سؤال بخصوص الطربال (( ارجوعدم التطنيش ))

[GL2006]

بسم الله الرحمن الرحيم
انا معي هايلكس 2006 غماره
بس ابي اركب طربال وماادري وش نوع القماش الزين والمحل الزين
وكم يكلف كله على بعضه القماش مع الحديد مع التفصيل
وكم ياخذ وقت تفصيله؟

[أبو مسفر]

ان كانك حول القصيم
مر السنيدي او عروق الشمال في بريدة وتلقاهن جاهزة
ركب وامش

[مسير عليهم]

انتظر رد البقية لإني مثلك محتاج

[المحتطب]

السنيدي إن بغيت عندهم وعروق الشمال إن بغيت عندهم

أما إن تسانك بالرياض أو حوله . فعندك السنيدي بس مدري وينه بالضبط !!


بس نصيحة لا تركب إلا اللي يكون جلد من برا لأنه يمنع الماء والمطر لداخل الحوض !


.

[GL2006]

انا بالرياض ياشباب
بس ماقلتو لي كم يكلف؟
وياليت تعطونا نصايح اكثر

[أبو أسامة]

السلام عليكم ورحمة الله وبركاته

أنصحك بالبلاستك الكوري أو التايلندي بس عيب التايلندي ما يجي عليه ألوان كثيرة ...... أما الكوري فعد وأغلط ........ وأنحش عن الصيني ...... ........ صحيح أنها بلاستيك يعني تحتر في الصيف بس ميزتها أنها ما تخر ماء لا بعد سنه ولا سنتين ولا حتى سبع سنوات إن شاء الله ولا ينكمش ........ أما القماش التنزاني فهو أفضل الأقمشة لكنه يعيش قرابة الخمس سنوات مايخرالماء بعدين تنتهي مفعولية المادة الشمعية الموضوعة عليه فيبدأ الماء يخر من بينه ...... وأيضاً ينكمش ...... ولمعلوميتك ترى البلاستيك أرخص من الأقمشة .......

والسلام عليكم ورحمة الله وبركاته

[GL2006]

طيب كم يكلف...
وايش المحل الزين؟ بالرياض

[تــــوني]

المحل الزين والمعروف في الرياض هو

محل ابو عبده هذا للتفصيل (من ناحية القماش والبلاستيك) في الغرابي إذا وصلت هناك اسأل اي واحد يدلك عليه
ومن ناحية الحديد شارع الاربعين في الصناعية القديمة (صناعية البطحاء) فيه ورشة اسمها الممتاز شغلهم حليل مهوب شين

وبالتوفيق

[GL2006]

طيب الى الحين ماقلتو لي كم يكلف....

[مسير عليهم]

متابع للردود وجزاكم الله الف خير بس مثل ماقال اخوي صاحب الموضوع التكلفة كم

[الطـرقي]

السلام عليكم

بكلفك تقريبن حول 500-650
وبعدين لاتنسا تحط جيوب وقاعدة مظلة

[GL2006]

السلام عليكم

بكلفك تقريبن حول 500-650
وبعدين لاتنسا تحط جيوب وقاعدة مظلة

ياليت توضح اخوي... كيف قاعدة مظله
والحين كل شي يزينونه بالغرابي...
ولا الحديد افصله من مكان ثاني...
ياليت توضحون لي بالتفصيل

[GL2006]

طيب من يزين لي الهنقلين

[خياله]

اخي القماش ( تلقاه عند السنيدي او عروق الشمال ) اما الهنقلين رح لزلفي او الغاط

[مسير عليهم]

متابع لردود

لكن اخواني والعذر والسموحة اخوي Gl2006 على مشاركتي معك بالموضوع

بخصوص الهناقل مافيه احد بالرياض يسويهه ولإن عندي طريقة حلوه لحمل الخيمة بس فكرتي تختلف عن الفكرة العادية وهي الشد