اللي جرب كفرات البالون يدخل يفيدنا مشكوراً مأجوراً

[ملاعب الريح]

بسم الله الرحمن الريحم



السلام عليكم ورحمة الله وبركاته



ناوي أركب لي طقم كفرات على لاند 97 وودي أجرب كفرات البالون وش رايكم فيها




1- أي ماركه الأفضل

2- قوة تحملها

3- كم سعرها تقريباً

4- تتحمل حصا ولا لا







تحياتي لكم جميعاً



ومشكورين مقدماً


ملاعب الريح

[المحبوب11]

هلا اخوي
كانك راعي دروب فيها جلد (حصى) ماتنفع لانها بتشقق على طول هي للرمال فقط فيه نوع مابين البالون والعادي حلوه اشوف الشباب يمدحونها اسئل عنها
وشكرا

[M o b d a]

أخوي

خذ لك الشاهين

حول البالون

ويمكن تتحمل الحصى

ومعرفوه الكفرات

والبالون بالخط ولا بريال

يلعب الموتر ويرج

[هويدي]

وعليكم السلام ورحمه الله وبركاته


عني انا مجرب سيام 6 غاط مامثلها بالنفود والوعر حط فيها 20 وريح بالك

بس سمعت انها انقطعت واشوف العالم هابين بـ ماكسس بس ما جربتها

وعيب البالون تثقل الموتر بعض الشي والرساوه بالخط لك عليها

[((الخالدي))]

أخوي

خذ لك الشاهين

حول البالون

ويمكن تتحمل الحصى

ومعرفوه الكفرات

والبالون بالخط ولا بريال

يلعب الموتر ويرج

ما أزيد على كلام أخوي

البالون ماأخذه ولابريال

الشاهين أحسن كفرات للبر والخط

[ملاعب الريح]

إخواني




المحبوب 11 مشكور على إفادتك وكاني بركب شي غير البالون فأنا برجع للدنلوب

m o b d a مشكور على ردك لامن الشاهين مشكلته جمبه ظعيف

هويدي مشكور على المعلومات والسيام وش صناعته؟



بإنتظار باقي الأعضاء





تحياتي (ملاعب الريح)

[ملاعب الريح]

الخالدي منور بمرورك وردك


لاكن أحد الأقارب جرب الشاهين ويذمها يقول جنبها ضعيف جداً مقارنه بباقي الكفرات......



بإنتظار باقي الردود والنصائح



تحياتي (ملاعب الريح)

[هدار]

السلام عليكم :
دنلوب نقشة شاهين لايفوتك واذا بالون افضلها عندي اسيام تاير (تايلندي)

[Abu.Saif]

السلام عليكم

(ولا تلقوا بأيديكم إلى التهلكه)

البالون مخصص للرمل فقط واستخدامه على الزفلت لازم يكون محدود جدا جدا جدا والسرعه على البالون ما تتعدى 120 كلم

اذا انت ساكنن بهجره والبر ورى بيتكم خذ لك بالون ولا غير كذا خذ ميشلان ولا دنلوب ولا بغيت النفود نسم له انا اشوف المسأله كلها عجز و كسل شباب ساكنين وسط الديره ولا يطلع البر الا مره بالاسبوع ولازم يطوي له 50 كلم عشان يوصل ويبي يمشي عليه فوق 160 سرعه لكن ما يبي ينسم ما يبي يبرك حدر الموتر ويوسخ ثوبه

السلامه..السلامه..والحديد ما يرحم وانا اخوك..شفنا من حوادث البالون اللي يكفينا..

ابو سيف

[عاشق السيل]

إنتبه ،، إنتبه ،، من البالون تراها خطيره جدا بالمطر وماتتحمل الطرق الوعرة وماتنفع بالخط ،،

لكنها أفضل كفرات بالرمال فـــــــــــــــــــــقـــــــــــــــــــــط !!

تبي رايي عندك ( بالترتيب ) هنكوك أو فايريستون أو يوكوهاما أو دنلوب أو تويو وغيرها لايهمك ...

تقبل مروري ،،،


عاشـقالسيل

[ملاعب الريح]

هدار وعليكم السلام ورحمة الله وبركاته مشكور لاكن عندي سؤال الدنلوب نقشة شاهين عريض ولا سخيف (سلق)؟


أبو سيف أعرف شباب يستخدمونه لمدة سنتين والنقشه معدومه (غير موجوده) ولا فيه إلا العافيه ويمدحونه


عاشق السيل مشكور على حرصك وتنبيهك



تحياتي (ملاعب الريح)

[الرسام]

نصيحتي لك يا ملاعب الريح
كفرات البالون له مميزات وله عيوب

المميزات من وجهة نظري الخاصة
1- يعطي شكل للسياره و يرفعها وهذا اكبر سبب يخلي الشباب يركبونها عندنا في الشرقيه
2- لين على السياره ( يخفف المطناج , المطبات )
3- ما يحفر في الرمل
4- جيد في الارض الحجريه
5- الكفر ما ينسلخ ابدا

العيوب
1- رجه للسيارة
2- يزحف مع المطر
3- ما يطول حده سنه ونصف
4- يلعب الموتر على الخط لانه رفيع

هذه مميزاته و عيوبه من خلال تجربتي والناس يختلفون في اهتماماتهم
ناس اهم شي الشكل و ناس الراحة و ناس المحافظة على السياره

اما عن اشهر انواع اسيام و ماكسس واسعارهم ترتفع و تنزل على حسب الكميه الي في السوق ولكن تقريبا من 330 الى 450
وشكرا

اخوك الرسام

[هاوي الله]

وعليكم السلام ورحمه الله وبركاته


عني انا مجرب سيام 6 غاط مامثلها بالنفود والوعر حط فيها 20 وريح بالك

بس سمعت انها انقطعت واشوف العالم هابين بـ ماكسس بس ما جربتها

وعيب البالون تثقل الموتر بعض الشي والرساوه بالخط لك عليها

السلام عليكم ورحمة الله وبركاته

ما أزيد على كلام أخوي هويدي >>>> هذا بالنسبه للبالون
[line]

والنوع الثاني هو كفر الهدد الجديد (معرض اليحيى)
ونوعه = دانلوب 6 غاط مقاس =(LT235-85-16(108/104S
ولازم تكون الجنوط = جنوط هلل أو جنوط هدد جديد >>>> الفكره واضحه عشان عرض الجنط + الكفر

وسلامة الجميع ,,

[ملاعب الريح]

نصيحتي لك يا ملاعب الريح

كفرات البالون له مميزات وله عيوب

المميزات من وجهة نظري الخاصة
1- يعطي شكل للسياره و يرفعها وهذا اكبر سبب يخلي الشباب يركبونها عندنا في الشرقيه
2- لين على السياره ( يخفف المطناج , المطبات )
3- ما يحفر في الرمل
4- جيد في الارض الحجريه
5- الكفر ما ينسلخ ابدا

العيوب
1- رجه للسيارة
2- يزحف مع المطر
3- ما يطول حده سنه ونصف
4- يلعب الموتر على الخط لانه رفيع

هذه مميزاته و عيوبه من خلال تجربتي والناس يختلفون في اهتماماتهم
ناس اهم شي الشكل و ناس الراحة و ناس المحافظة على السياره

اما عن اشهر انواع اسيام و ماكسس واسعارهم ترتفع و تنزل على حسب الكميه الي في السوق ولكن تقريبا من 330 الى 450
وشكرا

اخوك الرسام

مشكور وما قصرت أخوي الرسام على الإفاده وبالنسبه للزحف مع المطر موتري دفع رباعي مستمر.....



وعندي سؤال ليه البالون ما ينسلخ؟




تحياتي لك (ملاعب الريح)

[ملاعب الريح]

السلام عليكم ورحمة الله وبركاته

ما أزيد على كلام أخوي هويدي >>>> هذا بالنسبه للبالون
[line]

والنوع الثاني هو كفر الهدد الجديد (معرض اليحيى)
ونوعه = دانلوب 6 غاط مقاس =(LT235-85-16(108/104S
ولازم تكون الجنوط = جنوط هلل أو جنوط هدد جديد >>>> الفكره واضحه عشان عرض الجنط + الكفر

وسلامة الجميع ,,

مشكور أخوي على هالرد


مشكلة كفر الهدد إنه نحيف جداً مقارنه بالبالون


والجنوط اللي بركب عليها الكفرات جنوط هدد.......


تحياتي (ملاعب الريح)