ظاهرة إرتفاع أسعار البل .. أدخل وعطنا رايك

[خيال الصبحا]

بسم الله الرحمن الرحيم

السلام عليكم

ورحمة الله وبركاته

كيف حالكم يااهل مكشات؟

العلم سلامتكم كثروا الي يتكلمون عن ارتفاع اسعار البل ، وكأن ماعندهم قضية إلا هي ، ونسوا لوحات السيارات الي بيعت بملايين وأرقام الجوالات الي بيعت بملايين ، ورسمات بعض الرسامين الي بيعت بملايين ، ومناديل بعض الفنانات الي بيعت بملايين ،والكلاب وانتم بكرامه الي بيعت بملايين على شان شكلها ، والطيور الي بيعت بميئات الألوف(مع أحترامي وتقديري وحبي لاهل الطيور)وأيضًا السلق الي تسام بعشرات الألاف ، و.. و.. و.. الي لو تعد ماتخلص اليوم تركوا ذي كلها ولدوا لعطايا الله ، لذلك حبيت أننا نناقش الظاهرة ذي هنا ، بدل من أننا نخرب بعض المواضيع الي وضعت للأستشارة أو العرض ونحولها لغير أتجاهه بشكل مايفيد كاتب الموضوع ولا قاريه ،بس يشوه الموضوع لذلك الي عنده وجهت نظر تستحق يعرضها هنا بدون تهجم ولا تهكم بأحد ، ويلتزم بأداب الحوار ، وكلن يجيب الي عنده ، وبما أن كلن يجيب الي عنده أنا أبي أبدأ وأقول: اللهم صل على محمد، قبل لا أبدأ لا أحد يقول لو أن فلان متصدق بها أو باني بها مسجد أو مسوي ومسوي ، أنا معكم أن هذا عمل خير ، وكلنا نطمح لهذا ، وماخلقنا إلا لطاعة الله ، ولكن خلوا النقطة ذي على جنب ، لإنكم ماشاركتوا الرجال بحلاله ، ولا تدرون هل هو يتصدق او لا ؟؟ وهل بناء مسجد أو لا ؟؟ ...الخ ولكن خلونا بموضوعنا ، أتفقنا .المهم أنا ماراح أتكلم عن البل وماضيها وتاريخها العريق ، وأن أباءنا وأجدادنا أرخصوا أرواحهم دونها، ومافيه شيء أغلى من الروح،ولكن أبي أتكلم بأسلوب يرضي الجميع بإذن الله الأبل بالوقت الحالي تعتبر (بعين أهل المال والأعمال)سلعة مثل باقي السلع ، يترزقون الله من وراها ، مثلها مثل السيارات وغيرها ، يعني بما أن أسعار الأبل مرتفعه فالأغلبية راح تكون نظرتهم مادية ، وهالشيء راح تعرفونه مستقبلاً كان الله أراد أن أسعار البل تطيح ، راح تشوفون أهلها الي يحافظون عليها ، وتشوفون الي دخلوا يدورون التجارة ، ويبين اهل البل الي حافظوا عليها قبل لا ترتفع أسعارها ، من الي دخلوا يدورون الشهره والمكسب ، عمومًا البل سلعه(بنظر البعض)مثلها مثل السيارات فلو أن السيارات أرتفعت أسعارها إلى مليون و مليونين ، وسوقها ماشي بيع وشراء ، وش راح تكون نظرة الناس لها ، أكيد أن الي مقتدر يبي يشري ويبيع ، صح والا انا غلطان ؟بالذات ان كان لها عائد مادي للفرد ، وهذا الي صار بسوق البل ، أرتفعت أسعارها ، ورجعت بعائد مادي وشروها الناس طيب البعض يقول البل يمكن تمرض أو تموت ، وانا أقول السيارات الي قبل شوي يمكن تحترق ، او تنسرق أو تصدم بها ، فهل هذا يعني أننا مانشري سيارات أبد ،الحين فيه شيبان وكبار سن يشوفون أن الي يدفع 100.000 (مائة الف ريال)بسيارة أنه مجنون!يقولون الحمد لله احط 100 الف بقوطي ، فليش البعض يشري سيارة بمية الف المفروض أننا جميعًا نشري سيارات على قد الحال على شان نرضي الجميع ، وهذا مثله مثل البل ، لإن البعض يشوف أن دفع كم مليون بالبل جنون ، ولو انه يقدر عليها كان هو اول من دفعها ، مثل الشيبان الي من شوي لو تعطي الواحد 3 أو 4 ملايين تلقاه أول شيء يسويه يشري له سيارة جديدة.ويالي تناقشون ارتفاع اسعار البل ، أن جين للنظرة المادية أنا معكم بعدم التبذير والأسراف ، ولكن أن كنت تتاجر بشيء معين ، وارتفع سعره هذا الشي هل هذا يعني أنك توقف عن المتاجرة ؟؟ الدين الإسلامي يحث العبد على طلب الرزق ، فهذا الشيء من طلب الرزق ، وهو بيع وشراء وفق لضوابط الدين الإسلامي ، والدين ماحدد لنا حد معين بالمتاجرة يعني تقدر تتاجر بالشي الي ربحه نص أو ريال ، وتقدر تتاجر بالشي الي ربحه مليون ومليونين مادام وفق ضوابط الشريعه ، وهذا بيع صريح وشراء صريح وسلعه تشوفها قدام عينك وتملكها ، ولها مردود مادي. فيه أشياء مالها مردود مادي ولا لها فائدة بيعت بملايين الريالات ، وأبسط مثال لوحات السيارات ، كذلك فيه أشياء وسلع ماتشوفها ، مثل الأسهم الي لو حصل أدنى شيء لاقدر الله راحت فلوسك وانت ماتعرف عنها شيء ، أما البل قدامك ، ولو يصير الي يصير تبقى قدامك وتشوفها ،والبعض يقول أنها راح تطيح وراح يرجع سعرها مثل قبل ، اقول للي كذا هل تعلم الغيب؟؟هل ينزل عليك الوحي؟؟أكيد الجواب لا ، فأقول وش دراك أنها تبي تطيح؟؟يقول هذا حال الدنيا ، وكل سلعة بعد ماترتفع تنزل(وأقرب مثل سابك والمصافي والناس الي تخوبروا بها)لذلك البل تبي تنزل ، أقول طيب وأن نزلت أنت تقول أنها سلعه وتجاره ، والتجارة معرضه للربح والخسارة وهذا شيء طبيعي ، يعني أن نزلت مثلها مثل غيرها ،والبعض يقول أنها غسيل أموال ، وانا اقول للي يقول كذا لا تحط شيء بذمتك ، وارجع واقول لا تقولون يتصدق بها ، لإن هذا شيء بينه وبين ربه ، وعلى فكرة أعلى قيمة فحل سمعت بها هي 20مليون(عشرين مليون)وهو الفحل تمام فحل هيف بن عبود القحطاني حتى يكون المجادل على بينه،والي عنده شيء يقوله ، وأسف للإطالة(والخلاف لا يفسد للود قضية) ، وشكرًا

هذي هديه لكم لوحة سيارة مبيوعه بـ25مليون ريال

[سلطان العوني]

اخوي حيال الصبا
وعيكم السلام ورحمة الله وبركاته
بخير جعلك بخير

بالنسبه للسبب ارتفاع اسعار الابل اتوقع انه من الاسهم
لأن الناس جالهم وقت كان حديث المجالس وانت اخبر مني بهالامور
وبعد نزول المؤشر في قاع الارض الناس توجهت للعقار والابل ومن هالمشاريع وهذا اتوقع هو السبب الرئيسي


هذا ما عندي

والله اعلم

[ظل سدرة]

السلام عليكم الاخ خيال اشكرك على هالمواضيع الجاده والهادفه0
والبل اسعارها بدأت ترتفع بعد اول مزاين لام رقيبه
ومازالت بارتفاع وبالذات الوضح والمجاهيم
والحلال كله ارتفعت اسعاره والبل تستاهل
مايدفع فيها ولاهو بخساره

[راعي الركيات]

تبي الصراحه اعتقد ان فيه شي من بيع الذمه والدخول في الحرام من بيع حيوانات بملاين الريالات وهي كانت موجوده امامهم من قديم الزمان ولم تصل الي ماوصلت اليه الان من اسعارمبالغ فيها
ليش في هذا الوقت ارتفعت ووصلت الي هذه الاسعار الخياليه اعتقد في الموضوع كم علامة استفهام ولابد تستنتج من الامر :
1ـ هناك تغرير لبعض اصحاب العقول الضعيفه لما يحصل وهو بايصال المعلومه لهم ان هذه السلعه فعلآ تستحق هذا السعر
2ـ يوجد من بين هذه الفئات من لايخاف الله ويقوم بغسيل الاموال وهي اموال حرام تاتي من بيع المخدرات وغيره كفنا الله واياكم الشرور
3ـ هناك فئات معروفه من بين اصحاب هذه السلع لايتعاملون بالنقد يعني البيع عندهم بيع نجش تجد من يزيد في السلعه لكن لايشتريها حتي لو وقف المزاد عليه وتباع علي انسان ضعيف يكون هو صيدهم ومن خارج مجموعتهم
4ـ هناك من لهم مطامع في الشهره بمعني ان فلان من الناس اشتري السلعه الفلانيه بمبلغ باهض من اجل ان يتحدث الناس عنه ويصل الي مراده من خلال هذه السلعه
اخيرآ ارجو اني مازعل احد بكلامي والموضوع للمناقشه والاستفاده للجميع من خلال هذه المواضيع الجيده
وتقبل مروري

[ابرق العزاف]

ياعمي يقولون انهزت الاسعار
في المزاين الاخير الاسعار انزلت
كتبه احد الاعضاء هناء قبل فتره

[winchester]

للأسف بعض الناس ماعنده ذمه

أبغى فـائده وحده فقط من جمل بيع بـ12مليون ريال سعودي

هـل توجد فـائده دينيه في أول المقام لان سعينا بالدنيا هو طاعة الله سبحانه ورسوله صلى الله عليه وسلم ودين الله الحنيف ( لاأظن توجد فـائده دينيه)

فـائده صحيه لايوجد

فـائده أجتماعيه لايوجد

فـائده أقتصاديه لايوجد

أبغى فـائده واحده فقط مرجوه من (جمل) وصـل الى هالاسعار من الناس اللي يقولون يستاهل!

الظاهر الحليب واحد مافيه ملكي وعايدي كلها حليب ويرجع الطعم لنوع العلف..

تسئل عن السبب يقول خشمها طويل وسنامها راجع للخلف والمسافه بين العين والاذن .... الخ

طيب وش أستفيد من هالمواصفات !

أنـا بوجهة نظري هذا يرجع لزيادة المال وضعف العقول والتفكير في مجال يوهم الناس بسلب أموالهم وتطفيف بالاسعار

مثل التوس الشاميه وش الفايده منه والله لو يذبحونه ماأكلت من لحمه والله لو يحلبون عنز شامي ماشربت من حليبها

وصل سعر أحد التيوس لـ800الف ريال أذا كان وصلت هالمبلغ أبني ثلاث مساجد بالراحه لكن مستحيل هاللي بدفع هالمبلغ يضعها بأعمال

خيريه لان الشيطان يلعب دور كبير في البيعه وعلى مسئوليتي بعضعهم ينقص المصاريف على أهله كل علشان ناقه أو جمل أتويس أو لوحة

سياره أو رقم جوال!!

وين عايشين!!

اللهم لاتواخذ مافعل السفهاء منا

(هذي وجهة نظر خاصه بي)

دمت بود

[أبو شاهر]

ارتفاع اسعار البل مرهون بعدة نقاط مهمه هي

1-اهتمام الامير مشعل بها ورعايته لمهرجانات الابل.

2-المزاينات/القبايل/ام ارقيبة/نوفا.

3-توفر الاعلاف وخاصة الشعير لوينقطع من استراليا راحت البل فيها وصارت الناقه ماتسوى شي مثل الاسهم.

4-ارتفاع اسعار البترول(يعني اهل الخليج انفقعو من الدراهم ).

5-الامن- الامن- الامن اجل ناقه بمليون ريال تخليها في الخلاء ماتنسرق او تقتل .

6-حب الظهور والمباهاه والمهايطه.

7-الجهل وعدم ادراك عاقبة الامور شخص عنده200ناقه من50000=عشرة ملايين ريال وهو ساكن في منزل خرابة.

8-القنوات التي ظهرت اخيراً/الساحه/الواحه/الدانه.


9-المبالغة والكذب من قبل الشريطية.

[فزاااع]

اخوي خيال الصبحا سبق اننا تناقشنا بهالموضوع انا وياك بلموضوع حققك عن الفحل
سويعان على الرابط هذا
http://www.mekshat.com/vb/showthread...951#post987951

ولكن اعتقد ان السبب الوحيد والرئيسي هو الماده يعني انت ماحولك فلوس عز الله منت متدين او متسلف وشاري
لك ناقه بميه الف وانت راس مالك خمسه الاف ريال !!!!! ولا انا غلطان

[northstar46]

الموضوع كله تباهي الابل اللوحات الطيور الخ الخ وهو غير مقبول لا شرعا ولا عقلا وهو اسراف وتبذير ومن اضاعة الاموال في غير محلها فمن يشتري فحل ب12مليون تجده لا يعطي السائل 5ريالات وهذا واقع اعرفه جيدا الا من رحم ربي وانتشار هذه الظواهر خطير نسأل الله الا يجعله سببا لعقوبته وان يهدي اهله سواء السبيل.
اخي الكريم ارجوا ان لا تغضب على لاني احسست بذلك عند ردي على موضوع الفحل سويعان

[خيال الصبحا]

اخوي حيال الصبا
وعيكم السلام ورحمة الله وبركاته
بخير جعلك بخير

بالنسبه للسبب ارتفاع اسعار الابل اتوقع انه من الاسهم
لأن الناس جالهم وقت كان حديث المجالس وانت اخبر مني بهالامور
وبعد نزول المؤشر في قاع الارض الناس توجهت للعقار والابل ومن هالمشاريع وهذا اتوقع هو السبب الرئيسي


هذا ما عندي

والله اعلم

الأخ سلطان العنوني
أشكر لك مرورك وردك الكريم
والأسهم قد تكون سبب ، ولاكنها ماهي
السبب الأساسي ، لإننا سمعنا بفحل هيف والفصام
قبل ترتفع الاسهم ، وقبل ترجع تطيح ، وشكرًا

[خيال الصبحا]

السلام عليكم الاخ خيال اشكرك على هالمواضيع الجاده والهادفه0
والبل اسعارها بدأت ترتفع بعد اول مزاين لام رقيبه
ومازالت بارتفاع وبالذات الوضح والمجاهيم
والحلال كله ارتفعت اسعاره والبل تستاهل
مايدفع فيها ولاهو بخساره

الأخ ظل سدرة
وعليكم السلام
أشكر لك مرورك
وردك الكريم ، وصدقت
بعد المزاين طارت أرتفع سعر
الحلال ، وشكرًا

[خيال الصبحا]

تبي الصراحه اعتقد ان فيه شي من بيع الذمه والدخول في الحرام من بيع حيوانات بملاين الريالات وهي كانت موجوده امامهم من قديم الزمان ولم تصل الي ماوصلت اليه الان من اسعارمبالغ فيها
ليش في هذا الوقت ارتفعت ووصلت الي هذه الاسعار الخياليه اعتقد في الموضوع كم علامة استفهام ولابد تستنتج من الامر :
1ـ هناك تغرير لبعض اصحاب العقول الضعيفه لما يحصل وهو بايصال المعلومه لهم ان هذه السلعه فعلآ تستحق هذا السعر
2ـ يوجد من بين هذه الفئات من لايخاف الله ويقوم بغسيل الاموال وهي اموال حرام تاتي من بيع المخدرات وغيره كفنا الله واياكم الشرور
3ـ هناك فئات معروفه من بين اصحاب هذه السلع لايتعاملون بالنقد يعني البيع عندهم بيع نجش تجد من يزيد في السلعه لكن لايشتريها حتي لو وقف المزاد عليه وتباع علي انسان ضعيف يكون هو صيدهم ومن خارج مجموعتهم
4ـ هناك من لهم مطامع في الشهره بمعني ان فلان من الناس اشتري السلعه الفلانيه بمبلغ باهض من اجل ان يتحدث الناس عنه ويصل الي مراده من خلال هذه السلعه
اخيرآ ارجو اني مازعل احد بكلامي والموضوع للمناقشه والاستفاده للجميع من خلال هذه المواضيع الجيده
وتقبل مروري

الأخ راعي الركيات
أشكر لك مرورك وردك
الكريم ، وبخصوص أن الابل
كانت موجودة وماوصلت للمواصيل
هذي من قبل ، هذا أمر طبيعي ، من قبل
العلف نادر ، والماء أندر ، وكانوا يالله يعلفونهن
وكانن مايردن حق علفهن ، والحين الله يعز الحكومة
ماقصروا بكل شيء ، وعلى فكرة السيارات كانت أسعارها
عاديه(أبوي شرى له سيارة جديدة بـ12.000ريال)والحين ارتفعت
أسعارها ، ليش مانقول الموضوع كم علامة استفهام؟؟السيارات كانت موجودة
من قبل وأرتفعت أسعارها ، والبل كانت موجودة وارتفعت اسعارها ،كذلك الأسهم
كانت موجودة وأسعارها طفاس ورجعت ارتفعت فهل هذا يدل على شي وهذا أمر طبيعي
مع تحسن الوضع المادي ، وبخصوص النقاط خذ الرد عليها حبه حبه:
1-الشيء هذا موجود بكل سوق من سوق السيارات للبل لكل شيء
2-{مَا يَلْفِظُ مِن قَوْلٍ إِلَّا لَدَيْهِ رَقِيبٌ عَتِيدٌ} (18) سورة ق ، وقد يكون الشيء هذا موجود ، وانا ماأحط شيء بذمتي
3-الشيء هذا موجود بكل سوق ، ولكن بأعتقادك لو أن أي أنسان شرى له قعود ب100.000ريال (وهو يستاهل)وبعد مدة جاء يبي يبيعه هل تعتقد أنه يبيعه بربح أو بخسارة ؟؟ غالبًا يربح به ، أما الي ينغش بالقعود فهذا مثله مثل الي ينغش باي سلعه ثانيه ، والحساب يوم الحساب
4-أعرف الشيء هذا ، وكثير الي كذا ، ودراهمه وهو حر بها ، وأنت ماانت شريكه بحلاله
وأشكر لك ردك الجميل ، ومناقشتك البناءة ، وانا كتبت رد طويل عريض على ردك ، ولكن للأسف أنحذف الرد وشكرًا

[خيال الصبحا]

ياعمي يقولون انهزت الاسعار
في المزاين الاخير الاسعار انزلت
كتبه احد الاعضاء هناء قبل فتره

الأخ ابرق العزاف
أنهزت والا مانهزت
الانسان الي حب البل لذاتها
لو يقولون له تدفع ضريبه عن كل
ناقة تملكها أو تبيع ضني انه راح يدفع
والي دخل يدور التجارة هو الي ياكلها وشكرًا

[خيال الصبحا]

للأسف بعض الناس ماعنده ذمه

أبغى فـائده وحده فقط من جمل بيع بـ12مليون ريال سعودي

هـل توجد فـائده دينيه في أول المقام لان سعينا بالدنيا هو طاعة الله سبحانه ورسوله صلى الله عليه وسلم ودين الله الحنيف ( لاأظن توجد فـائده دينيه)

فـائده صحيه لايوجد

فـائده أجتماعيه لايوجد

فـائده أقتصاديه لايوجد

أبغى فـائده واحده فقط مرجوه من (جمل) وصـل الى هالاسعار من الناس اللي يقولون يستاهل!

الظاهر الحليب واحد مافيه ملكي وعايدي كلها حليب ويرجع الطعم لنوع العلف..

تسئل عن السبب يقول خشمها طويل وسنامها راجع للخلف والمسافه بين العين والاذن .... الخ

طيب وش أستفيد من هالمواصفات !

أنـا بوجهة نظري هذا يرجع لزيادة المال وضعف العقول والتفكير في مجال يوهم الناس بسلب أموالهم وتطفيف بالاسعار

مثل التوس الشاميه وش الفايده منه والله لو يذبحونه ماأكلت من لحمه والله لو يحلبون عنز شامي ماشربت من حليبها

وصل سعر أحد التيوس لـ800الف ريال أذا كان وصلت هالمبلغ أبني ثلاث مساجد بالراحه لكن مستحيل هاللي بدفع هالمبلغ يضعها بأعمال

خيريه لان الشيطان يلعب دور كبير في البيعه وعلى مسئوليتي بعضعهم ينقص المصاريف على أهله كل علشان ناقه أو جمل أتويس أو لوحة

سياره أو رقم جوال!!

وين عايشين!!

اللهم لاتواخذ مافعل السفهاء منا

(هذي وجهة نظر خاصه بي)

دمت بود

الأخ مشعل ابو تركي
أشكر لك مرورك وردك الكريم
وبخصوص الفائدة الدينية ، الدين ماحرم
بيع وشراء الأبل ، بل أن النبي صلى الله عليه
وسلم يقول (لإن يهدي الله بك رجل واحد خير
لك من حمر النعم ) فهذا دليل على أن أحب مال الأنسان
له هي الأبل ، وأيضًا بها فائدة وهو طلب الرزق ، والدين الأسلامي
يحث على طلب الرزق ، وفوائد الأبل الصحية كثيررررررررررررررررة
وفائدتها الأجتماعية للي يدور على الشهره موجودة وبالذات بالوقت الحالي
والفائدة الأقتصادية حدث ولا حرج
والفائدة أن الجمل ينتج وانتاجه يرجع قيمته بعشر مرات
وبخصو المواصفات ووش أستفيد منها هذا الشيء راجع لكل شخص
أنت يوم تدور على سيارة بمواصفات معينة وش تستفيد من المواصفات؟؟
أبي فايدة دينية
وفايدة صحيه
فـائده أجتماعيه
فـائده أقتصاديه
وأنت تقول أذا كان وصلت هالمبلغ أبني ثلاث مساجد بالراحه لكن مستحيل هاللي بدفع هالمبلغ يضعها بأعمال خيريه
وأنا أسألك سؤال وماأبيك تجاوبني عليه
هل أنت حريص على الصدقة ، لو بريال أو ريالين
وترى الي مايعطي من القليل مايعطي من الكثير
ولا تقول مستحيل يضعها بأعمال خيرية لإنك ماتعلم الغيب ولا تدري وش الي وراهم
وبخصوص قل المصاريف على الأهل ماأظن
لإنهم شبعوا وأشبعوار بعهم وجماعتهم ماهو بس أهلهم
وأحترم وجهة نظرك
وشكرًا

[خيال الصبحا]

ارتفاع اسعار البل مرهون بعدة نقاط مهمه هي

1-اهتمام الامير مشعل بها ورعايته لمهرجانات الابل.

2-المزاينات/القبايل/ام ارقيبة/نوفا.

3-توفر الاعلاف وخاصة الشعير لوينقطع من استراليا راحت البل فيها وصارت الناقه ماتسوى شي مثل الاسهم.

4-ارتفاع اسعار البترول(يعني اهل الخليج انفقعو من الدراهم ).

5-الامن- الامن- الامن اجل ناقه بمليون ريال تخليها في الخلاء ماتنسرق او تقتل .

6-حب الظهور والمباهاه والمهايطه.

7-الجهل وعدم ادراك عاقبة الامور شخص عنده200ناقه من50000=عشرة ملايين ريال وهو ساكن في منزل خرابة.

8-القنوات التي ظهرت اخيراً/الساحه/الواحه/الدانه.


9-المبالغة والكذب من قبل الشريطية.

الأخ أبو شاهر
أشكر لك مرورك
وردك الكريم ، وكلامك
سليم مية بالمية ، الا بالنقطة
رقم 7 ، بيت الفصام من أكبر(أن
ماكان هو الأكبر)من اكبر بيوت الخرج
تتعب وأنت ماأخذت عليه لفة ، فوين شفت الخرابة
الي تقولها ، وشكرًا