتير ولا يكلفك شي من الوكيل اصلي وترى صارت نفس المشكلة معنا ..................وسلامتك

اذا كان موية الرديتر تنقص

[البارود محمد]

اخواني الأعزاء

لقد طرحت هذا الموضوع عليكم وأنا في حيرة من أمري ولقد شاهد منكم مع جزيل الشكر المساعدة في هذه المشكله
لقد وجدت منكم حلول كثيرة ولقد ذهبت بلأمس الى ورشة خاصه بهذا الشي ولقد افادوني مثل ماقاله اخي الكاسر
وبعدها ذهبت الى فني للفريون وقال الحساس أو الأتماتيك للمكيف لايعمل وكشف على الفريون وقال انه قليل وعلى ذلك لايعمل الحساس وبعدها شحن الفريون وأشتغل الحساس ونزلت قليلا الحرارة ؟
لكن السؤال هل حرارة الجيب لاند كروزر مابعد 2000 تكون الثلث أو اكثر ماهوا الطبيعي وهل افك المكينة ام اصبر بارك الله فيكم

[شاص&نص]

السلام عليكم و رحمة الله و بركاته

بالنسبة لل Gx-r فإن الحرارة في الصيف ((مع المكيف)) إلى قبل النص تعتبر طبيعية

لكن الvx-r أقل

أبو عبد الكريم

[قاهر الفري]

اكشف على راس المكينه

[الكاسر23]

أخوي البارود محمد

يقول المثل "آخر العلاج الكي"

فلا تفك المكينة إلا بعد ما تتأكد أن السبب من داخل الماكينة وحتى رأس الماكينة لا تفكه، لانه ما راح يرجع مثل تركيبة المصنع.

وشوري عليك أن تروح للورشة هذي وهم يعطونك الحل.

ورشة النيلين
الموقع : تجي من طريق الامير سلمان وان متجه شرق، تجيك أول اشارة رح منها يمين (وجهك الحين جنوب)
من ثاني تقاطع لف يسار (وجهك الحين شرق)
تمشي طالع عمرك اللين قبل التقاطع الكبير، تلقى سلمك الله قبل التقاطع بورشتين ورشة صغير اسمها النيلين
هذي سلمك الله فيها معلم على كيف كيفك أسمه (عوض) سوداني كبير في السن، قضى عمره في وكالة تايوتا
اعرض عليه المشكلة وأن شاء الله تلقى عنده الخبر اليقين.
أما فك المكينة فأنصح تتأنى شوي، ولا تتسرع في القرار.
وعلى فكرة أخوي محمد ، إذا كان الجير أتوماتيك فأنتبه أخوي من تأثير الحرارة ونقص موية الاديتر على الجير، لان الحرارة اللي جت سيارتي أثرت على جهاز تبريد الجير ، مما أدى إلى تخبيط الجير.
والله لا يريك مكروه.
وعساك سالم.
إذا ما عرفت الوصف هذا جوالي 0505207656
ولك تحياتي وتقديري

أخوك المحب
أبو محمد
الكاسر

[dark]

عزيزي انا سبق وحصلت لي بضبط وصوت مكينتك تغير تحس انه صار يحن اذا الجيب فكسار 2002
طريقة اصلاحه غير كلتش المروحه (الي يجي بوسط مروة المكينه ميكلف اكثر 500 ريال
ودرجة حرارة الجيب 2002 فوق الربع بشوي
غير الكلتش المروحه اكيد مجيم
هذا والله اعلم