يا راعي الباثفندر أمر طاري ؟؟؟؟؟؟؟

[بن سنجاره]

السلام عليكم ورحمة الله وبركاته

يا راعين الفزعه عندي صديق غالي معه باثفندر
الرجال فصل تانكي للشنطه كامله
المهم بعد ماعباه ماء نزل الموتر من وراء
والتانكي يأخذ 80 لتر فأطلب المساعده منكم

[ملاعب الريح]

ما فهمت مشكلتك لاكن كانك تقصد نزول الموتر من ورا بعد التحميل فإنصحه إنه يركب يايات أستراليه يلقاها عند محل الرمايه ولا يرفعه بكعكات ويركب مساعدات فكسار طبعاً مساعدات الفكسار تحتاج قص الراس وتلحيم من جديد


أتمنى إني أكون أفدتك (ملاعب الريح)

[أبرق دمعة]

أسمع يالذيب :

المسألة بسيطة جداً جداً جداً .. .. ..

لاعليه سوى أن يختار مابين هذه الأشياء :

1/ أنه يركب كعكات ويرفعن الموتر من وراى ويصبح زي السكر .. وهذي قيمتها 50 ريال ومع التركيب 90 ريال تقريباً

2/ أن يركب ياي أسترالي .. .. وهذي برضه ترفع الموتر ويصير زي القشطة .. .. وقيمتها حوالي 600 ريال ..

3/ واللي أنا أنصحه فيه .. .. أنه يركب ( بوالين ) بالون يوضع بداخل الياي ويستطيع نفخه ومن ثم يرتفع الموتر ..

ومتى ما بغى رفعه ومتى مابغى نزله إذا صار ما حمل .. .. وهذي قيمتها تقريباً 950 ريال مع الضمان 6 شهور لكل بالون .. ( عند الدفع الرباعي بالرياض شارع العروبة ) .. .. ..

هذامالدي .. ..

وأرجوا أن أكون قد افدتك ولو بالقليل . . . . والشباب فيهم البركة بيعلمونك أن شاء الله .. .

وتقبل تحياتي ،،

[باثفندر]

انصحك بالبوالين انا مركب خزان واشيل معي العزبة وفوق السيارة خيمة والموتر ارتفاعة ما تغير .

[نمر بن حثلين]

عليك بالكعكعات رخيص وكويس

[الحر الاول]

السلام عليكم ...


أخوي (باثفندر) كم لك مركب البوالين ؟


وهل هي عملية ؟؟


شاكر ومقدر ...

[المطلوب]

عليك بياي استرالي من الرمايه 3 سم...
لك والزمن..
الكعكات ما تريح الموتر ولا راكبيه..
البوالين ماجربته ؟؟

[راعي تميم]

أخوي يالطيب 00

أنا يامحاسيك عندي باث فندر 2002وكانت عندي نفس المشكله وشاورت الرجال شرواكم وركبت ياي استرالي وطلع زي الحلاوه لا وبعد مركب تانكي 80لتر مع العفش والعزب ولا هنا خلاف والحمدلله

[باثفندر]

اخوي الحر الاول
صارلي مركب البوالين حوالي اكثر من سنتين ولا تغيرت علي ابد وارفاعها طبيعي واذا بغيت تحمل تنفخها عن طريق لي موصل بابره في الرفرف وتنفخها على قد حمولتك والموتر يصير نفس الارتفاع واذا بغيت ترفع السيارة زود وبعدين مطبها ناعم مهوب مثل الياي الاسترالي قاسي محمل او فاضي ويكون نفخها الى 30 واذا ماتبي تنفخ تخلي فيها 5 عشان ما ينقرص البالون وسط الياي انا على العموم نافخها 20 طول السنة فاضي او محمل ولا ضرها
وبنسبة لسؤالك هي جدا عملية وسهلة التحكم يعني يوم ترفع ويوم تنزل قيمتها مع التركيب حوالي 900 ريال او يمكن نزلت قيمتها .

[هواي البر]

هلا اخوي (( ابرق الدمعة ))

الله لايهينك ابغى وصف محل الدفع الرباعي الي في العروبة ،،،

وهل تنصحني في البالون ولا الياي افضل !!!

[* الـكـشّـات*]

السلام عليكم
انصحك وانصح الاخوان
اهل الجيوب بشكل عام
ان يركبوا يايات استرالية
ما شاء الله شي لا يوصف
لو تحمل لين بكره ما ينزل من السياره إلا شي بسيط
وشكرا

[بن سنجاره]

مشكورين على الردود وجزاكم الله بخير

[المنبسط]

السلام عليكم
اضم صوتي للأخ الكشات وهذا بعد السؤال والمتابعة لهذا الموضوع ونفس المشكلة حدثت معي ويكفي في حلها تغيير اليايات الخلفية فقط وبتدعي لي إن شاء الله.
المنبسط

[جذاب2005]

حبيبي في حل آخر فصل تانكي مقاس 30×30×90 سم

ويركب داخل الشنطه ويكون حمله على الدفرنس وجرب لاينزل ولا هم يحزنون

ويكلف 250 ريال طبعا مجلفن