حصل معي بالسفانية بسيارتي الباث

[Barq al7'eel]

الله يسعد اوقاتكم جميعا بكل خير يا اخوان
انا ابي استشيركم بمشكله حصلت معي في سيارتي وهي باث 2005 قير اوتوماتك ذهبت للصمان وسرت بها مسافة 500 كيلو قطوع (بر) وببعض المحلات استخدم الدبل وماحصل شي يذكر الموتر طبيعي جدا والحراره لم تتحرك. ثم رجعت الشرقية وذهبنا انا ومعي بعض الاخويا للسفانيه حيث كنت امشي قطوع (عروق رمل) بدون دبل بسرعة 60 - 80 كلم واذا فجأه بالحرارة ترتفع نحو ثلاث ارباع وزود وسمعت صوت من الكبوت واذا هو تانكي الاديتر الاحتياط يخرج من صمام التفريغ الزائد ماء يغلي .

سؤالي يا الى اخواني اهل الخبره والشور
هل ان المشكله تستدعي اخذه للوكاله علما ان السياره مازالت على الضمان.
او ان المشكله بسيطه ويمكن حلها عند اقرب ورشه . حسب ما سمعت بعض الاراء ان بلف او حسّاس الحراره ممكن يكون جاه بعض الاتربه وممكن يكون هذا السبب . ارجو الافاده وتبادل الخبره لمن حصل له موقف مشابه

جزاكم الله خير
وتحياتي للجميع,,,

[الربذي]

اخوي بارق الليل (او الحيل )
السلام عليكم شوري عليك تمر الوكاله وانا شبه متاكد انهم مارايح يطلعون شي رايح يقولون سليم كالعاده عشان مايشتغلون وانت استشير احسن
انا نعي باث لكن مامشيت ممشاك وبعدين الثلث ترا طبيعي انا على طول النص ولامشاكل ولاشي
لكن حنا حساسين شوي وبعدين متى حصل الموقف هذا
وترا النفود يرفع من حرارة السياره واجد ويزيد عليه انك مو مشغل الدبل طبعا يكون عليه جهد جبار جدا جدا جدا وسال مجرب
يعني موترك طبيعي لكن انت جرت عليه بالحيل وسط النفود وبدون دبل طبيعي ترتفع حرارته
لاتحاتي اخوي ولايهمك
لان كيفه صح طبيعي لايهموك الورش ورتروح لاحد بعد قراءه موضوعك امرك طبيعي
لاتخسر نفسك هذة نصيحتي

[بواردي الدلم]

ماعندك اي مشكله بعدين قلي وشلون تدخل الاتربه للبلف
خذها بالعقل شوي

[وراط 2006]

اخوي برق الليل انا مره صارت لي نفس المشكله وانا ماسك خط الجنوب
وصار السبب الا ديتر متسدد ويبيله تسييخ
فأنا اشور عليك انك تغير البلف وتجرب ان زانت الحراره او تسيخ الاديتر وان شاء الله ان الحراره بترجع طبيعيه
وعلى فكره خلك عنده اثناء عملية التسييخ علشان تضمن ان العمليه مضبوطه
والسلام

[المميـز]

مادام سيارتك على الضمان

لاتوفرهم ولا تخلي احد يلعب فيها من هاللي بره

الوكاااااااله مسؤوله عن سيارتك وخاصه في مثل هذي الاشياء الحساسه


وجه لهم والله يكون بعونك

وان شاء الله ان حل هالمشكله سهل

[الهمر]

والله ياخي موديل 2005 وتسيخ رديتر ؟ !!!
مشكلــــــــــــــــــــــــــــــــــــــــــــــ ــــــــــــــــــة

اذا استمرت معاك المشكلة
الوكالة وبس

[ملاعب الريح]

رح الوكاله مادام إنه لا زال على الضمان.......وش بيضرك


تحياتي (ملاعب الريح)

[السنع كله]

رح الوكاله مادام إنه لا زال على الضمان.......وش بيضرك000000000000000000صح

[salehhd]

السلام عليكم

جرب غير ماي الردتير احتمال المادة الخافضة للحرارة انتهي مفعولها

وركب اصلي ولا تاخذ تجاري وان شاء الله المشكلة بسيطة

[ع.ف.الدرويش]

انك مو مشغل الدبل طبعا يكون عليه جهد جبار جدا جدا جدا وسال مجرب
يعني موترك طبيعي لكن انت جرت عليه بالحيل وسط النفود وبدون دبل طبيعي ترتفع حرارته

Barq al7'eel..

أنا مامعي باثفايندر..لكن اسمح لي أقتبس كلام الربذي وأقول فعلاً ممكن يكون هذا السبب وماهو حصر على الباث أي جيب ينطبق عليه الكلام بسبب الجور بإستخدامه في النفود لذلك نصيحة خله على الخفيف ووكل الله..وإن كنت متخوف من الأمر فعليك بالوكالة تحت الضمان أو لا.. يعني من لأجل الإطمئنان فقط لاغير..
هذا كل ما لدي.. والله يكون بعونك..

أخوك..( أبو فهد )..
والله يكون بعونك..

[الربان]

اخي بارق اليل

السلام عليكم ورحمة الله وبركاته

الغالبيه اجمعو على الذهاب الى الوكيل المعتمد لديك لوجود ضمان ساري المفعول وهذا هو القرار السليم

حتى وإن لم يفقهُ شئ وذلك كي لا يجدو عليك مدخلآ بأنك قمت بتغيير او عبثت بشئ وهذه من عادات

بعض الوكلات هداهم الله,هذا والله اعلم.

وارجو المعذره على الإطاله

[باثفندر]

الحرارة تتعدى النص شروكي .. بليزر ... جمس ... يمكن ,
لاكن باث 2005 وفي الشتاء لا..لا ... لايمكن ابدا الحرارة بالرمله ترتفع شي بسيط بس فوق النص واجد ياناس وينقص عليك الرديتر
وشوله حاطين ضمان رحلهم
والله يعينك وش لون تشرحلهم دلوخ ولا يفهمون ولا تقدر ترفع حرارة السيارة لهم ( خبره سابقه يقولون كل شي طبيعي ) والله يعينك .

[سرّاوي]

هلا والله اخوي Barq al7'eel

دامه على الضمان رح به للوكاله اضمن ....... هذي حراره وانا اخوك مهيب لعب

اتمنى لك التوفيق ..........

[ك ه ك 777]

السلام عليكم ورحمة الله وبركاته

اذا الموتر علي الضمان لاتشاور رح للوكاله

لاكن انا اختلف مع الاخوان اللي قالو ان الموتر بدون دبل في النفود يتعب اكثر وترتفع حرارته مع الجهد الجبار .. بلعكس اذا استخدمت الدبل تزود الحراره وتزود صرفيت البنزين في نفود او رافعه علي بلك

*ان شاء الله فهمتو قصدي والعذر والسموحه صاااااكتني فلونزه ميعت مخي ولا فيه تركيز

[ممتر البران]

يا ابن الحلال القطه للوكاله وريح بالك دامه على الضمان لو انه مهوب على الضمان ان تاخذه وتنق القروش اللي يبونها لكن دامه على الضمان خذه وشف وش يقولون لك وان شاء الله مهيب مشكله
بعدين من ناحيت تصييخ ما اتوقع الا ان كانك تعبيه مويه بزبوز يعني مهيب مقطره والبزبوز هو اللي يخليه يصدي وبالتالي يحتاج الى تصييخ والبلف كيف يجيه تراب يا اخي بالعقل
شيك على مستوى المويه الا برد ونصيحه ان كانها ناقصه لا تزود ما الا الا برد تماما ولا بينشعر راس المكينه