السلام عليكم
حيهم كلن بأسمه
راجع من دوامي و زحمات و قلق و قعدت اعد السيارات اللي ماسكه سرا تبي تديور و قعدت اقسم و اطرح و اجمع كم اقيامهنباينه الفضاوه مره
المهم مالكم بالطويله ..
اسعار السيارات في الزمن تكاد تكون خياليه شوي للي دخله الشهري متوسط حتى انه مايقدر يشتري سياره كاش يالله يحوش له 4 سنوات و عساها تجيب سياره زينه
لا جلست مع الشيبان و قعدو يسولفون عن المواتر اول و كيف كانو يشترونها , الدداسن القديمه بالسبعينات كانت على 8 الآف كررررررت و الاولدزموبيل كانت بـ20 الف و حواليها و غيرها الكثير كان اللي يشتري سياره بـ30 الف هذا كاش و ماعاد يكلم احد
اخبر السفاري الـ96 جديد كان بالثمانينات مطلعينه من معارض النسيم فل الفل و الجموس كانت اسعارها مناسبه ما اتذكر بالضبط كم لكن ماتوصل لمواصيلها اللحين
وش سبب ارتفاع اسعار السيارات ؟ لدرجه انها وصلت اقيام خرافيه ؟
بسبب اليد العامله صارت تكلف المصنع اكثر من اول ؟
او المواد الخام ؟
او وش الاسباب بالضبط ؟
هل توافقوني الرأي ان سبب ارتفاع السيارات التقنيات اللي مالها لزمه ؟
الآن السيارات جميعها مجهزه بتقنيات سواءاً كاميرات و شاشات و رادار و رؤيه ليله و مساج و تبريد مقاعد و يطول الكلام عن المواصفات
هل هذا سبب الارتفاع ؟ .. طيب انت كـ شخص بيشتري السيارة هل تهمك هذي المواصفات بالدرجه الاولى ؟
المشكله فيه كثير من الناس يشتري سياره بمبلغ و قدره و تجلس معه سنين لكن ماعمره لمس الشاشه ولا يدري وشو النافقيشن وغيرها الكثير
ليش السيارات الآن صارت تتجه للرفاهيه و بدأت تتناسى الهدف الاول للسياره وهي انها مجرد وسيلة نقل لا اكثر ولا اقل ؟
لو معك 100 الف ريال حالياً ماتجيب لك جيب جديد مع انه مبلغ كبير يعتبر "بالنسبه لواحد كحيان مثلي" الله يرزقنا ويرزقكم
ماودكم السيارات ترجع مثل اول في بساطتها ؟ مكينه قير دفرنس و اطلق تقنيه كانت مثبت السرعه لا فيها لا كلافه ولا تكليف و شوفوها إلى اليوم وهي تكرف بالشوارع
هل تشوفون ان التقنيات الجديده مفيده فعلاً و اذا كانت مفيده هل تستاهل المبالغ الطائله هذي لدرجه ان اللاند اللحين يوصل سعره للـ290 الف للفكسآر ؟
بينما كان في سنه 2001 يوم اشتري موتر الوالد على 140 الف
الزياده صارت 150 الف ريال في 12 سنه ولو نسوق السيارتين كلها تؤدي نفس الغرض في البر ولا في الطرق المعبده بغض النظر عن التقنيات اللي قد لا يتقبلها البعض والبعض يرغبها وهذا سبب النقاش
حتى ولو عذرناهم وقلنا ان نظام التعليق ابتكار حديث و المكينه ابتكار حديث حسب رأيي سبب غير مقنع للزيادة بالاشكال الهائله هذي لدرجه انك تلقى بالمعارض سيارتين جدد بس ذي 12 وذي 13 و الـ13 تفرق بـ 10 الاف و تزود في بعض السياره ليش عشان بالاستماره يتغير رقم
عموماً عشان ما اطيل عليكم لكم المساحه كافيه للنقاش
15 نوفمبر 2015 - 16:514 نوفمبر 2015 - 21:27
 |
رد مع اقتباس
المشاركة الأصلية كتبت بواسطة فتك08
