مشورة يا اخوان واتمنى المجربين وراعين الخبرة

[ملبق غلـــــط]

السلام عليكم ورحمة الله وبركاتة

يا اخوان ابشركم شريت ربع باترول ستاندر 2006 جديد اللون لولوي والحمدلله اخذته بعد قناعة ومشاورات

والموتر ماشاء الله عليه.........المهم يا اخوان مالكم بطويلة ودي بنصيحة بخصوص الجنوط والكفرات

انا رجل اسافر كثير وطلعاتي للبر كثير

سوال وش يصلح له من جنوط وكفرات :

1- جنوط oz وكفرات بالون ( تعطي منظر اكثر من رائع ) بس يقولون ترجع الكفرات ؟؟؟؟

2- جنوط الباترول 4 ابواب السفاري 1 وكفرات برجستون مريحه وتفرفع الموتر وحلوه للبر والمدينة ؟؟؟

سوالي بعد : هل تركيب بطارية اضافية يضر كهربت الموتر وهل تنصحوني فيها او لا؟؟؟


واتمنى اللي عنده فكرتن زينه للباترول يعطينيها

[almontlaq]

حلوه هل الفكرة

[الوشيقري]

السلام عليكم, اخوي هذي معلوماتي المتواضعه جدا, لكن لاتاخذها بالاكيد لان بصراحه ماعندي خبره في هالامور ولا ودي اشوش عليك, لكن هذا الكلام الي اسمعه من الزملاء:
اولا: بالنسبه لكفرات البالون لاشك انها تشنقل الموتر وتعطيه منظر لكن الي اعرفه انها ماتنفع الا في الرمل, وحساسه لغير الرمل يعني حرام تندمر عليك( خصوصا انها غاليه الكفر اظن ب400 او اكثر) يعني انا انصحك بخيارك الثاني الي ذكرته.
ثانيا: بالنسبه للبطاريه الثانيه انت وش تبيها له ؟ يعني حسب استخدامك لها, اذا كان عشان تشبك عليها اشياء اظافيه وش المانع انك تاخذ وحده منفصله معك ( خذ لك كوريه صغيره ورخيصه) ودبر لها مكان في الموتر وطلع منها فيش( في السفاري القديم اذكر كان فيه مكان مناسب وحلو مره وهو المكان الي تطلع منه العفريته.
وبالنسبه للافكار: انا عندي افكار كثيره لكن تخص مواتر البر بشكل عام وليس السفاري وانا انصحك تروح لخيمة تجهيز السيارات وخيمه ادوات وعدد البر واكتب في البحث: سفاري او باترول.
وشكرا وجزاك الله كل خير.

[فلان بن عفتان]

1- جنوط oz وكفرات بالون ( تعطي منظر اكثر من رائع ) بس يقولون ترجع الكفرات ؟؟؟؟

جنوط oz ماتصلح للبر أبداً ..

[ابو نوره]

السلام عليكم
من وجهة نظري احسن جنوط للربع الي هي حقت الباجيرو(الهلل) مع بالون900
او جنوط السفاري الكروم مع كفرات يادنلوب او هانكوك
وشكراً

[ابونايف الروقي]

السلام عليكم
مبروك الموتر والله يعطيك من خيره ويكفيك شره يابو مشعل .
انا انصحك لا تلعب في الكهرب نهائيا اذا كنت تبي تركب بطاريه اضافيه عشان جهاز اللاسلكي وعشان القارمن وماطور الهواء هذي محلوله اشبكها على البطاريه مباشره (( مع وجود فيوز))...
واذا كان قصدك من تركيب البطاريه الاضافيه عشان كهرب فركب محول يشغل لك لمبات ويشغل لك كمبيوتر ويشغل لك تلفزيون ان بغيت قوته 400 واط وفيه اكثر وفيه اقل ويعطيك كهرب 220 واط ازين لك من اللعب في الكهرب .. لان الكهرب في السياره مقسم بنسب معينه لكل جهاز او قطعه الكهرب الي تحتاجه لا يزيد ولا ينقص .
وبالنسبه للجنوط والكفرات انا وجهة نظري جنوط باترول فل كامل بس 16(( لا تاخذ مكحله )) وكفرات بالون ماكسس ابو جمل 8 غاط ورصص ترصيص ارضي ..
وعندي لك عدد من الافكار :
1- لبس الارضيه بلاستيك 5 ملم كامله .
2-لبس المراتب تلبيسه خاصه للباترول يجي فيها جيوب مع الجنب وخلف المرتبه او مخمل لا تركب جلد نهايئا ولبس الطبلون تلبيسه لصق .
3-سلك للانتل حق الاسلكي وسلك للبطاريه والقارمن .
4-ركب الانتل في الجهه اليمين وركب في قاعدة الانتل لمبه بفاصل عندك تحت الدركسون .
5-ركب في الجهه اليسار انتل القارمن الابيض الكبير.
6-رش الموتر بما انه جديد ماده عازله على الوجه والانوار وايضا رش اسفل السياره ماده مانعه للصداء ومانعه لترسب الاملاح.
7-تانكي ماء في المرتبه الخلفيه .

وتوكل على الله ..

[ملبق غلـــــط]

كلن باسمه ماقصرتو على الردود ورحم الله والدينكم وماقصرتو