لمبات Abs فورد ولعت من يساعدني؟

[almohandis]

يا إخوان انا سيارتي فورد 2001 ولعت لمبات ABS وصار النظام ما يشتغل عندي يعني قلبت الفرامل عادية، واللمبة مزعجة وديت السيارة عند ورشة دايم أصلح عندهم وكويسين، ويوم فحصوها بالكومبيوتر قالوا الكومبيوتر حقنا ما دخل على السيستم حق سيارتك، فمالك إلا تروح لغيرنا أو تخلي الفرامل عايدي،
وأنا خايف أروح لأحد في الصناعية ثم يلعبون علي ..
أنا بالرياض ..

[khalaa2u]

الله يعينك

[dodge]

اخوي الله يعينك انت مثلي انا بعد زيك بس انا سيارتي مكسيما ولعت عندي لمبات absولما فحصت قالوا لي لازم الوكالة اللي تدخل على نظام البريكات ويعطيك الف عافيه

[عاشق ربـع]

ما لك الا الوكاله وانا اخوك والله يعينك

[رحالة الخليج]

أن أأيد عاشق ربع في رأيه مع أن مثل هذه الخرابات تكون بسبب عطل في الفرامل فمن الافضل أن تتأكد من الفحمات والهوبات وإصلاح الفرامل وكذلك التشييك على فرامل الطوارئ سبق وأن حصلت معي بس في سيارتي الكابريس 2002 وكان المشكلة من الفحمات

[عاشق البران99]

يارجال لاوكالة ولاشي أناصارت لي نفس الحركة في سيارتي ( كابرس ) ورحت لورشة عبدالرحمن الجميح في محلهم الاول على طريق خريص وصلحوه لي بلاش لأن الخراب على كلام عبدالرحمن الجميح نفسه بسيط لكن ماقل لي بس قال بسيط ومايستاهل فلوس مع العلم لو رحت للوكالة كان خذو ذيك العدة فجزاه الله كل خير وتراه يشتغل على الكمبيوتر بيده ، لكن الحين تلقاه في الصناعية (صناعية الامير سلمان) مخرج 17 غرب وتراه يصلح جميع السيارات الأمريكية وشغله أحسن من الوكالة وأرخص بكثيييييير ...

[almohandis]

أشكر للجميع حضورهم .. وإضافتهم

الإخوان اللي اقترحوا الوكالة .. وكالة توكيلات الجزيرة وانتوا بكرامة سلخ ناااار..( غير إن سيارتي أمريكي مهيب سعودي) يفحصون السيارة بس فحص بألف ريال أقل شيء ويعلمونك وش الخراب فيه بغيت تصلح ولا مابغيت هذا كلام ثاني..
إضافة إلى أن السيارة بتجلس عندهم علشان الفحص يوم كامل..


الأخ عاشق البران أبغى الوصف الله لا يهينك بشكل اكثر دقة..

[عاشق البران99]

أخوي المهندس وصف الورشه سهل تمسك الدائري الشرقي وتطلع مع مخرج 17 وتتجه غرب راح يجيك نفق بعده إشارة لف معها يسار وتمشي شوي وأول شارع سيدين يسار لف معه تمشي على طول ويجيك تقاطع لف معه يمين شوي والورشه على يسارك لوحتها واضحة جدا ( مكتوب عليها عبد الرحمن الجميح ) .. وسلامتك

[مهراس]

السلام عليكم ورحمة الله وبركاته

ياأخي لو انت تحب تشتغل بيدك في سيارتك وعندك مثل هذا الجهاز كان يحل لك الكثير من مشاكل وأعطال الكمبيوتر

[طحنون]

حبيبي جرب تفصل البطاريه وتركبها من جديد
وبعد ماتركب الاصبع اضغط الزراللي في الشنطه لاتقولي ماله شغل هاذ هوسيفتي خاص لتانكي البانزين وهم مسوينه سيفتي للحوادث علشان يفصل البانزين على المحرك بس هومتصل مع الكميوتر
يعني افصل البطاريه وركبها مره ثانيه وان شاء الله تكون المشكله بسيطه
وهاذ حلها باذن الله
والمحاوله الثانيه
تأكدمن الفيوزيمكن يكون الفيوزالخاص بالـabs
محترق وغيره
والمحاوله الثالثه
يمكن يكون احدالحساسات الوايرمقطوع اومشعورويفلت كهرب صدقني المشكله بسيطه
عطني خبرونا باسئلك واحدمتخصص فوردكهربائي

[almohandis]

كفو والله يا أعضاء مكشات..
أخوي عاشق البران جزاك الله خير على الوصف..

أخوي مهراس ممكن تفاصيل أكثر عن الجهاز ؟؟ سعره وين أحصله طريقة الاستفادة منه .. وش لون أعرف الخراب عن طريقه ؟؟

أخوي طحنون..
جزاك الله خير على خبراتك..
بالنسبة للحساسات والكيابل والفيوزات شيكتهن وكلهن سليمه ( ملاحظة اللمبة تولع نص ساعة مثلا ثم تطفي عشر دقايق وهكذا .. ما يعني أن الفيوز سليمه ..) ما فهمت علاقة الزر اللي في الشنطه بالموضوع أما فصل البطارية وشبكها فسويتها..وما نفع .. بانتظار جواب خويك الخبير في الفورد..

[طحنون]

الاخ العزيزانت وين ديارك اذاكان عندكم محل تراي ستار مرعليه وخله يسويلك سوفت ويرلكميوترالسياره مجاناوبعدين افحص الدينمويمكن
يكون البرشرضعيف وهاذي من اسبابه ان اللمبه تولع وتطفى احيانا

واذا مانفع ودها المعارض وقفها 10 دقايق لين يطيب خاطرها هههههههههههههه تراني اامزح

[winchester]

المبه Absخاصه بنظام مانع الأنزلاق ( الي بالفرامل علشان أذا مسكت بريك ماتزحف السياره أو تطلع صوت الكفرات) ولازم الوكاله علشان المبه لكن بعد ماتصلح العطال هذ1 والله أعلم

تحياتي

[مهراس]

السلام عليكم ورحمة الله

عزيزي المهندس:

أرخص جهاز قيمته تقريبا 16 دولار ومع الشحن سوف يكلفك في حدود 120 ريال ويركب على كل انواع السيارات من موديل 96 وجاي واللى على نظام (OBD2)، واذا كنت تبغى تبحث اكثر فقط اكتب كلمة (CODE READER) في أي محرك بحث.
وهذه صور لهذا الجهاز.

تقبل تحياتي
أبو فهد

[almohandis]

جزاكم الله خير جميعا..
أخوي طحنون أنا بالرياض: بس تراي ستار ماهم حقين جيربكس؟.
أخوي أبو تركي أكيد النظام حق الفرامل، وعشان كذا إذا ولعت اللمبة تقلب الفرامل عايدي، وإذا طفيت يشتغل كل شيء تمام..

الأخ مهراس: بعد شرائي للجهاز.. هل التعامل معه سهل وقراءة أرقامه سهله أم لابد من متخصص يتعامل معه..
وهل هناك أمثلة لمشاكل قمت أنت بحلها باستخدام الجهاز دون الرجوع للورش؟؟