أين تضع سكين الصيد الخاصة بك ... شارك برأيك...

[سماوي]

أين تضع سكين الصيد الخاصة بك ... شارك برأيك...
بسم الله الرحمن الرحيم
السلام عليكم ورحمة الله وبركاته

سؤال أريد أن أطرحه عليكم وهو دقيق مرة ( وأحياناً تقول ماله داعي )
السؤال هو : أين تضع سكين الصيد الخاصة بك ؟؟؟؟
لأنك عندما تذهب لصيد القميري فبالتأكيد أنك ستحتاجها بكثرة ( إذا كان فيه صيد )...!!!!
وكذلك لمًا تذهب لصيد الجرابيع ( وما أدراك مالجرابيع أبو المرقة اللي تغسل فمك 40 يوم ....... )
إيه صح تراي رحت عن السالفة ...

وشي السالفة ...آآآآآآ
أيه صح تذكرت !!!!
أعذرون يا أخوان تراي أنسى بلاني الله بمرض يسمى مرض الكحة

أقول عندما تصيّد جرابيع تحتاج السكين الخاصة بالصيد كل فترة قصيرة ...

فلا بد من أن يكون لها مكان ....حتى تكون قريبة منك ....سهلة التناول .... لا تضيع منك .... ولا تسقط من السيارة إذا فتحت الباب.....و.........و........

أرجو من أعضاء مكشات الحلوين يشاركوننا بآرائهم

والله يرعاكم

[ابو عمر اللاحم]

حياك الله يا السماوي

فيه سكين سغيره على شكل ميداليه لها سلسال وحلقه،، حاده وحليله هذي طال عمرك علقها بصبعك الخنصر بوسطة الحلقة ثم صيد على كيفك .

انا استعملها ومرتاح لها مره خاصه في صيد الدخل .

تحياتي ،،،ight:

[الباهي]

والله انا احطها في مخبى (جيب) الباب حق السواق مهوب حق الراكب علشان اذا رميت الصيد لاوالله والسكين عندي قريب امد يدي وبسم الله انحره

[عليان الليل]

اسرع للوصول له
وكلما صارت السكين صغيرة كلما صار احسن
وهذي صورة السكين الي عندي

تحياتي ..

[...الطوقي...]

هلا وغلا

انا الله يسلمكم اخلي احد يمشي معي شايل السكين ...

والله على حسب اذا كنت بالسياره حطيتها بالمخباة حقت الباب

واذا نزلت حطيتها بالصفن او بيدي معلقها ....

مشكوور على الموضوع اخوي ....














تحياتي لك
...الطوقي...

[بو جبل]

خصص لها مكان في السيارة مثل قاعدة الجوال من محلات ابو ريالين وإلا فصل( خيط) لها جيب في البندق الي تصيد به تراك بتستفيد جداً ولايمكن تضيع

[عليان الليل]

حلوة والله يابو جبل
فكرة جميلة انك تفصل جراب صغير للسكين
تحطه بكعب البندق
الله يعطيك العافية
تحياتي..

[المري]

شكرا لكم على هذا الموضوع الرائع..



بالنسبة لاخوكم المري اكثر واحد يضيع السكين في العالم.. كل يوم مضيع وحده


وبالاصح كل ماحصلت صيده نسيت سكيني عندها , مره من المرات صدت حبارى


ونسيت السكين عندها , جاء واحد من الربع ومر على المحل اللي فيه السكين ولقى

السكين ويوم جاء في الليل , قال: عادتك ماتخليه وعطاني السكين.


بالنسبه وين المحل المناسب اضع فيه حبل قصيروعلقها في الدبل او القير

علشان تكون قريب منى.


شكرا لكم على هذا الموضوع.

[القرناس المهاجر]

هلا بالسماوي

بالنسبة لي فأنا رجل من قبـيلةٍ تهتم بالمحزم 00 يعني اضع محزم من الجلد 00 وفيه السكين بجرابها وطبعا سكين تذبح الظبي ام شوكه ( كاشغري ) 00 ووجودها بالنسبة لي في غاية الأهمية ليس لذبح الطرائد فقط 00 ولكن لي فيها مئارب أخرى..؟

واذكر مرة نسيتها على الطبلون 00 وحصلت طير ويوم رميت له القمرية خذاها وانحاش فلحقته وأنا اناظره فوق ولدري ويش اللي قدامي (( مجانين الشباكين )) وفجئة خشيت في منطقة طعوس وكول فأخذ الموتر يطير ويوقع وشوي والسكين طايره من قدامي متجهه للصندوق والقدور والفناجين وكل العزبة جاتني على قدام واحد يظربني في راسي واللي في جنبي المهم انحست في الموتر وورطت في سيارتي 00 ووالله يالربع اني إلى اليوم مدري وين راح الطير ..؟ لكن الحمد لله ان السكين
ماظربت في وجهي والا في حلقي 00 كان حصل شيٍ ثاني ..؟

تقبلوا تحــــياتي 00

[صوح الجبل]

السكينه الفرنسيه .... اصغر مقاس او اللي اكبر منه شوي .... مافيه باس تكون دايم بمخباتك ..... تحتاجها عند ادنى شي

[ابو شوزن]

بعض انوع جراب البنادق يجي فيها جراب صغير للسكين هذا الجراب عند الرمايه .

[محب الرمنغتون]

اما انا سكيني هي

اقرب عصن شجرة مكسور 00 اسمي واذكيها به000

[المطلق]

يوجد طريقة رائعة جداً

ألآ وهي

إنك تشتري سكين وتركب لها سلسلة أو خيط وتربطه بسحاب جراب البندق أو إذا ما كان على البندق جراب اربطه بحديدة الزناد

[سبع الليل]

لك اربع خيارات

اذا كان صيدك مطر انك تنزل وتمشا وترمي ..

في هالحاله تحيزم بمحزم رصاص على خصرك ويكون له اكثر من فايده واحد رصاصك ثابت ومتوفر ولا يذيك اثنين تعلق خنجر او سكين الي هو ثلاثه جهاز ارسال لاسلكي الصغير المحمول او اي شي ثاني

اثنين فيه سكاكين لها حديده زي القلم اذا تبي تعلقه بمخباتك شلون؟؟
فيه سكين زيه له حديده تعلقه فيهاا اما تعلقه بمخباتك او عند ازرارت صدرك بثوب او بسير الساعه
ثلاثه
سكين يكون له سلسلة وتعلقه بيدك زي الساعه او بالبندق

ونصيحتي فيه سكاكين ردادي لكن مهو على الجنب لا فوق وتحت يعني تدق الدقمه تطلع فوق تدقها مره ثانيه تدخل داخل (زي سكاكين المصارى بالفلام)

وهاذي اول هام سريعه ومريحه ومايدمر ثيابك الدم وبي مكان تحطها ماشي الحال

[نومـــــاس]

في مخباة الثوب ما تنزل