وش رايكم بتنظيف مواصير المكيف بالبنزين

[GMC89]

السلام عليكم …
حيا الله كل رجال باسمه … بغيت اخذ شوركم ي الربع
في تنظيف مواصير المكيف بالبنزين و وش الطريقه الصحيحه
لها لان عندي سدد بسيط جدا في بعض المواصير واخاف
يسد مواصير ثانيه او تخرب الثلاجه وادخل في مشكله اكبر
هل التنظيف بالبنزين يفيد ؟
وهل له ضرر لاحقا على الكمبرسر ؟
ووش افضل طريقه للتنظيف ؟

واللي يعرف كهربائي فاهم في امور المكيفات يرسل رقمه
او وصفه بمدينة الرياض او الخرج

السياره جمس حوض 95
جزاكم الله خير … اعتذر عن الاطاله

[راعي الرود]

وعليكم السلام

البنزين مدري ماجربته لكن مسأله اني ابخ بنزين في مواصير المكيف احس انها تبي تلعب بحسبه الثلاجه و الليات ورديتر المكيف مجرد توقع
انا جربت دبه يسمونها دبه تنظيف اظنها نتيروجين غاز وصاني عليها كهربائي يوم كنت بغير كمبرسر شاف الليات و الرديتر وصخ قال لي لا تركب كمبرسر جديد على دورة تكييف وصخه و علمني عن هالدبه و شريتها و جبتها له ابد شبكها بالموتر كنه يعبي فريون و نزل الوصخ كله لين صار ينزل الغاز صافي سعرها اظن حروة 130 ريال و المكيف عال العال لين بعت الموتر

[راعي المجهم]

انا بعد نظفت مرة دورة تبريد كاملة

وشفت الفني يحط فريون دبته برتقالية يقول هذا حق تنظيف

وبعدها نشفه بالهواء وضبط المكيف

فريون تنظيييف

[مسير عليكم]

خذ نيتروجين ونضف به المواصير افضل من البنزين وتلاقيه في شارع الريل ومحلات التكييف تنفخه بالهواء وتعبي والافضل نيتروجين

[GMC89]

بس المشكله ان النيتروجين ما يطلع قطع الاسفنج الصغيره
لان انا عندي سدد بسبب الشي ذا والاسفنج جا من الفلتر الصغير اللي في المواصير نفسها
شكله كانه بواجي

[Jeep 2005]

شاروا عليك الاعضاء

والدبه بها هوا ضغطه قويه
مع قوة الدفع ممكن انه يفك الانسداد الي بالمواصير

وقبل كل شي علم الكهربائي عن السد الي عندك

والله ييسر لك

[GMC89]

بيض الله وجيهكم جميع ولا قصرتوا

[مسير عليكم]

الفلتر الصغير مافيه اسفنج حديد ناعم هذا جوا المواصير تاكد يالغالي ولا صوره لنا اول مره ادري ان فلتر الفريون فيه اسفنج عندي كابرس وتوني مغير فلتره الي كنه بوجي حديد ناعم مره مافيه سفنج ابد الكرتون يجي فلتر الهواء وهذي مالها دخل في ذي

[عطيب الشوق]

السلام عليكم

رح لمحلات قطع غيار مكيفات البيوت العاديه .. قوله ابي اسطوانة تنظيف خذها ورح لفني مكيفات سيارات وش كيف يضبط موترك للمعلوميه سعرها 350 ريال تقريبا تنقص ماتزيد وهذي هي الطريقة الصحيحه


تحياتي
ابوسعد

[yhya -ksa]

السلام عليكم …
حيا الله كل رجال باسمه … بغيت اخذ شوركم ي الربع
في تنظيف مواصير المكيف بالبنزين و وش الطريقه الصحيحه
لها لان عندي سدد بسيط جدا في بعض المواصير واخاف
يسد مواصير ثانيه او تخرب الثلاجه وادخل في مشكله اكبر
هل التنظيف بالبنزين يفيد ؟
وهل له ضرر لاحقا على الكمبرسر ؟
ووش افضل طريقه للتنظيف ؟

واللي يعرف كهربائي فاهم في امور المكيفات يرسل رقمه
او وصفه بمدينة الرياض او الخرج

السياره جمس حوض 95
جزاكم الله خير … اعتذر عن الاطاله

اهلا بك ي غالي

ماشاء الله الاعضاء مقصرو معك خذ الدبه الي قالولك عليها

وانا اعرفلك كهربائي مكيفات في صناعيه الموسى باكستاني مرره ممتاز

باوصفك محله تجي من الدايري لين تصل اشاره الحراج لف يمين كانك متجه الى الحاير + دار البيضاء

سيد شوي تجيك محطه ع يدك اليمين بعدها لفه علطول خش معاها يمين ثما امش شوي يجي تقاطع لف معاه يسار امش شوي اول محل ع يدك اليمين هو باكستاني حق مكيفات

مرره ممتاز وسعره تقدر تكاسره مره غسلت ثلاجه المكيف + فريون ب سعر 200 ريال فقط

والحمدلله المكيف عندي صار ممتاز بعد م صلحه الله يجزاه الخير

[موادع 1]

وش اسم الفني والورشه لاهنت يالغالي

[اليامي قطر]

انا يامحدثك نضفت مواصير الجي اكس بالبنزين

موتري شاريه من مستودعات الشرطه وواقف له كم سنه

وغسلت مواصيره كامله بالبنزين غسيل على كيف كيفك

وركبت كمبرسر جديد ولله الحمد مكيفه ممتاز جدا جدا وله فتره طويله

الله يديم عمره يارب

[محرين باالخير]

افضل طريقه لتنظيف دائرة التبريد من الشوائب وترسبات الزيوت هي باالتالي ...
فك الفلاتر الداخليه ان وجدت في بعض الدوائر .
لايصلح استخدام اي سوائل مثل البنزين اومشتقات النفط للتنظيف لتأثيرها علي دورة التبريدمستقبلا .
يفضل إستخدام غازالفريون 11 ذواللون البرتقالي ﻷنه مخصص لدوائرالتبريد .
لا انصح بستخدام غازالنيتروجين لتنظيف دوائرالتبريدالصغيرمثل فريون السيارات والثلاجات لاحتمال انفجارها نتيجة الظغط العالي وهومخصص للدوائرالكبيره المركزيه.
يكون التنظيف بإدخال الغازبعكس الاتجاه وهذه افضل طرق التنظيف .
فصل المواصيرعن الكمبرسور قبل عمل اي ظغط اوتنظيف للمكيف لسلامته .
استخدام الغازالمناسب سواء 134 او 12 او الغازالمظغوط الجديد 408 علي مااتوقع وهوافضلهم ويمكن استخدامه لاي سياره قديمه اوجديده بشرط تغيير زيت الكمبرسور للزيت الجديد ليتناسب معه ..
اتمني اني افدت حسب معلوماتي البسيطه . . وتحياتي للجميع .

[yhya -ksa]

وش اسم الفني والورشه لاهنت يالغالي

والله ماذكر اسم واسم الباكستاني ماعرفه بس اعرف شكله

بس الفني اثنين شغالين بلمحل بس روح ع وصفي تراه صحيح 100%

اول م يجيك التقاطع يجيك لف يسار تلقاه ع يدك اليمين مباشره محله صغير جنبه ورشه

واحد شنب بس هذا صاحبه خله روح للثاني

عنده لحيه ع خفيف رحله هو الشخص نفسه علطول اذا ماحصلته وحصلت خويه قوله وين صديقك خله يناديه راح تدعيلي باذن الله والله مره ممتاز