تانكي الماء ياأهل مكشات

[اعقاب]

السلام عليكم ورحمة الله وبركاته
الاخوه الاعزاء
ودي اخذ رايكم في التانكي للسفاري
ودي اركب تانكي ماء اللي على شكل المرتبه
بدل المرتبه وعلى شكلها
يستخدم تانكي ما ومرتبه في نفس الوقت
2 في 1
سؤالي هل احد من اخواني جربه؟
ماهي محاسنه ومساوئه؟
هل يكون ستانلس ستيل او كاربون ستيل؟
في اي منطقه احصل افظل من يركبه والعنوان اذا أمكن؟

بأنتظاركم

[الدرندس]

اخوي عقاب


اول مره اسمع عن تانكي على شكل مرتبه ؟؟؟؟؟؟؟؟؟؟

نررجو من الاخوان الافاده

[كويس]

من رآئي تاخذ خزان الوادي

[ضغط سحاب]

اول مرة اسمع فيه ....!!!!!!!!!!!!!!!!!!!

[ابوجعفر]

انه جربت على الجيب الاول سفاري خزان حديد اصدي دايم حسن لك خزان فيبر الفيبر مايصدي.

[اعقاب]

مرحبا بالجميع

التانكي يصلح في الكويت منذ مبطي
لكن سمعت انه يصنع في الرياض او القصيم
بغيت اتاكد ولا الله يعين اروح للكويت

[اعقاب]

ما احد جاب خبر

[هاوي الله]

على كلام شخص .... يقول في ورشة المواهب في صناعية الرياض ... هذا علمي وسلامتك

[اعقاب]

جزيت خيرا وزوجت بكرا
ماحولك عنوان ولارقم تلفون الورشه
الا بسالك عن الاسم هل هو شرعي
وقصدي عشان مصلحتك
شكرا لك

[اعقاب]

للرفع ياهل الفزعه

[شاص]

هذا سلمك الله واحد من الربع مركبه على باترول 94 صالون (اربع أبواب ) مركب عليه المرتبة اللي ورى .. لكن صارت المرتبة متعبة وقاسية وغير مريحة للراكب الخلفي .. فلو تفصل تانكي عرضي خلف المرتبة أفضل لك

[عجمي]

حياك ياعقاب وصحيح كلامك اعرف واحد من الربع ركبة بربع باترول لكنة خلى التانكي عريض شوي وسبب لة ثقل بالموتر والا هو ممتاز وفكرتة ممتازة والأفضل يكون من الستيل او الألمنيوم لأنة اخف واجد من الحديد

كذلك عليك مراعاة مايلي

*لابد تكون القاعدة اللي تحت للتانكي صخيفة مرة يعني حدود 15 سم عشان تاخذ حساب السفنج والتلبيسة بعدين ومايصير الراكب مرتفع مرة
* مكان الحنفية يكون من باب السواق اوالراكب
*وضع قواطع داخل التانكي عشان تتفادى صوت الماء بعدين مع المطب

اما مساوءة مالة مساوء اذا اشتغلتة صح

وبالنسبة لمكان تفصيلة اتوقع اي محل متخصص يسوية اذا وصلت الفكرة لة صح

اخوك عجمي

[اعقاب]

مشكورين على تفاعلكم
التانكي فصلته في ورشة المواهب في الرياض
وبركبه بعد كم يوم وعلمكم علومه