((( الحبارى ))) كيف يجدها الصقار!!!

[((( الحر)))]

تحياتي للجميع !!!
السلام عليكم ورحمة الله وبر كاته!!!

حبيت اشارك اليوم بموضوع لعله ينال رضاكم واستحسانكم!!!

الموضوع كيف يجد الصقار الحبارى!!!

طير الحبارى افضل الطرائد للصقارين على الاطلاق!!!

يبدء الصقارين رحلة البحث عن الحبارى مع خيوط الفجر. يطلعون بطيورهم بعد صلاة الفجر مباشره بالسيارات وعيونهم مركزة على الارض يدورون عن جرة الحبارى لان الحباري توقف عن الطيران اذا طلع الصباح وتنزل للارض لسببين////

اولاً:- تنزل الحبارى علشان تدور على اكل لانها تكون جوعانة من الطيران طول الليل فتنزل علشان تاكل!!!

ثانياً:- لان الجوارح من الصقور والعقبان تحوم بالجو طول النهار ومن افضل فرايسها الحبارى فتنزل الحبارى للارض خوف من الطيور الجوارح وتكمل طيرانها بعد غروب الشمس لان الجوارح ماتحوم بالليل!!!
علشان هذا يركز الصقارين انظارهم الى الارض يدورون جرة الحبارى وفي نفس الوقت ينتبهون لاتثور قبل يلقون جرتها!!!

واذا لقى الصقار جرة الحبارى يبداء يجهز طيره يشيله على يده ولازم الصقار يتعرف على الجره هي جرة جديده اليوم او انها من امس اومن قبله لان الجرة او الاثر يبقى بالارض يوم او يومين خاصة اذا كانت الجرة على ارض مرشوشه بالمطر ولافيه هواء او غبار بالجو فالجره تبقى واضحة ليومين او اكثر!!!

واذا تاكد الصقار ان الجرة اليوم يبداء بمتابعة اثرها لين يلقاها ويهد طيره عليها بسرعه الا في حالة واحد فلا يتبع الجرة اذا وجد جرة صقار ثاني يتبعها قبله يتركها له ويدور عن حبارى غيرها وهذي من أداب الصيد الي ذكرتها في موضوع سابق!!!

واذا كانت الحباري كثيرة في المنطقة مايترك طيره ياكل من الحبارى ويعزلها عنه بسرعه ويكفيه اكل بسيط منها ثم يخفيها عنه ويهده على حبارى ثانيه ، لان الطير يصيد لنفسه ولا يصيد لصقاره واذا اكل من الحبارى شبع وماهد على الحبارى الثانيه والصقر مايصيد اذا كان شبعاناً ويستمر الصيد لين ينتهي النهار وبعد هذا يعلف الطير اذا كان ماعند نيه للصيد فيه بكره واذا كان عند نيه للصيد فيه يوكله قطعة لحم صغيره بس !!!
هذا ماعندى.... وياليت اخواني الصقارين يوضحون أي اخطا او يضيفون اقتراحات مفيده لان المقصد خدمة الجميع......... وسلامتكم!!!
هذي صوره للحبارى وهي ملبده بعد طلوع الفجر



وهذي صوره لجرة او اثر الحبارى



منقول ( بتصرف ) من مجلة " مقناص " العدد الأول

تحياتي للجميع...!!!
اخوكم ((( الحر)))
17/5/1424هـ

[الباهي]

بارك الله فيك يالحر

واحب اضيف بعد ان الحبارى اذا جات لها في جو مافيه احد من القنوص ولا فيه رايح وجاي
والارض مربعه( ترب) فيه يعني تطول في هذا المكان وتتردد فيه وماتتعداه لعده ايام الا ان كان
جاها شي وروعها مثل ثعل (ثعلب) واي من الحيوانات الاخرى

وتقبل التحيات

[الباهي]

فيه نقطه نسيت اذكرها

اذا الواحد حصل له جره وجديد يعني من يومه احسن شي ان يكون عنده طير (طلاع) يعني انه يكون راكد
ويكشف عنه في السياره لان بعض الحباري فيها بلا تطير على مد الشوف والواحد يكون ملتهي بالجره
وعينه في الارض وتطير والواحد ماشافها بس لا صار الطير يطلع (ارقد وامن) لان الطير راح يشوفها
لو طارت وذيك الساعه تفرج على الهدد

وشاكر لك اثاره هالموضوع الطيب لانه ذو شجون


الباهي

[صقر]

السلام عليكم ورحمة الله وبركاته

مشكور اخوي الحر على الموضوع الشيق

واذا ماعندك مانع احب اضيف بعض النقاط المهمة واركز على عنوان موضوعك وهو كيف يجد الصقار الحبارى:

1- يقولون (الحبارى جرّة) يعني ان نسبة (90%) من الحباري التي يجدها الصياد عن طريق الجرة ولذلك لابد للصقار من مراعاة هذه النقطة وان يوليها جل اهتمامه فيجب على الصقار ان يختار المنطقة التي من المتوقع وجود الحبارى فيها وهي ( الشغايا ، المراميث ، النقر الاماكن التي يكون فيها مكان جاهز للإختباء مثل شجر العوسج والسدر والرمث ) وتبتعد الحبارى عن الاماكن المنبسطة وكذلك عن التجمعات السكانية .

2- يجب على الصقار الابتعاد عن الاماكن التي تكثر فيها قطعان الاغنام لأنه لايستطيع رؤية اثر الحبارى وسط آثار الغنم وايضا الحبارى تجفل من الغنم وتغادر المنطقة التي تتواجد فيها قطعان الاغنام. والغريب ان الحبارى مثلما تجفل من الغنم تلاحق قطعان الابل وتدخل وسطها.

3- يجب على الصقار ايضا تحري الحبارى في المناطق التي ضربها وسم .

4- عند نزول المطر يرجع الصيادين الى ديارهم لأن المطر يخفي اثر الحبارى ولا يظهر لها اثر الا بعد يومين على الاقل.

5- الخبرة مطلوبة فتجد الصقار يعرف من الجرة نوع الحبارى ومتى وطأت الأرض وبإمكانه معرفة نفسية الحبارى وهل الجرة بالليل او النهار وهل هي خائفة ام غير خائفة ومن خلال الخبرة يعرف امور كثيرة كلها عن طريق الخبرة.

[طيرالحمــــاد]

موضوع رائع يالحــــــــــــــــــــــــــــــــــــــــــــــ ــــــر
تسلم والله عليه
واضافة جميلة من الباهي وصقــــــــــــــــــــــــر

[ميراج]

الله يعطيك العافيه

ما قصرت وبيض الله وجهك

[المري]

اخي (( الحر ))

بيض الله وجهك على ذا الموضوع اللي كفيت فيه ووفيت


كما اشكر الاخوان الباهي وصقر على الاضافه فعلى ماقيل كملوا الناقص ((مافيه ناقص)


وتقبل تحيات اخوك المري

[((( الحر)))]

اخوي العزيز البــــــــــــــــــــــــــــــاهي!!!
واخوي العزيز صــــــــــــــــــــــــــــــــــقر!!!

الف شكر على الاضافة المناسبة وهذي والله معلومات طيبه بارك الله فيكم والقصد خدمة الجميع!!!

اخواني الاعزاء

طيــــــر الحمـــــــــــــــــــاد!!!

وميـــــــــــــــراج!!!

المـــــــــــــــــــــــري!!!

مشكورين على المتابعه والله يسلمكم ويجعل هالسنه موسم صيد وخير وبركات على الجميع!!!!

اخوكم ((( الحر)))

[ابو عايد]

يعطيك العافية يالحر

على هالشرح الوافي والذي دعمته بالصور

وتقبل تحياتي // العاشق الولهان

[مهتوي]

بسم الله ..

الموضــــــــوع يشـــوق .. وقمه في الروعــة ..

وهذي العلوم اللي تشرح الصدر ..

اخوكم مهتوي

[السنافــــــي]

مشكور يا الحر على الموضوع الممتاز
والله يجزاك خير ويطول عمرك
واشكرك على الصور وبلاخص
صورة جره الحباري والله يبيض وجهك
*******************************
اخوك : السنافـــــي

[تالي الاولين*]

.


بيض الله وجهك يالحر على هالمعلومات

موضوع يشد ويحمس

يعطيك العافيه



.

[أعــرابــي]

أخي الكريم / الحـر
الإخوة الكرام جميعاً

السلام عليكم ورحمة الله وبركاته

أحب أن أشيد بالأخ الكريم الحر على متابعته واهتمامه ، وأسأل الله جل وعلا له ولجميع الاخوان الصحة والعافية . ولدي ملاحظة صغيرة أتمنى أن يتقبلها أخي الكريم الحر حول هذا الموضوع وهي أنني قرأته في مجلة " مـقـنـاص " في عددها الأول الذي وزع في الأسواق منذ أسبوعين تقريباً ، حتى أن الصور المرفقة مع الموضوع مأخوذة من المجلة ، دون أدنى إشارة للمصدر . وهذا ، لعمري ، ما لا يجب أن نقع فيه حفاظاً على حقوق الآخرين ، خاصةً أن المجلة نقلت أحد المواضيع المنشورة هنا في " منتديات مكشات " وأشارت لمصدر الموضوع ، بل وأشادت بالمنتدى وبما ينشر فيه من مواضيع .

هذه الملاحظة أسجلها كي أنبه نفسي وإخواني بضرورة ذكر مصادر مواضيعنا التي ننقلها عن الغير .

بارك الله في أخينا الحر ، وليسامحنا على التعقيب

والسلام عليكم

[مكشات]

أشكر أخي الحر على هذا الموضوع المفيد لهواة الصيد ..
كما أشكر أخي أعرابي على هذه الملاحظة القيمة ..
وأتمنى من جميع الإخوة عند النقل أو الاقتباس من أي مصادر أخرى التنبيه لذلك المصدر ( أسفل الموضوع أو أعلاه ) بخط أحمر واضح .. حفظا لحقوق الآخرين ..
وتقبلوا تحياتي
أخوكم
مكشات

[akhan]

مشكووووووووووووووووووووور